Лука 12 - Од Соткс Новый Завет на мордовском-мокша языке 2016

Ванфтода пря шамафксонь каннемада

¹ Ся пингоня пуромсь лама тёжянь ломань, мянь люпштасть фкя-фкянь. Иисус пшкядсь васенда тонафниензонды: «Ванфтода пря фарисейхнень шапафтомадост, лиякс мярьгомс, шамафксонь каннемада.

² Сембе кяшфсь лиси лангти, и сембе салаваннесь арай содафокс.

³ Сяс, мезе тинь азоде шобдаса, сянь кульсазь валдса; мезе корхтасть пилес кудботмоса, сянь ювадьсазь кудбряста.

Шкайда пельхть, а аф ломаньда

⁴ Корхтан тейнть, Эсь ялганенди: тяда пеле ронгонь машфтыда, конатненди тяда меле лия мезевок аф тиеви.

⁵ Мон азса тейнть кида пелемс: пеледа Сянь эзда, кинь ули виец ронгонтень шавомда меле ёрдамс тинь аду. Видеста корхтан тейнть, Сянь эзда пеледа.

⁶ Кали вете кирьхксне мишендевихть аф кафта трёшникта? И эздост фкяське аф юкстаф Шкайть сельмоса.

⁷ А тинь прясонт сембе шяярьнятневок лувфт. Сяс тяда пеле: тинь сяда питнихтяда сембе кирьхкснень коряс».

Кемамацень панжеманц-азоманц колга

⁸ «Корхтан тейнть: ся, кие ломаттнень инголе лувсы и лемдьсы эсь прянц Моннекс, сянь Ломанень Цёраське Шкаень ангелхнень инголе лувсы и лемдьсы Сонценнекс.

⁹ А кие потай Монь эздон ломаттнень инголе, сянь эзда Монга потан Шкаень ангелхнень инголе.

¹⁰ Эрсь, кие сялдсы Ломанень Цёрать, сянь пежец нолдави; а кие сялдсы Иняру Ваймопожфть, сянь пежец аф нолдави.

¹¹ Мзярда тинь вяттядязь синагогас, оцюнятненди и прятненди, тяда пичедь, кода араламс пря и мезе корхтамс.

¹² Ся пингть Иняру Ваймопожфсь тонафттядязь, мезе эряви корхтамс».

Валвеляфкс ёньфтома козя алять колга

¹³ Ломаттнень ёткста кати-кие мярьгсь Иисусонди: «Тонафты! Азк брадозти, катк явсы мархтон тядянь-алянь эзда лятф уликс-пароньконь».

¹⁴ Иисус мярьгсь: «Ожу, а кие путомань Монь тейнть судьякс и уликс-паронтень явикс?»

¹⁵ Сяльде пшкядсь сембонди: «Ванода, ванфтода пря козяшити прафтомада, сяс мес ломанть эряфоц ащи аф козяшить эзда, кодама оцю сон афоль уле».

¹⁶ Иисус азондсь тейст валвеляфкс: «Фкя козя алять паксясонза шачсь лама сёра.

¹⁷ Сон арьсесь эсь пачканза: "Мезе тейне тиемс? Аш коза марамс сёрозе".

¹⁸ И эста сон мярьгсь: "Вов мезе тиян, синнесайне утомнень и путан вастозост оцюфт, и мараса эзост марнек сёрозень и марнек паршизень.

¹⁹ Эста мярьган эстейне: тяни тонь мезьце аньцек аш, уликсце саты лама кизонди. Ваймосек, ярхцак, сипть, кеняртькшнек эряфти!"

²⁰ Аньцек Шкайсь мярьгсь тейнза: "Ёньфтома! Тяка веня тонь ваймоцень сявсазь. Кинди ина ляды сембось ся, мезе кочкать?"

²¹ Тяфта уленди эрь ломанть мархта, кие кочкай козяши эстейнза, а аф Шкайса козякоды».

Васендакиге вешендеда Шкаень Оцязорксши

²² Иисус мярьгсь тонафниензонды: «Сяс корхтан тейнть: тяда пичеде эряфонтень инкса: мезьда тейнть ярхцамс и мезьса щамс ронгонтень.

²³ Ваймось ярхцамбяльда питни, ронгсь – щамда.

²⁴ Варжакстода кранчнень лангс: синь аф видихть, аф нуйхть, аш потмарсна, аш утомсна, и Шкайсь андсыне синь. А тинь ламода сяда питнихтяда нармоттнень коряс.

²⁵ Ина кие эздонт, пичедезь, машты кувалгафтомс эряфонц хуш фкя частонди?

²⁶ Тяфта, кда тя анцяйняське тейнть аф тиеви, эста месть лажнатада лиянкса?

²⁷ Ванода панчфнень лангс, кода синь касыхть: аф покодихть, аф кштирдихть. Аньцек корхтан тейнть, Соломонга эсь козяшинц вандолфса ашезь щакшне тяфта мазыста, кода эрь панчфсь.

²⁸ Кда Шкайсь тяфта щасы тишеть, кона тячи касы паксяса, а ванды ули ёрдаф пянакудс, эста дяряй Сон аф щатядязь тинь? Вай, конашкава ёмла тинь кемаманте!

²⁹ Сяс тяда вешенде мезьда тейнть ярхцамс, мезьда симомс, и тяда пичеде тянкса.

³⁰ Вдь семботь тянь вешендьсазь тя масторлангонь ломаттне; а тинь Алянте содасы, мезе тейнть эряви.

³¹ Но вешендесть Шкайть Оцязорксшинц, и сембось тявок максови тейнть.

³² Тят пеле, ёмла стада, вдь Алянтень ули паромялец максомс тейнть Оцязорксши.

³³ Мишендесть уликсонтень и лездода ашуфненди. Аноклада эстейнть ярмаконь путомс кяскавнят, конат аф каладыхть; кочкада эстейнть аф юмафтови козяши менельса, коза салайсь аф маладови и коса ки мелавсь аф пори.

³⁴ Вдь коса козяшинте, тоса ули седиентевок».

Покодись, кона учсы азоронц саманц

³⁵ «Най уледа анокт: щамонте улест карксафт, толонте крьвястьфт.

³⁶ Уледа сятнень лаца, конат учендсазь азорснон мрдаманц рьвяямань иласта, синь анокт эстокиге панжемс азорти, кодак ся сай и чакай кенкшти.

³⁷ Павазуфт ся покодихне, конатнень азорсь мрдамстонза сатсыне аф удозь. Видеста корхтан тейнть, азорсь карксасы перьфонц и озафтсыне синь шра ваксс, кармай каванямост.

³⁸ Павазуфт ся покодихне, конатнень азорсь сатсыне аф удозь, мзярса сон афоль мрда, пялеветь али варьхмодемста.

³⁹ Тейнть содаф тя: содандярялезе кудазорсь, конашкада сай салайсь, эста сон афоль мада и афолезе нолда салайть кудозонза.

⁴⁰ Тиньге уледа анокт, сяс мес Ломанень Цёрась сай ся пингоня, мзярда тинь аф учсасть Сонь».

⁴¹ Эста Пётр кизефтезе: «Азор, тя валвеляфксть азондыть аньцек тейнек али сембонди?»

⁴² Азорсь мярьгсь: «Уледа ёню и кулхцонды кудвятить лаца, конань азорсь апак пельхть путозе сембе покодиензон лангс оцюнякс и кошардозе эрявикс пингста явондомс тейст ярхцамбяльть.

⁴³ Павазу ся покодись, конань азороц мрдамстонза сатсы тяфта тиендикс.

⁴⁴ Видеста корхтан тейнть: кудазорсь путсы сонь оцюнякс марнек уликс-паронц лангса.

⁴⁵ Мярьгондяряй сяка покодись седиге: "Аф курок сай азорозе", и ушеды пикссемост покодихнень, аванек-алянек, кармай ярхцама, симома иредемозонза,

⁴⁶ эста сай азороц ся шиня, мзярда сон аф учсы, и ся ёткть, мзярда сон аф арьси саманц колга. Азорсь пялева керсы сонь и ёрдасы аф кемайхнень ёткс.

⁴⁷ Ся покодись, кона содазе азоронц мяленц, и ашезе пяшкоде сонь, ули пяк пиксф.

⁴⁸ А ся, кона ашезе сода азоронц мяленц и тись мезевок стама, мезенкса пиксомаль, пиксови аф пяк. Кинди лама максф, сянь кядьста лама кизефтеви; кинь лангс лама надияфтови, сянь кядьста сяда лама вешеви».

Иисус арай явоманди туфталкс

⁴⁹ «Мон сань толонь кандома модать лангс, и конашкава мялезе – крьвязеза ни сон!

⁵⁰ Тейне сави кстиндафтомс пря маятамань кстиндамаса; конашкава стака Тейне, мзярс сон аф тиеви!

⁵¹ Тинь арьсетяда, Мон сань модать лангс сетьмошинь кандома? Аф! Мон сань явомань кандома.

⁵² Тя пингста сявомок, фкя кудонь вете ломаттне явихть эсь ётковаст: колмотне арайхть кафттнень каршек, и кафттне колмотнень каршек;

⁵³ алясь кармай молема цёранц каршек, цёрась алянц каршек; тядясь стиренц каршек, стирсь тядянц каршек; авозсь рьвянянц каршек, рьвянясь авозенц каршек».

Пингть тяштьксонза

⁵⁴ Иисус мярьгсь ломаттненди: «Мзярда няйхтяда ковол, кона кеподи шинь валгома ширде, эстокиге мярьктяда: "Ули пизем"; стане и уленди.

⁵⁵ Мзярда уфай лямбе ширдень варма, тинь мярьктяда: "Пси ули"; стане и уленди.

⁵⁶ Шамафксонь каннихть! Тинь модать и менельть лангс ваномста машттада содамонза, кодама ули ушесь, а кодама сась тяни пингсь – тянь шарьхкодема аф машттада.

Ладяк каршек молицень мархта

⁵⁷ Мес ина эстейнть аф арьсеви, мезсь виде, а мезсь аф?

⁵⁸ Мзярда тон срхкать судс каршек молицень мархта, ки кувалмова путк сембе вийцень мархтонза ладяманкса, афток сон вяттянза судьяти, а судьясь макстанза ванфтыти, а ванфтысь ёрдатанза пякстамгудс.

⁵⁹ Корхтаса тейть: аф лисеват тоста, мзярс аф пандсак сембе шумоцень трёшниконьбес».