Лука 18 - Од Соткс Новый Завет на мордовском-мокша языке 2016

Валвеляфкс кядень аф нолдай удавать колга

¹ Иисус азондсь тонафнихненди валвеляфкс, конань вельде ёрась няфтемс тейст, кода эряви най озондомс и аф прашендомс пичефксс:

² «Фкя ошса ульсь судья, кона Шкайда ашезь пеле, ломаньда ашезь визде.

³ Сяка ошса эрясь удава, кона сидеста якась судьяти и корхнесь: "Лезтт тейне мумс видешить, араламак лангозон молида".

⁴ Аньцек судьясь ламос ашезь ёра тянь тиемс. Сяльде мярьгсь эстейнза: "Хуш мон Шкайдонга аф пелян, ломаньдонга аф виздян,

⁵ но тя удавась ваймамска ётка аф максы, араласа, лотказа сашендомда и машнефтемдон"».

⁶ Азорсь мярьгсь: «Кульсасть, мезе корхтай аф виде судьясь?

⁷ Кали Шкайсь аф араласыне Эсь кочкафонзон, Тейнза шинек-венек эняльдихнень? Кали Сон аф эряскоды араламост?

⁸ Азондса тейнть: Сон лезды Эсь кочкафонзонды и курок! Но Ломанень Цёрась мрдамстонза муй кемама модать лангса?»

Валвеляфкс фарисейть и каяфксонь кочкайть колга

⁹ Сятненди, кит лувондозь пряснон видексшиса эряй ломанькс, а лиятнень мезькска ашезь путне, Иисус азондсь тяфтама валвеляфкс:

¹⁰ «Кафта ломатть сувасть Шкаень куду озондома: фкясь фарисей, омбоцесь каяфксонь кочкай.

¹¹ Фарисейсь арась и озондсь эсь пачканза тяфта: "Шкай! Сюконян Тейть, мес мон аф стаман, кодапт лия ломаттне, салайхне-нельгихне, кяжень тиихне, усксевихне, али вов кода тя каяфксонь кочкайсь.

¹² Поставан недяляти кафксть, макссеса кемонце пяльксть сембостон, мезе сатнян".

¹³ А каяфксонь кочкайсь ащесь ширеняса, нльне сельмонзонга пельсь кеподемс вяри; аньцек эрьхнезе мяштенц и корхтась: "Шкай! Ужяльдемак монь, пежу ломанть!"

¹⁴ Азса тейнть, каяфксонь кочкайсь тусь кудозонза видексшинь ломанькс, но аф фарисейсь. Вдь эрсь, кие оцюлгофнесы эсь прянц, ёмлалгофтови, а кие ёмлалгофтсы эсь прянц, ся оцюлгофтови».

Иисус бславасыне иттнень

¹⁵ Иисусонди вятнесть-каннесть ёмла иднят – токафтолезе Сон тейст кяденц. Тонафниенза, тянь няезь, карнезь сашендомда.

¹⁶ Но Иисус серьгядезень малазонза иттнень, мярьгсь: «Катк иттне сашендыхть Тейне, тясть карне, сяс мес тяфтамста ащи Шкаень Оцязорксшись.

¹⁷ Видеста корхтан тейнть: кие идь лаца аф васьфтьсы Шкаень Оцязорксшить, ся аф сувави эзонза».

Козя оцюня

¹⁸ Оцюнятнень эзда фкясь кизефтезе Иисусонь: «Цебярь тонафты, мезе тейне тиемс пефтома эряфонь сатоманкса?»

¹⁹ Иисус мярьгсь тейнза: «Мес тон лемнесамак Монь цебярькс? Шкайда башка кивок аф цебярь.

²⁰ Содасайть кошардомвалхнень: тят полафне пола, тят шавонда, тят сала, тят васькафне лиянь лангс, ванк аляцень и тядяцень мяльснон».

²¹ Сон мярьгсь: «Сембонь тянь пяшкотькшнеса одстокиге».

²² Тянь кулемста Иисус мярьгсь тейнза: «Нинге фкя аф сатни тейть, мик сембе уликс-пароцень и явк ашуфненди, и кармай улема козяшице менельса; сяльде сак и мольхть мельган».

²³ Тянь кулемста оцюнясь пичедезевсь, сяс мес пяк козяль.

²⁴ Иисус няезе пичедеманц, мярьгсь: «Конашкава стака козятненди сувамс Шкаень Оцязорксшити!

²⁵ Козя ломанти пяк стака сувамс Шкаень Оцязорксшити, сяда тёждя ишимти ётамс салмокс пиленява».

²⁶ Тянь кулиенза мярьгсть: «Кие эста идеви?»

²⁷ Сон каршезост: «Мезе аф тиеви ломаттненди, ся тиеви Шкайти».

Иисусонь мельге молемать питнец

²⁸ Пётр мярьгсь: «Вов минь кадоськ семботь, мезеньке ульсь, и туме мельгат».

²⁹ Иисус мярьгсь: «Видеста корхтан тейнть: эрсь, кие кадозе кудонц, али рьванц, али брадонзон, али тядянзон-алянзон, али идензон Шкаень Оцязорксшить инкса,

³⁰ сянди тяниень пингть максови ламоксть сяда лама, а сай пингть – пефтома эряфсь».

Иисус тага азонды Эсь куломанц колга

³¹ Иисус сявозень ширеняв кемгафтува тонафниензон, мярьгсь тейст: «Вов, минь мольхтяма Иерусалиму, и тоса тиеви сембось, мезе сёрматф пророкнень вельде Ломанень Цёрать колга.

³² Сонь макссазь лия ломаньтналоннетнень кядьс, кармайхть пеедема лангсонза, сялдомонза, сельгондьсазь,

³³ кармайхть пикссемонза и шавсазь; и колмоце шиня Сон вельмай кулофнень эзда».

³⁴ Но тонафнихне азфть эзда мезевок ашесть шарьхкоде. Ня валхнень смузьсна кяшфоль эздост, синь ашезь шарьхкоде, мезень колга Иисус корхтай тейст.

Иисус пчкафтсы сокор анцить

³⁵ Мзярда Иисус малаткшнесь Иерихонти, ки трваса озафоль сокор анци.

³⁶ Сон кулезе: ваксканза ётай лама ломань, и кизефтсь: «Мезе тя тяфтамсь?»

³⁷ Тейнза азозь: «Тя моли Назаретонь Иисуссь».

³⁸ Эста сон кармась ювадема: «Иисус, Давидонь Цёрац, ужяльдемак монь!»

³⁹ Инголе молихне карнезь юватькшнемда, аньцек сон сядонга кайгиста пешкодсь: «Давидонь Цёрац, ужяльдемак монь!»

⁴⁰ Иисус лоткась и мярьгсь вятемс сонь малазонза. Мзярда сокорсь нежедсь Тейнза, Иисус кизефтезе сонь:

⁴¹ «Мезе мяльце тифтемс Монь кядьстон?» Ся мярьгсь: «Азор, тиемак меки няикс!»

⁴² Иисус мярьгсь тейнза: «Няйхть! Кемамаце пчкафтонзе тонь».

⁴³ Сокорсь эстокиге кармась няема и, Шкаень шназь, тусь Иисусонь мельге. Сембе ломаттне, кит няезь тянь, азондсть Шкайти шнамань валхт.