Лука 10 - Од Соткс Новый Завет на мордовском-мокша языке 2016

Иисус кучи сизьгемонь тонафни

¹ Тяда меле Азорсь кочкась нинге сизьгемонь тонафни и кучезень синь кафтонь-кафтонь эстедонза инголи сембе ся ошева и вастова, коза Сонцьке ёрась молемс.

² Сон мярьгсь тейст: «Нумада лама, а покайда кржа; ина эняльдеда нумать Азоронцты, кучеза сёронь кочкайхть Эсь паксянц лангс.

³ Арда! Мон кучтядязь тинь, кода вероснень врьгаснень ёткс.

⁴ Тяда сявонде аф кяскавне ярмаконди, аф канкс, аф омбонц карьсембяльхть, и ки кувалма киньге мархта тяда лотксе шумбракснема.

⁵ Мзярда суватада киньге кудс, васенда арьседа кудстотненди сетьмоши.

⁶ Улендяряй тоса сетьмошинь эряфс кондясти ломань, эста тинь сетьмошинь арьсеманте иляды тейнза. Кда аш тяфтама ломань, эста мрдай меки эстейнть.

⁷ Илядода ся кудса, симода-ярхцада мезьсна ули, сяс мес покайти пандыхть тиф покодеманц инкса. Тяда яка кудста кудс.

⁸ Сандярятада кодамонга ошс и тинь васьфтядязь тоса, ярхцада, мезе максыхть.

⁹ Пчкафнесть тостонь сярядихнень, азость сембонди: "Шкаень Оцязорксшись маласонт".

¹⁰ Сандярятада кодамонга ошс и аф васьфттядязь, эста ётада курняваст и азость:

¹¹ "Нльне пультьке, кона педсь пильгозонк ошсонт, шукадьсаськ ширесонт, но содасть: Шкаень Оцязорксшись маласонт".

¹² Азса тейнть, Содом ошти судонь шиня ули сяда тёждя тя ошть коряс».

Иисус апрякасыне Галилеянь ошнень Шкайти аф шарфтоманкса

¹³ «Кальдяв тейть, Хоразин ош! Кальдяв тейть, Вифсаида ош! Кда ня вии тефне, конат няфтьфтольхть тинь ётксонт, улельхть няфтьфт Тирса и Сидонца, ня ошэряйхне ризнамань щамса и кулуса почетфста кунаркиге шарфтольхть эсь пежеснон эзда.

¹⁴ Но Тирти и Сидонти судонь шиня ули сяда тёждя тинь корязонт.

¹⁵ И тон, Капернаум ош, арьсят, кепоттядязь менели? Аф, тон улят ёрдаф аду.

¹⁶ Тинь кулхцондыенте Монь кулхцондсамазь, и тинь эздонт аердысь Монь эздон аерды; а Монь эздон аердысь Монь Кучиезень эзда аерды».

Сизьгемонь тонафнихнень мрдамасна

¹⁷ Сизьгемонь тонафнихне мрдасть кеняртьфста и корхтасть: «Азор, кяжи ваймопожфневок кулхцондомазь, мзярда кошярясаськ Тонь лемсот!»

¹⁸ Сон мярьгсь тейст: «Мон няине Сатанать ёндолкс менельста праманц.

¹⁹ Вов, Мон максонь тейнть азорксши шятямс куень, скорпиононь лангс и азорксши сембе кальдяв вийхнень лангса, и мезеньге кальдяв синьцтост аф ули тейнть.

²⁰ Аньцек тяда кенярде сянди, мес кяжи ваймопожфне кулхцонттядязь; кенярдеда сянди, мес лемонте сёрматф менельса».

Шкайсь панжеви ломаттненди Цёрать вельде

²¹ Тя ёткть Иняру Ваймопожфсь пяшкодезе Иисусонь кенярдемада, и Иисус мярьгсь: «Аляй, менельть и масторть Азороц! Шнате Тонь сянкса, мес Тон кяшить тянь смузюфнень и шарьхкодихнень эзда и панжить тянь ёмла иттненди. Виде, Аляй, вдь тяфтама ульсь Тонь пара мяльце.

²² Иисус шарфтсь тонафниензонды и мярьгсь: Алязе семботь максозе Монь кядялон. Кие Цёрась, аф содасы кивок Аляда башка; и кие Алясь, аф содасы кивок Цёрада башка, и сяда башка, кинди Цёрась ёрасы панжемс Сонь».

²³ Сяльде Иисус шарфтсь тонафнихненди и мярьгсь аньцек тейст: «Павазуфт сельмотне, конат няйсазь сянь, мезе тинь няйхтяда!

²⁴ Азондса тейнть, ламоц пророкне и оцязорхне ёрасть няемс сянь, мезе тинь няйхтяда, и ашезь няе; ёрасть кулемс сянь, мезе тинь кульхтяда, и ашезь куле».

Валвеляфкс кельги седи Самариянь эряйть колга

²⁵ Вов, стясь койти фкя тонафтысь и ёрамок кундамс Иисусонь валса, мярьгсь: «Тонафты! Мезе тейне тиема пефтома эряфонь сатоманкса?»

²⁶ Иисус мярьгсь тейнза: «Мезе сёрматф койса? Кода лувсак?»

²⁷ Ся каршезонза: «Кельк Азорть, эсь Шкайцень, сембе седисот, сембе ваймосот, сембе вийсот, сембе шарьхкодемасот, и маластот ломанть, кода эсь пряцень».

²⁸ Иисус мярьгсь тейнза: «Видеста азыть; тяфта тиентть, и кармат эряма».

²⁹ Но койти тонафтыть мялецоль няфтемс: сон коень ванфты ломань, и сяс мярьгсь Иисусонди: «А кие монь маластонь ломанезе?»

³⁰ Тянь каршес Иисус мярьгсь: «Фкя алясь мольсь Иерусалимста Иерихону и повсь нельги-шавиень кядьс, конат каяфтозь щамонзон, пикссезь и тусть, кадозь пялес кулоста.

³¹ Лиссь тяфта, ся киге савсь ётамс фкя озксвятиенди. Сон няезе пикссефть и ётась ваксканза кить омбокова.

³² Стане тись левиеннеське: пачкодсь ся вастти, няезе пикссефть и ётась кить омбокс.

³³ Самариянь фкя эряйтьке киц прась тияне. Сон няезе пикссефть и тейнза ужялькс арась ломанць.

³⁴ Мольсь малазонза, керсеф-тапаф васттнень штазень винаса, вадезень вайса и сотнезень; сяльде озафтозе осёлонц лангс, ускозе инжиень куду и тоса якась мельганза.

³⁵ Омбоце шиня, тумстонза, сон таргась кафта динарийхть и максозень инжиень кудть азоронцты, мярьгсь тейнза: "Якак мельганза; ётафтондярят сяда лама, меки мрдамстон пандсайне".

³⁶ Кие ня колмотнень эзда, тонь койсот, лувови маластоннекс нельги-шавиень кядьс повф ломанти?»

³⁷ Койти тонафтысь мярьгсь: «Ся, кие ужяльдезе сонь». Эста Иисус мярьгсь тейнза: «Архт, тонга тяфта тиентть».

Марфа и Мария сазорхне

³⁸ Сяда тов киснон поладомста Иисус тонафниензон мархта лоткась фкя велес. Тяса фкя авась, Марфа, тердезе пялонза.

³⁹ Сонь ульсь сазороц Мария, кона озась Азорть пильгонзон ваксс и кулхцондозе Сонь корхтаманц.

⁴⁰ Марфа пульхксь каванямань шрать перьф. Сон маладсь Иисусонди и мярьгсь: «Азор, кали Тейть сембе сяка, мес сазорозе кадомань ськамон шаромс инжихнень перьфке? Азк тейнза, катк лезды тейне».

⁴¹ Иисус каршезонза мярьгсь: «Марфа! Марфа! Тон пичедят и пульхкат ламонкса,

⁴² а эряви аньцек фкя. Мария кочказе цебярь пяльксть, кона кядьстонза аф нельгови».