Лука 21 - Од Соткс Новый Завет на мордовском-мокша языке 2016

Ашу удавать казнец

¹ Иисус ванць ярмаконь кочкама арзять шири и няезе, кода козятне путнесть эзонза казнет.

² Сон няезе фкя ашу удаватьке, кона путсь тоза кафта серень ярмакт.

³ Иисус мярьгсь: «Видеста корхтан тейнть: тя ашу удавась путсь сембода лама.

⁴ Нят сембе путсть Шкайти козяшиснон эзда, а сон ашушинц эзда путозе сембонц, мезе лангс трясь пря».

Иисус аноконди азонды Шкаень кудть срафтоманц колга

⁵ Мзярда пуромфне ушедсть корхтама Шкаень кудть колга: конашкава мазы кевста сон тиф, и конашкава козя казнет сонь мазопнесазь, Иисус мярьгсь:

⁶ «Сайхть шит, мзярда сембось, мезе тяса няйхтяда, срафтови-калафтови, кев лангса кевга аф ляды».

Мекольдень пинкнень тяштьксна

⁷ Иисусонь кизефтезь: «Тонафты, мзярда тя ули? Кодама тяштьксонь коряс содасаськ тянь пяшкодевоманц?»

⁸ Сон мярьгсь: «Ванфтода пря, афоледязь васькафта: сяс мес ламотне сайхть Монь лемозень ала и мярьгихть: "Тя Монан" и "Пингсь сась". Тяда яка мельгаст!

⁹ Мзярда марятада кулят тюремань колга и ломанень комболдоматнень колга, тяда эводе, сяс мес инголи тянди улема, но тя нинге аф песь».

¹⁰ Эста мярьгсь тейст: «Ломаньтналсь кеподи ломаньтнал лангс, масторсь – мастор лангс;

¹¹ васток-васток улихть вии модашерьхкомат, сайхть вача пинкт и куломань урмат, и менельста эвондайхть эвфти и оцюдонга оцю тяштькст.

¹² Семботь тянь улемда инголе кармайхть кунцемонт тинь, Монь инксон панцемонт, макссемонт синагогас и пякстамгудга, и вяттядязь оцязорхнень и оцюнятнень инголи;

¹³ вов тейнть ётка корхтамс Монь колган.

¹⁴ Сяс путость седиезонт тянь – аноконди тясть арьсекшне, мезе тейнть корхтама прянь араламанкса.

¹⁵ Мон максан тейнть валхт и смузьши, конатнень каршес кивок, тейнть каршек ащихнень эзда, мезевок аф азови и каршек аф молеви.

¹⁶ Митядязь тинь тинцень алянте-тядянте, брадонте, эсь юромонь ломаненте, ялганте, и конатнень-конатнень ёткстонт шавсазь.

¹⁷ И Монь лемозень инкса кивок аф кармай кельгомонт тинь.

¹⁸ Аньцек шяярьнявок аф прай тинь прястонт.

¹⁹ Кирдеда и тейнть идеви ваймонте».

Иисус азонды Иерусалимть калафтоманц колга

²⁰ «Мзярда няйхтяда Иерусалимть перьфке ушмовийхть, эста содасть, маладсь сонь срафтомань-калафтомань пингоц.

²¹ Эста сят, конат Иудеясот, ласькост панттненди; конат Иерусалимсот, лисест тоста; конат перьфпяльдень велеват, тязаст сувсе ошу.

²² Вдь тя – кяжень пандома шитне, и пяшкодеви сембось, мезе инголькиге азфоль Сёрматфксса.

²³ Вай, конашкава стака ули ся шитнень пекихненди и идень потяфтыхненди. Оцюдонга оцю маятама ули тя масторса и Шкаень кяжсь прай ня ломаттнень лангс.

²⁴ Финцне прайхть тор эзда, омбонцнень сявсазь полонц лия масторга; Иерусалимсь ули лия ломаньтналхнень пильгала снярс, мзярс аф аделави синь пингсна».

Ломанень Цёрать самац

²⁵ «Кармайхть улема пелькс тяштькст шить, ковть, тяшттнень лангса. А модать лангса ломаньтналхне кармайхть трнаткшнема седи акшенязост самс оцюведень зярьфта и комболдомада.

²⁶ Ломаттне пелемать эзда кармайхть прашендома ёжефтома, марямок ся зияттнень колга, конат сайхть тя масторть лангс. Вдь менелень вийхне шерьхкозевихть.

²⁷ Эста няйсазь Ломанень Цёрать инь оцю вийсонза и иневалдсонза коволхнень лангса саманц.

²⁸ Мзярда сембось тя ушеды пяшкодевома, эста тинь видептесть копорентень и кеподесть прянтень, малады тинь воляс нолдаманте».

²⁹ Иисус азондсь валвеляфкс: «Варжакстода смоква шуфтть и лия шуфттнень лангс;

³⁰ кодак кармайхть синь лопаяма, тянь няемста тинць содасасть – кизось ни маласа.

³¹ Стане тясонга: мзярда няйсасть азфозень пяшкодевоманц, содасть, маласа Шкаень Оцязорксшись.

³² Видеста корхтан тейнть: тяниень пингонь эряйхне аф кенерихть юмамс, кода сембось тя ули.

³³ Менельсь и модась юмайхть, но Монь валне аф юмайхть».

Уледа анокт!

³⁴ «Ванода эсь мельгант, тясть стакалгофта седиентень топафксонь аф содамаса, симондемаса и эрь шинь тевонкса лажнамаса, афоледязь сата ся шись аф анокста.

³⁵ Сон кода тувор, кундасыне сембонь, кие эряй масторлангса.

³⁶ Сяс уледа фалу анокт и озондода: максоволь тейнть вий мяндемс сембе ся сай зияттнень эзда и арамс Ломанень Цёрать инголи».

³⁷ Иисус шить тонафтсь Шкаень кудса, а илять тушендсь тоста и ётафнезе веть Вайшуфта панда пряса.

³⁸ Сембе ломаттне варьхмодема ланга сашендсть Шкаень куду кулхцондомонза.