Лука 2 - Од Соткс Новый Завет на мордовском-мокша языке 2016

Иисусонь шачемац

¹ Ся пингть Август, Римонь кесарсь, макссь кошаркс сёрмадомс сембе ломаттнень сонь масторстонза.

² Тя ульсь васенце сёрмадомась и сон ётафтовсь, мзярда Сирияса азорондась Квириней.

³ Сембе тусть прянь сёрматфтома, эрсь эсь атянь-авань ошезонза.

⁴ Иосифовок тусь Галилеянь Назарет ошста Иудеяв, Давидонь шачема ошезонза, кона лемневсь Вифлеем; сяс мес Иосиф шачемас коре ульсь Давидонь юромста.

⁵ Сон тусь прянь сёрматфтома Мариянь мархта, конань ладязь максомс тейнза рьвакс и конац учсь идня.

⁶ Вифлеемса улемстост Мариянь сась шачфтома пингоц.

⁷ Сон шачфтозе Цёранц, васенценянц, ашкодозе Сонь нуласа и путозе жуватань андома кядьгос, сяс мес инжиень кудса тейст ашезь сата васта.

Учань ваныхне и ангелхне

⁸ Ошть маластонь паксяса ульсть учань ваныхть, конат веть ванфтозь эсь учаснон.

⁹ Апак учт инголест эвондась Азорть ангелоц, и синь валдоптозень Азорть иневалдоц. Синь сявозень оцюдонга оцю пелема.

¹⁰ Ангелсь мярьгсь тейст: «Тяда пеле; мон азан тейнть Пара куля, кона ули оцю кеняртьксокс сембе ломаньтналти:

¹¹ тячи Давидонь ошса шачсь тейнть Идись, Сон Христос Азорсь.

¹² Вов тейнть тяштькс: тинь мусасть Иднять ашкотфста жуватань андома кядьгоста».

¹³ Апак учт ангелть ваксса эвондась менелень ушмовий, ламодонга лама ангелда, конат шназь Шкайть и корхтасть:

¹⁴ «Шнама Шкайти вярдень менельса, и модать лангса сетьмоши ломаттненди, конатнень кельгсыне Шкайсь!»

¹⁵ Мзярда ангелхне кеподсть менели, учань ваныхне мярьгсть фкя-фкянди: «Аряда Вифлеему и ванцаськ, мезе тоса тиевсь, мезть колга Азорсь пачфтсь тейнек куля».

¹⁶ Эрязста пачкодсть, музь Мариянь мархта Иосифонь и Иднять, кона путфоль жуватань андома кядьгос.

¹⁷ Тянь няемста синь азондсть сянь колга, мезе тейст азфоль тя Иднять кувалма.

¹⁸ Сембе кулисна дивандасть сянди, мезе азондсть тейст учань ваныхне.

¹⁹ А Мария сембе ня валхнень путозень седизонза и арьсекшнесь кульфть колга.

²⁰ Мрдамста учань ваныхне шназь Шкайть и азондсть Тейнза сюконямат сембонкса, мезе кульсть и няйсть. Сембось ульсь стане, кода тейст азфоль.

Иисусонь кандозь Шкаень куду

²¹ Кафкса шида меле, мзярда сась пинге керомс Иднять киськопенц, Тейнза путсть лем Иисус. Тя лемть максозе ангелсь нинге тядянц пекса эвондамдонза инголе.

²² Мзярда сась синь пингсна пяшкодемс аруяфтомань койть, кона сёрматф Моисеень коенц эса, Мария и Иосиф кандозь Иднять Иерусалиму Азорть инголи ладямонза,

²³ вдь Азорть койсонза сёрматф: эрь васень цёранясь эряви лемнемс Азорти.

²⁴ Тяка пингть тейст нинге эрявсь, Азорть коенц коряс, кандомс озксказненди вирень кафта гуленят али гуленянь кафта лефкст.

²⁵ Ся пингть Иерусалимса ульсь ломань, лемоцоль Симеон. Сон ульсь видексшинь и Шкаень коень ванфты аля, кона учендозе Израильти Шкайть лездоманц; и Иняру Ваймопожфсь ульсь сонь лангсонза.

²⁶ Тейнза Иняру Ваймопожфсь инголькиге азозе: сон аф кулы, мзярс аф няйсы Азорть Мессиянц.

²⁷ Иняру Ваймопожфть тердеманц коряс сон сась Шкаень куду. И мзярда тядятне-алятне кандозь тоза Иисус идняснон – тиемс Сонь лангсонза сянь, мезенди кошарды койсь,

²⁸ Симеон сявозе Сонь кядезонза, шназе Шкайть и мярьгсь:

²⁹ «Тяни, Азор, валцень коряс, Тон нолдасак Эсь урецень тя эряфста озаф седихть,

³⁰ сяс мес монь сельмоне няезь кучф идемацень,

³¹ конань Тон аноклайть няемс сембе ломаньтналхненди;

³² валдть, кона валдоптсыне сембе ломаньтналхнень, и иневалдть Тонь Израилень ломаньтналцти».

³³ Иосиф и Мария дивандасть Иднять колга азфти.

³⁴ Симеон бславазень синь и мярьгсь Мариянди, Иднять тядянцты: «Тя Идсь арай туфталкс Израильса ламотнень прамаснонды и кеподемаснонды. И Сон арай Шкаень тяштьксокс, конань каршес стяйхть ламотне.

³⁵ Тянь вельде панжевихть ламотнень седипотмонь арьсемасна и тонценьге ваймоцень пачк ётай пеель».

³⁶ Тяса ульсь Аннавок, пророк авась, Асиронь юромста Фануилонь стирец. Сон ни пяк сирель. Анна од стирькс лиссь рьвакс и эрясь мирденц мархта сисем кизот,

³⁷ сяльде кадовсь удавакс, а тяни ни тейнза кафксогемонь нилие киза. Сон мзярдонга ашезе кадонда Шкаень кудть, тосоль шинек-венек, постонь кирдезь и озондозь сюконясь-покодсь Шкайти.

³⁸ Анна тя пингоня нежедсь тейст, шназе Шкайть и корхтась Идть колга сембонди, кие учендозе Иерусалимть воляшис мянеманц.

³⁹ Азоронь койть коряс семботь тиемда меле, Иосиф и Мария мрдасть Галилеяв, Назарет ошезост.

⁴⁰ Иднясь кассь-кеподсь и кемокснесь ваймопожфса; Сон пяшкотькшнесь смузьса и Шкаень пароказнесь ульсь мархтонза.

Иисус цёранясь Шкаень кудса

⁴¹ Эрь кизоня тядянза-алянза якасть Иерусалиму евреень Очижинь илас.

⁴² Мзярда Иисусонди кемгафтува кизоль, синь, кода фалу, тусть Иерусалиму Очижис.

⁴³ Очижинь шитнень ётамдост меле тядянза-алянза тусть меки куду, а Иисус Цёранясь илядсь Иерусалиму. Иосиф и Мария ашезь сода илядоманц,

⁴⁴ арьсесть, Сон моли лиятнень мархта. Мзярда синь ётасть фкя шинь кувалма, кармасть вешендемонза Сонь мала ломаньцнон и содафснон ёткста.

⁴⁵ Ашезь му Сонь и мрдасть Иерусалиму вешемонза.

⁴⁶ Колма шида меле музь Цёранять Шкаень кудста. Сон озадоль тонафтыхнень ёткса, кулхцондсь синь эсост и макссесь тейст кизефкст.

⁴⁷ Сембе сят, кит кулезь Сонь корхтаманц, дивандасть Сонь шарьхкодеманцты и кизефкснень каршес азфонцты.

⁴⁸ Мзярда тядянза-алянза няезь Сонь, дивандасть. Тядяц мярьгсь Тейнза: «Цёрай! Мезенкса тяфта тиеть мархтонк? Вов аляцень мархта палы седихть вешендеме эсот».

⁴⁹ Сон каршезост корхтай: «Мезенди эрявонь вешендемс? Али тинь ашесть сода: Тейне улема Алязень кудса?»

⁵⁰ Но синь ашезь шарьхкоде азф валонзон.

⁵¹ Иисус тусь синь мархтост, сась Назарету и сембоса ульсь кулхцондыкс тядянцты-алянцты. А Мария тядяц семботь тянь путозе эсь седизонза.

⁵² Иисус кассь-кеподсь, кочкась смузьши и ульсь кельговиксокс Шкайть и ломаттнень инголе.