Лука 17 - Од Соткс Новый Завет на мордовском-мокша языке 2016

Пежес вяти мялень саламатнень колга и пежень нолдамать колга

¹ Иисус мярьгсь тонафниензонды: «Пежес вяти мялень саламатне сякокс сайхть, но кальдяв ули сянди, кинь вельде синь сайхть.

² Кие вяти пежес хуш фкя лафча ломань – сянди сяда пара улель, кда кргазонза повфтальхть яжама кев и ёрдалезь оцюведьс.

³ Ванода эсь мельгант. Тиендяряй малавиксце каршезт пеже, азк тянь тейнза, каендандяряй, нолдак пеженц.

⁴ Шити сисемксть тиендяряй тейть кальдяв и сисемксть эняльдезь мярьги: "Каендан", – нолдак пеженц».

Кемамать колга

⁵ Апостолхне мярьгсть Азорти: «Касфтк кемаманьконь!»

⁶ Азорсь мярьгсь: «Кда тинь кемаманте улель хуш горчицань видьмоняшка и тинь мярьголеде тя оцю шуфтти: "Таргак эсь пряцень юрнек и озафтк оцюведьс", эста сон кулхцондоледязь».

Покодити тиема ся, мезе тейнза максф тиемс

⁷ «Мярьктяма, ёткстонт киньге ули покодиец, кона сокай пакся али ваны учат. Паксяста мрдамстонза кали мярьктяда тейнза: "Куроконе озак шра ваксс"?

⁸ Меколанкт, афоли мярьгат тейнза: "Аноклак тейне илядень ярхцама и перьфцень карксазь, якак мельган, мзярс симан-ярхцан, а тонць симат-ярхцат меле".

⁹ Тон вдь аф азат покодицти сюконяма сянкса, мезенди сон кошартфоль?

¹⁰ Тяфта тиньге, мзярда пяшкодьсасть семботь, мезьс кошардодязь, мярьгода: "Минь аньцек покодихтяма, и тиеськ сянь, мезе тейнек эрявсь тиемс"».

Иисус пчкафты наксафты урмаса сяряди кемонь алят

¹¹ Иерусалиму молемста Иисус ётась Самариять и Галилеять ёткова.

¹² Фкя вели сувамста каршезонза повсть наксафты урмаса кемонь сярядихть, конат лоткасть эздонза ичкозиня.

¹³ Синь ювадсть: «Иисус, Тонафты, ужяльдемасть!»

¹⁴ Няемстост Иисус мярьгсь тейст: «Арда, няфтеда пря озксвятихненди». Молембачк синь аруясть урмадост.

¹⁵ Ёткстост фкясь, пчкаманц няемста, мрдась и вярьгак вайгяльхть шназе Шкайть.

¹⁶ Сон прась Иисусонь пильгс и кармась сюконямань азондома. Тя ульсь Самариянь эряй.

¹⁷ Эста Иисус мярьгсь: «Дяряй аф кемонненть пчкяде? А косот лядыкс вейхксотне?

¹⁸ Дяряй конацка эздост ашезь мрда Шкайть шнама, Самариянь эряйда башка?»

¹⁹ Иисус мярьгсь тейнза: «Стяк, архт, кемамаце пчкафтонзе тонь».

Шкаень Оцязорксшить самац

²⁰ Фарисейхне кизефтезь Иисусонь: «Мзярда сай Шкаень Оцязорксшись?» Сон каршезост мярьгсь: «Шкаень Оцязорксшить саманц аш кода няемс.

²¹ Сяс кивок аф мярьги: "Вов сон, тяса" али "Вов тоса". Вдь Шкаень Оцязорксшись ни тинь ётксонт».

Ломанень Цёрать сама шиц

²² Сяльде Иисус мярьгсь тонафниензонды: «Сай стама пинге, мзярда тинь кармай оцю мяленте няемс Ломанень Цёрать хуш фкя шинц, но аф няйсасть.

²³ Мярьгихть тейнть: "Сон тяса" али "Сон тоса" – ащеда вастсонт, тяда лаське корхтайть мельге.

²⁴ Кода ёндолсь кфчядемста валдоптсы менельть педа-пес, тяфтамкс ули Ломанень Цёраське сама шистонза.

²⁵ Но Тейнза тяда инголе сави кирдемс лама маятамада, и тяниень пингонь ломаттне аердыхть эздонза.

²⁶ Кода ульсь Ноень пингста, стане ули Ломанень Цёрать пингстонга.

²⁷ Ломаттне ярхцесть, симондсть, рьвяйсесть, лисендсть рьвакс – и тяфта ульсь ся шить самс, мзярс Ной изь сува оцю венчезонза, а сяльде сась оцюдонга оцю шадось и юмафтозе семботь.

²⁸ Стане ульсь Лотонь пингстонга; ярхцасть, симсть, рамсесть, мишендсть, видесть, путнесть кутт.

²⁹ Но ся шиня, мзярда Лот лиссь Содомста, тусь менельста толонь и палыкандоронь пизем и машфтозень сембонь.

³⁰ Тяфта ули ся шистонга, мзярда эвондай Ломанень Цёрась.

³¹ Ся шиня, кие ули кудбряса, а паршиц кудса, ся тяза яка сявомост; кие ули паксяса, тяза мртце меки.

³² Лятфтасть Лотонь рьванц!

³³ Кие ёрай ванфтомс эсь эряфонц, ся юмафтсы сонь; а кие юмафтсы эряфонц, ся ванфтсы сонь.

³⁴ Азондса тейнть: ся веня кафта ломаттне улихть фкя удома вастса: фкясь сявови, омбоцесь кадови.

³⁵ Кафта ават кармайхть марса яжама: фкясь сявови, а омбоцесь кадови.

³⁶ Кафта алят улихть паксяса: фкясь сявови, омбоцесь кадови».

³⁷ Эста тонафниенза кизефтезь Сонь: «Азор, коса тя ули?» Сон мярьгсь тейст: «Коса кулофсь, тоза пуромихть ловажада ярхцай нармоттневок».