Лука 14 - Од Соткс Новый Завет на мордовском-мокша языке 2016

Иисус пчкафтсы сяряди алять ваймамань шиня

¹ Весть, ваймамань шиня Иисус сась фарисейхнень оцюняснон пяли ярхцама. Сембе, кит ульсть тоса, ванцть мельганза.

² Иисусонь каршеса озафоль сяряди ломань, конань марнек ронгоц ульсь таргозьф.

³ Иисус шарфтсь фарисейхненди и койти тонафтыхненди и кизефтезень: «Мярьгондеви пчкафнемс ваймамань шиня али аф?»

⁴ Синь ашесть кашторда. Эста Иисус токафтозень кядензон сярядити, пчкафтозе и нолдазе сонь.

⁵ Сяльде Сон мярьгсь тостотненди: «Ёткстонт киньге цёрац али букац прандяряй эшис, кали аф эстокиге таргасы, улендяряза тя шись ваймамань ши?»

⁶ Тянь каршес синь ашесть му валхт.

Тяк оцюлгофне пряцень

⁷ Иисусонь сельмопрязонза повсь, кода инжикс тертьфне кочксесть эстейст шра ваксса сембода цебярь васттнень. И Сон азондсь тейст валвеляфкс:

⁸ «Мзярда тонь терттядязь рьвяямань илас, тят озсе сембода цебярь вастс. Кда кивок тертьфнень ёткста лувови тондедот оцю инжикс,

⁹ эста кудазорсь, кона тердедязь тоньге и соньге, малады и мярьги тейть: "Шамтк тейнза тя вастть"; и эста визьксонь марязь, тейть сави озамс сембода кальдяв вастти.

¹⁰ Мзярда тонь терттядязь инжикс, сак и озак мекольце вастти, катк серьгядице малады и мярьги: "Ялгай, озак сяда инголи"; эста кеподеват лядыкс инжихнень сельминголе.

¹¹ Эрсь, кие оцюлгофнесы эсь прянц, ёмлалгофтови, а кие ёмлалгофнесы эсь прянц, ся оцюлгофтови».

¹² Иисус мярьгсь кудазорти: «Мзярда срхкафнят шиньгучкань али илядень ярхцама, тят терне аф ялгат, аф братт, аф эсь юромоннет, аф козя шабрат, сяс мес тяда меле синьге терттядязь тонь и тяфта пандсазь пароцень.

¹³ Мзярда тият оцю ила, тертть ашуфт, кядьфтомот-пилькфтомот, шаморхт, сокорхт,

¹⁴ эста улят павазу, сяс мес тейст аф пандови пароце. Тя пандови тейть, мзярда видексшинь ломаттне вельмафтовихть кулофста».

Валвеляфкс оцю каванямань колга

¹⁵ Тянь кулемста инжихнень ёткста фкясь мярьгсь Иисусонди: «Павазу ся, кие Шкаень Оцязорксшиса суски кшида!»

¹⁶ Иисус мярьгсь тейнза: «Фкя ломанць тись оцю каваняма и тердсь лама инжи.

¹⁷ Мзярда сась шра ваксс озама пингсь, сон кучезе покодиенц тертьфненди азомонза: "Сада, сембось ни анок".

¹⁸ И тяса синь сембе фкя лаца кармасть вешендема аф молеманди туфталхт. Васенцесь мярьгсь тейнза: "Рамань мода, эряви молемс ваномонза; эняльдян, тят кяжия".

¹⁹ Омбоцесь мярьгсь: "Рамань кемонь букат и молян тевса варжамост; эняльдян, тят кяжия".

²⁰ Колмоцесь мярьгсь: "Мон рьвяянь, сяс аф молеван".

²¹ Мрдамста покодиец тянь азондозе азоронцты. Эста азорсь кяжиясь и мярьгсь покодиенцты: "Архт куроконе ётак ошень ульцятнень и курнятнень ланга, и вятить сей ашуфнень, кядьфтопнень-пилькфтопнень, шаморхнень и сокорхнень".

²² Покодиец мрдась и мярьгсь: "Азор, тиф кода мярьготь, и нинге лядсть вастт".

²³ Азорсь мярьгсь покодити: "Архт, ётак кигава и перяфкснень кувалма, кошардыть сембонь самс, пяшкодеза кудозе.

²⁴ Корхтан тейнть: кивок инголи тертьфнень эзда аф озай шразень ваксс! Вдь лама тертьфта, но кржа кочкафта"».

Иисусонь мельге молемать питнец

²⁵ Иисусонь мархта мольсь лама ломань. Сон шарфтсь тейст и мярьгсь:

²⁶ «Кие сашенды Тейне, а Мондедон пяк кельгсыне алянц и тядянц, рьванц и идензон, брадонзон и сазоронзон, нльне эсь эряфонцка, ся аф улеви Тейне тонафникс;

²⁷ кие аф кандсы эсь крёзонц и аф моли Монь мельган, ся аф улеви Тейне тонафникс.

²⁸ Кие эздонт, ёрамок путомс башня, васенда аф озай и аф лувсыне карьхцнень, саты али аф ярмакоц сонь аделамс.

²⁹ Афток, путондяряй кудъюр, а башнясь аф стяфтови, эста тянь няиенза ушедыхть рахсемонза

³⁰ и корхтама: "Вов ломань, ушедсь тев и аделамонза ашезь машта".

³¹ Оцязорське, кона срхкась лия оцязоронь каршес тюрема, улема, васенда озай и арьсесы: кирди сон али аф кемонь тёжянь ушманонзон мархта сянь каршес, кие сай лангозонза комсь тёжяньца.

³² Кда аф кирди, эста кучи тейнза ломатть ётконь ладяма, мзярс ся нинге ичкозе.

³³ Тяфта эрсь эздонтка, кда аф аерды сембонц эзда, мезец ули, аф улеви Тейне тонафникс.

³⁴ Салсь – цебярь парши, аньцек юмафтондярясы таньфонц, кода тисак меки сонь салукс?

³⁵ Эста сон мезендинге аф эряви, нльне модань петемска аф ладяй. Сонь ёрдасазь ушу. Кинь улихть кули пиленза, ся катк кульсы!»