Лука 13 - Од Соткс Новый Завет на мордовском-мокша языке 2016

Аф шарфтондярятада Шкайти – юматада

¹ Тя пингть Иисусонди састь ломатть и азондсть Галилеянь эряйхнень колга, конатнень Пилат шавфтозень Шкаень кудса, и синь верснон шовордазе озксказненди печкф жувататнень верснон мархта.

² Иисус тянь каршес мярьгсь: «Арьсетяда, Галилеянь ня эряйхне ульсть Галилеянь сембе эряйхнень коряс сяда пежуфт, и сяс мархтост тяфта лиссь?

³ Аф, корхтан тейнть. Но аф шарфтондярятада Шкайти, сембе юматада, кода синь.

⁴ Афоли тинь арьсетяда, ся кемгафксува ломаттне, конатнень лангс прась Силоамонь башнясь и шавозень синь, Иерусалимонь сембе эряйда муворуфтольхть?

⁵ Аф, корхтан тейнть. Но аф шарфтондярятада Шкайти, сембе юматада, кода синь».

Валвеляфкс иможфтома шуфтть колга

⁶ Иисус азондсь тейст валвеляфкс: «Фкя ломанть пересонза кассь смоква шуфта. Сон сась лангстонза иможень кочкама, но имошт ашезь му.

⁷ Сон мярьгсь виноградонь касфтыти: "Мон колмоце кизось сашендан тя смоква шуфтти иможенкса, а имошт аш. Керк сонь! Мезенди юмафнесы модать?"

⁸ Ся каршезонза мярьгсь: "Азор, катк нинге фкя кизос, мон шувса перьфонц и ацаса назёмса.

⁹ Пади сай кизоть канды имошт; аф кандондяряй – керсак"».

Иисус пчкафтсы кичкорготф авать ваймамань шиня

¹⁰ Иисус тонафтсь ваймамань шиня фкя синагогаса.

¹¹ Тоса ульсь кичкорготф ава, сон прокс ашезь машта видемомс. Авать эсонзоль аф ару ваймопожф, кона кемгафксува киза кирдезе сонь урмапотмоса.

¹² Иисус няезе сонь, тердезе малазонза и мярьгсь: «Ава, тон мянеть урмацень эзда».

¹³ Сон путозень лангозонза кядензон; авась эстокиге видемсь и кармась шнамонза Шкайть.

¹⁴ Синагогань оцюнясь кяжияфтсь, мес Иисус пчкафтозе авать ваймамань шиня. Сон мярьгсь ломаттненди: «Покодеманди максф кота шит, ся шитнень сашендода пчкафтома, а аф ваймамань шиня».

¹⁵ Но Азорсь каршезонза мярьгсь: «Шамафксонь канни! Дяряй аф эрсь ёткстонт юкссекшнесы буканц али осёлонц ваймамань шиня и вятнесы симома?

¹⁶ Кали Авраамонь тя стиренц, конань ни кемгафксува киза сотнезе Сатанась, афоль эряв нолдамс ня тярттнень эзда ваймамань шиня?»

¹⁷ Ня валхнень азомда меле, сембе каршек молихне визделгодсть; сембе лия ломаттне кеняртькшнесть Сонь оцю тевонзон инкса.

Валвеляфкст горчицань видьмонять и шапафтомать колга

¹⁸ Иисус мярьгсь: «Мезень лангс шары Шкаень Оцязорксшись, мезть мархта ладяса?

¹⁹ Сон шары горчицань видьмоняти, конань ломанць сявозе и озафтозе перезонза; сон кассь, арась оцю шуфтокс, и нармоттне тиендсть тарадонзон ёткс пизот».

²⁰ Нинге Иисус мярьгсь: «Мезть мархта ладяса Шкаень Оцязорксшить?

²¹ Сон кода шапафтома, конань авась шовордазе колма парне почф мархта, и сонь эздонза кеподсь сембе шапакссь».

Тяйня кенкш

²² Иисус тонафтозь ётнесь ошева и велева. Сон кирдезе кинц Иерусалиму.

²³ Фкя ломань кизефтезе Сонь: «Азор! Дяряй аф ламотне идевихть?» Иисус мярьгсь тейст:

²⁴ «Сембе виень путозь варжасть сувамс тяйня ортава, сяс мес, корхтан тейнть, ламотне тяряфтыхть сувамс и аф сувавихть.

²⁵ Сай пинге, мзярда кудазорсь стяй и пякстасыне кенкшнень, и эста тинь, уша ширеса ащезь, карматада чакама кенкшти и корхтама: "Азор! Азор! Панчк тейнек!" Но Сон мярьги каршезонт: "Аф содатядязь, китяда и костоннетяда тинь".

²⁶ Эста карматада корхтама: "Минь симоме-ярхцаме мархтот, и Тон тонафтоть минь курняванок".

²⁷ Но Сон мярьги: "Корхтан тейнть: аф содатядязь, китяда и костоннетяда тинь; ворьда маластон сембе тинь, зиянонь тиендихне!"

²⁸ Тоса ули авардема и пеень мчкорфтома, мзярда тинь няйсасть Авраамонь, Исааконь, Иаковонь и сембе пророкнень Шкаень Оцязорксшиса, а эсь прянтень ушу паньфста.

²⁹ И сайхть ломатть шинь стяма и шинь валгома ширде, кельме ширеста и лямбе ширеста, и озайхть илань шрать перьф Шкаень Оцязорксшиса.

³⁰ Эста ламотне, конат тяни мекольцет, улихть васенцет, и ламотне, конат тяни васенцет, улихть мекольцет».

Иисусонь ризнай седиец Иерусалимть инкса

³¹ Ся ёткть састь мзярошка фарисейхть и мярьгсть Иисусонди: «Тейть эряви тумс тяста, Ирод ёрай шавомдот».

³² Сон мярьгсь тейст: «Арда и азость тя келазти: "Мон карман панцема кяжи ваймопожфт и пчкафнема ломатть тячи, ванды, а колмоце шиня шумордаса Эсь тевозень".

³³ Но тячи и ванды и тяда мельдень шить Тейне поладома кизе, вдь аш стама пророк, конань шаволезь аф Иерусалимса.

³⁴ Иерусалим, Иерусалим! Пророкнень шавондысна и тейть кучфнень кевса пикссисна! Мзярксть Мон ёрань кочкамс тонь эряйхнень, кода нармонць кочксесыне эсь пацянзон алу лефксонзон, но тинь ашель мяленте!

³⁵ И вов, тинь кудонте кадови шава! Корхтан тейнть: тинь аф няйсамасть Монь ся пингть самс, мзярс аф мярьктяда: "Бславаф Азорть лемса Сайсь"».