Лука 19 - Од Соткс Новый Завет на мордовском-мокша языке 2016

Закхей каяфксонь кочкайсь

¹ Сяльде Иисус сувась Иерихону и ётась пачканза.

² Ошса ульсь фкя козя аля, каяфксонь кочкайхнень оцюнясна, лемоцоль Закхей.

³ Сонь пяк мялецоль варжакстомс Иисусонь лангс, кодама Сон, аньцек лама ломанень фталда ашезь няе ёмла серенц сюнеда.

⁴ Эста сон инголдазень ломаттнень и Иисусонь няеманкса куцсь смоква шуфтть пряс, конань вакска Сянди сави ётамс.

⁵ Иисус ся вастти пачкодемста, варжакстсь вяри и мярьгсь тейнза: «Закхей, валк куроконе, тячи Тейне эряви лоткамс пялот».

⁶ Закхей эрязста валгсь и кенярдезь сявозе Сонь эсь пялонза инжикс.

⁷ Тянь няемста сембе ушедсть изгордозь корхтама: «Вай, Иисус сувась инжикс пежу ломанень пяли».

⁸ Закхей арась инголи и мярьгсь Азорти: «Азор, уликс-парозень пяленц максса ашуфненди, а кинь кядьста васькафтозь сявонь сяда лама – пандса нилень-крдаксть».

⁹ Иисус мярьгсь тейнза: «Тяни сась тя куду идемась, сяс мес Закхейге Авраамонь цёрац.

¹⁰ Ломанень Цёрась сась юмафнень вешемост и идемост».

Валвеляфкс покодихненди максф ярмакть колга

¹¹ Сятненди, кит кулхцондозь тянь, Иисус азондсь нинге фкя валвеляфкс. Вдь Сон ульсь Иерусалимть маласа, и синь арьсесть, курок сай Шкаень Оцязорксшись.

¹² Сон мярьгсь: «Фкя цебярь юромонь ломань тусь ичкоздень масторс ва мезенкса: максолезь тейнза оцязорксшить и мрдаль меки.

¹³ Тумстонза сон тердезень кемонь покодиензон, макссь тейст кемонь зрнянь ярмакт и мярьгсь: "Монь мрдамозон нолдасть тя ярмакть тевс".

¹⁴ Но тя масторонь эряйхне афолезь няе сонь и кучсть мельганза ломатть эсь мяльснон пачфтема: "Минь аш мяленьке няемс тя ломанть эстейнек оцязоркс".

¹⁵ Мзярда тейнза максовсь оцязорксшись и сон мрдась меки, тертьфтезень ся покодихнень, конатненди макссь ярмак, сяс мес мялецоль содамс, кие мзярксть касфтозе ярмакть.

¹⁶ Сась васенцесь и мярьгсь: "Азор, тонь зрнянь ярмакцень касфтыне кемоньксть".

¹⁷ Азорсь мярьгсь тейнза: "Пара, цебярят покодись. Сяс мес тонь лангозт ульсь кода надиямс ёмла тевса, сяфть эсь вятемацень алу кемонь ошт".

¹⁸ Сась омбоцесь и мярьгсь: "Азор, тонь зрнянь ярмакцень касфтыне ветексть".

¹⁹ Сянди азорсь мярьгсь: "Ульхть вете ошень вятикс".

²⁰ Сась колмоцесь и мярьгсь: "Азор, вов тонь ярмакце, мон ванфтыне сонь руцяня потмоса.

²¹ Мон пелень эздот, сяс мес тон ломанць казямат: сяват, мезе ашеть путне; нуят, мезе ашеть виде".

²² Азороц мярьгсь тейнза: "Кальдяв покоди! Эсь валсот карман судендамот. Тон содайть, мон ломанць казяман, сяван, мезе ашень путне; нуян, мезе ашень виде.

²³ Мес ина тон ашить макса монь ярмакозень полафнема вастс? Эста мрдамдон меле мон сяволине эсь ярмакозень касфтфста".

²⁴ Азорсь мярьгсь вакссонза ащихненди: "Сявость кядьстонза зрнянь ярмакть и максость сянди, кинь кемонь ярмактонза".

²⁵ Тейнза мярьгсть: "Азор, сянь ни ули кемонь зрнянь ярмакоц".

²⁶ "Мон корхтан тейнть, – мярьгсь оцязорсь, – эрти, кинь ули, нинге максови, а кинь аш, сянь кядьста сявови сявок, мезец ули.

²⁷ А монь аф кельгинень, кит ашезь ёра монь оцязоркс арамазень, вятесть сей и сельминголен шавость"».

Иисусонь самац Иерусалиму

²⁸ Валвеляфксть азондомда меле Иисус поладозе кинц Иерусалиму.

²⁹ Мзярда Сон пачкодсь Виффагия и Вифания велетнень малас, тона пандти, кона лемневсь Вайшуфта панда, Сон кучезень кафта тонафниензон,

³⁰ мярьгсь тейст: «Арда каршек ащи велети, эзонза сувамста няйхтяда сотнеф од осёл, конань лангса нинге кивок ашезь арне; юксость сонь и вятесть сей.

³¹ Кизефтендярятядязь кивок: "Мезенди юкссесасть?", – каршезонза мярьгода тяфта: "Сон эряви Азорти"».

³² Кучфне тусть и музь семботь стане, кода Иисус мярьгсь тейст.

³³ Мзярда синь кармасть осёлть юксомонза, азоронза мярьгсть тейст: «Мезенди юкссесасть од осёлть?»

³⁴ Синь каршезост: «Сон эряви Азорти».

³⁵ Вятезь сонь Иисусонди; лаподезь осёлть лангс щамснон и озафтозь лангозонза Иисусонь.

³⁶ Мзярда Сон ардсь, ломаттне ацсезь кить лангс эсь щамснон.

³⁷ Пачкодемок ся вастти, коса кись туй алу Вайшуфта пандста, сембе ламодонга лама тонафниенза ушедсть кенярдезь вярьгак вайгяльхть шнамонза Шкайть сембе дивань тефнень инкса, конатнень синь няезь.

³⁸ Синь корхнесть: «Бславаф Оцязорсь, кона сай Азорть лемса! Сетьмоши менельса и шнама Инь Вярдень Шкайти!»

³⁹ Ломаттнень ёткста кона-кона фарисейхне мярьгсть Иисусонди: «Тонафты, кардайть тонафнихнень».

⁴⁰ Но Сон каршезост мярьгсь: «Корхтан тейнть, лоткандяряйхть синь, эста ювадезевихть кефне».

⁴¹ Мзярда маладсь Иерусалимти, ошть лангс ваномста Иисус аварьгодсь инксонза.

⁴² Сон мярьгсь: «Вай, хуш тячиень шиня тонга содалить, мезсь канды тейть сетьмоши и идема! Аньцек тяни тя кяшф сельмодот;

⁴³ вдь сайхть тейть шит, мзярда душматтне маратядязь модань перяфксса, перятядязь и люпштатядязь сембе ширде.

⁴⁴ Синь машфттядязь тинь и тинь шабантень, кев лангса кевга аф кадыхть – и сембе тя сянкса, мес тон ашить сода ся пингть, мзярда Шкайсь сашендсь максомс тейть идема».

Иисус Шкаень кудса

⁴⁵ Шкайкудонь пирьфи сувамста Иисус ушедсь панцемост тоста мишендихнень и рамсихнень.

⁴⁶ Корхтась тейст: «Сёрматфксса азф: "Монь кудозе – озондомань куд, а тинь тиесть сонь салаень-шавиень пизокс"».

⁴⁷ Эрь шиня Сон тонафтсь Шкаень кудса. Озксвятиень оцюнятне, койти тонафтыхне и ломаньтналонь оцюнятне вешсть туфтал машфтомс Сонь.

⁴⁸ Но синь ашезь сода, кода тиемс тянь, сяс мес перьфканза фалу ульсть ломатть, конат кулхцондозь Сонь.