Лука 20 - Од Соткс Новый Завет на мордовском-мокша языке 2016

Кизефкс Иисусонь азорксшинц колга

¹ Вов фкя стама шиня, мзярда Иисус тонафтсь ломаттнень эса Шкаень кудса и азондсь Пара куля, Тейнза састь озксвятиень оцюнят и койти тонафтыхть ломаньтналонь оцюнятнень мархта,

² и кизефтезь Сонь: «Азк тейнек, кодама азорксшиса Тон тиендьсайть ня тефнень? Кие максозе Тейть тя азорксшить?»

³ Иисус каршезост мярьгсь: «Монга кизефттядязь тинь фкянь колга, азость Тейне:

⁴ Иоаннонь кстиндамац ульсь менельста али ломаттнень эзда?»

⁵ Синь эсь ётковаст кармасть корхтама: «Мярьгондярятама: "Менельста", эста Сон мярьги: "Мес ина тинь ашеде кема тейнза?"

⁶ Мярьгондярятама: "Ломаттнень эзда", эста сембе ломаттне пикссамазь кевса, сяс мес синь марнек ёньца-ваймоса лувсазь Иоаннонь прорококс».

⁷ Синь каршезонза мярьгсть: «Аф содасаськ коста».

⁸ Иисус мярьгсь тейст: «Эста Монга аф азса, кодама азорксшиса тянь тиендьса».

Валвеляфкс виноградонь касфтыхнень колга

⁹ Иисус ушедсь азондома ломаттненди тяфтама валвеляфкс: «Фкя ломанць озафтсь виноградонь пере, сиводсь мельганза якама виноградонь касфтыхть, сонць тусь лама пингс омба мастору.

¹⁰ Мзярда сась виноградонь кочкама пингсь, сон кучсь виноградонь касфтыхненди покоди сявомс кядьстост эсь пяльксонц кочкаф виноградть эзда. Но сят пикссезь покодить и нолдазь шавонь кятть.

¹¹ Виноградонь переть азороц тага кучсь лия покоди; аньцек сят тя покодитьке пикссемда и визькс шамас вятемда меле нолдазь шавонь кятть.

¹² Кучезе колмоцеть; но тонаньге верс пикссезь и ёрдазь тоста.

¹³ Эста виноградонь переть азороц мярьгсь: "Мезе тейне тиемс? Кучса тов эсь кельгома цёразень, пади сонь эздонза визделгодыхть".

¹⁴ Но виноградонь касфтыхне сонь няемстонза эсь ётковаст кармасть корхтама: "Тя цёрац; аряда шавсаськ сонь и виноградонь пересь ляды тейнек!"

¹⁵ Синь ёрдазь сонь виноградонь переста и шавозь. Ина мезе тии синь мархтост виноградонь переть азороц?

¹⁶ Сон сай, машфтсыне ся виноградонь касфтыхнень и макссы виноградонь переть лия покодихнень кядьс». Тянь кулиенза мярьгсть: «Тяфта мзярдонга тяза лисе!»

¹⁷ Иисус варжакстсь лангозост и кизефтезень: «Мезень колга корхтайхть Сёрматфксса ня валхне: "Кевсь, конань ёрдазь кудонь путыхне, арась кудужень кирди кевкс"?

¹⁸ Эрсь, кие пупордай ся кевть ланга, токави, а кинь лангс сон прай, сянь тапасы».

¹⁹ Озксвятиень оцюнятне и койти тонафтыхне шарьхкодезь, тя валвеляфкссь синь колгаст, сяс ёрасть эстокиге кундамс Иисусонь, но пельсть ломаттнень эзда.

Кизефкс каяфксонь пандомать колга

²⁰ Синь ванондсть Иисусонь мельге и кучсть Тейнза ломатть, конат пряснон няфнезь коень ваны ломанькс. Но афкукс синь кучфтольхть кундамс Иисусонь кодамонга валса и сяльде максомс Римонь азорть кядялу судендамс.

²¹ Ня кучф ломаттне кизефтезь Иисусонь: «Тонафты, минь содасаськ, Тонь валхне и тонафтомаце видет, Тон киньге мяленц аф ванондсак, видеста тонафтсамасть Шкаень кити.

²² Азк, койть коряс мярьгондеви тейнек пандомс каяфкс кесарти али аф?»

²³ Иисус шарьхкодемок синь ваймонь кичкорямаснон, мярьгсь тейст: «Мезенди варчсесамасть Монь кизефксонтень вельде?

²⁴ Няфтеда Тейне динарий ярмак: кинне лангсонза шамаликсь и лемсь?» Сят каршезонза: «Кесарть».

²⁵ Иисус мярьгсь тейст: «Эста макссесть кесарти кесареннеть, а Шкайти – Шкаеннеть».

²⁶ Ашесть машта кундамонза Сонь валса ломаттнень инголе, дивандазевсть валонзонды и кашт исть моле.

Кизефкс кулофнень эзда вельмамать колга

²⁷ Иисусонди сась мзярошка саддукей, конат ашесть кема кулофста вельмамати, и кизефтезь Сонь:

²⁸ «Тонафты, Моисей сёрмадсь тейнек койса: "Кулондяряй рьвяяф идьфтома аля, эста брадонцты сявома полакс рьвац, и шачфтома кулофти юромонь полады идня".

²⁹ Эрь вов, ульсть сисем братт, васенцесь рьвяясь и кулось идьфтомокс.

³⁰ Сявозе рьвять омбоцесь, сявок кулось идьфтомокс.

³¹ Сявозе сонь колмоцесь, тяфта сявондезь рьвакс сембе сисем браттне, и кулость, ашесть када итть.

³² Мекпяли кулось рьвяське.

³³ Вельмамда меле авась конанди арай полакс? Вдь сисемицьке сявондезь рьвакс».

³⁴ Иисус мярьгсь каршезост: «Тя пингонь ломаттне рьвяйсихть, тушендыхть рьвакс;

³⁵ ина сят, конатненди Шкайсь кази сай пингонь эряф и кулофста вельмама, аф рьвяйсихть, рьвакска аф лисендихть.

³⁶ Синь мзярдонга аф кулыхть, сяс мес улихть ангелхнень лаца. Синь Шкаень итть, вдь Шкайсь вельмафтозень кулофста.

³⁷ А кулофнень эзда вельмама афкукс ули, тянь колга корхтась Моисейга палы кусторксть колга азксса, мзярда лемдезе Азорть Шкайкс Авраамонди, Шкайкс Исааконди, Шкайкс Иаковонди.

³⁸ Шкайсь – аф кулофнень Шкайсна, а эряйхнень, сяс мес Тейнза сембе эряйхть».

³⁹ Тянь каршес конат-конат койти тонафтыхнень эзда мярьгсть: «Тонафты, Тон лац азыть».

⁴⁰ Тяда меле синь кяльсна ашезь шарфтов кизефнемс Иисусонь мезеньге колга.

Христоссь – кинне цёрась?

⁴¹ Иисус мярьгсь тейст: «Мес ломаттне тяфта корхтайхть: Христоссь – тя Давидонь Цёрац?

⁴² Вдь сонць Давид корхтай Псалтирьса: "Азорсь мярьгсь монь Азорозти: Озак Монь види ширезон,

⁴³ мзярс аф путсайне Тонь пильгалот Тейть каршек ащихнень".

⁴⁴ Лисенди, Давид лемнесы Христость Азоркс; кода ина Христоссь ули Давидонди цёракс?»

Пеледа койти тонафтыда

⁴⁵ Мзярда сембе ломаттне кулхцондсть, Иисус мярьгсь тонафниензонды:

⁴⁶ «Ванфтода пря койти тонафтыда, конат кельгсазь кувака щамса якамать, мишендема-рамсема вастса шумбракснема-шнама валонь кочксемать, синагогаса и каванямань иласа инголи озсемать.

⁴⁷ Синь сивондьсазь-ётафнесазь удаватнень мекольценяснон и прянь няфтемга ламос озонкшнихть. Синь сяда кемоста улихть судендафт».