Лука 1 - Од Соткс Новый Завет на мордовском-мокша языке 2016

^1-3 Кельгома Феофил, Шкаень надияфтоматне пяшкодсть минь ётксонк и ламотне ушедсть сёрмадома тянь колга сятнень валснон коряс, конат ушетксстокиге няезь семботь тянь эсь сельмосост и конат арасть покодикс Шкаень валти, и пачфтезь тейнек семботь мезе ульсь. Сяс монга сань мяльс, ушетксста сявомок, анцяйняньбес тонафнемадон меле, азондомс тейть семботь тянь мельцек-мельцек.

⁴ Тя сядонга кемокстасы эсот ся тонафтомать видешинц, конанди тон тонафтфат.

Инголькиге азф кулясь Иоанн Кстиндайть шачеманц колга

⁵ Иродонь, Иудеянь оцязорть пингста эрясь Захария озксвятись, кона сувсесь Авиять озксвятиень кярьмазонцты. Сонь ульсь рьвац Елисавета, сявок Аарононь юромстоль.

⁶ Синь кафцьке видексшинь ломаттельхть Шкайть инголе, седишкава пяшкотькшнезь Азорть сембе кошардоманзон и мярьгоманзон.

⁷ Синь ашельхть идьсна, сяс мес Елисавета ульсь аф шачфтовикс, и кафцьке ни сиретольхть.

⁸ Весть, мзярда сась пинге Авиянь кярьмазонцты покодемс Шкаень кудса и Захария покодсь озксвятиень тевса Шкайть инголе, лиссь тяфта:

⁹ жерьбань вельде, кода фалу и явондовсть тефне озксвятихнень ёткова, Захариянди сатсь сувамс Азорть кудс качакофтома.

¹⁰ Качакофтомань пингть ломанень пуромкссь озондсь Шкаень кудть пирьфсонза.

¹¹ Эста качакофтомань алтарть види ширеса Захариянди эвондась Азорть ангелоц.

¹² Захария няемстонза абондсь и пяк эводсь.

¹³ Ангелсь мярьгсь тейнза: «Тят пеле, Захария, кульф тонь озондомаце: Елисавета рьвяце шачфты тейть цёра, и лемдьсак сонь – Иоанн.

¹⁴ Сон канды тейть оцюдонга оцю кенярдема. Ламотне кенярдихть сонь шачеманцты,

¹⁵ сяс мес сон ули пяк оцю Азорть инголе. Сон аф кармай симома винада и лия иретьфтида и тядянц потмостокиге пяшкоди Иняру Ваймопожфта.

¹⁶ Израилень ломаттнень эзда ламотнень шарфтсыне Азорти, синь Шкайснонды.

¹⁷ Сон сай Азорда инголи стамка ваймопожфса и стамка вийса, кодамса сашендсь Илия. Сонь мялец алятнень седиснон шарфтомс эсь идьснонды и аф кулхцодыхнень кошардомс арьсема видексшинь ломаттнень лаца: аральхть Азорти анок ломаньтналкс».

¹⁸ Захария мярьгсь ангелти: «Кода содаса – видет тонь валхне али аф? Мон сирян, рьвязевок эряфкшу».

¹⁹ Ангелсь каршезонза мярьгсь: «Мон Шкайть инголе ащи Гавриилсь. Мон кучфан мархтот корхтама и тя Пара кулять пачфтема.

²⁰ Ся, мезе тейть азонь, пяшкоди эсь пингстонза, но валненди аф кемаманкса илядат кяльфтома-валфтома и аф корхтават ся шить самс, мзярс сембось тя аф тиеви».

²¹ Тя ёткть ломаттне учендозь Захариянь и дивандакшнесть, мес сон куватьс кирневи Шкаень кудса.

²² Лисемда меле Захария ашезь корхтав мархтост; ломаттне шарьхкодсть: сон няйсь Шкаень кудса няйфкс. Захария няфнесь тейст кядьса-сурса и иляткшнесь кяльфтома-валфтома.

²³ Мзярда аделавсть озксвятемань шинза, сон мрдась эсь кудозонза.

²⁴ Курокста Елисавета рьвац пекиясь, и вете кофт ашезь лисенде ломань ёткс. Сон корхнесь:

²⁵ «Тянь Шкайсь тиезе тейне! Варжакстсь лангозон и сявозе лангстон ломанень сялдомать».

Инголькиге азф кулясь Иисусонь шачеманц колга

²⁶ Елисаветань пекиямда меле котоце ковть лангс Шкайсь кучезе Гавриил ангелть Галилеянь Назарет ошу,

²⁷ Мариянди, аляса апак токак стирти, конань ладязь максомс рьвакс Давидонь юромста Иосифонди.

²⁸ Ангелсь сась тейнза и мярьгсь: «Шумбрат! Тейть максовсь Шкайть эзда пароказне! Азорсь мархтот! Тон бславафат аватнень ёткса».

²⁹ Мариянь пяк абонтфтозь валонза, арьсезевсь: мезень колга корхтай тя шумбракстомась.

³⁰ Но ангелсь мярьгсь тейнза: «Тят пеле, Мария, Шкайсь макссь тейть пароказне;

³¹ вов пекият и шачфтат Цёра, лемдьсак Иисус.

³² Сон ули пяк оцю и лемдеви Инь Вярденнети Цёракс. Азор Шкайсь макссы Тейнза Давид атянь-атянц оцязоронь озама вастонц.

³³ Сон кармай оцязорондама Иаковонь юромонц, Израилень ломаньтналть лангса пефтома пингс, и Сонь оцязорондаманцты аф ули пе».

³⁴ Мария мярьгсь ангелти: «Кода тя ули, мзярда мон мирдьта аф содан?»

³⁵ Ангелсь каршезонза мярьгсь: «Иняру Ваймопожфсь сай лангозт, Инь Вярденнеть виец вельхтятанза тонь; сяс шачи Идняське ули иняру и лемдеви Шкаень Цёракс.

³⁶ Вов Елисаветавок, эсь юромонь ломаньце, тяни сиредембяльхть пекиясь, канни цёраня. Сон ни котоце ковть лангса, а лемневсь аф шачфтовикс!

³⁷ Шкайти аш аф тиеви тев».

³⁸ Эста Мария мярьгсь: «Мон Азорть урецан; улеза сембось стане, кода мярьготь». И ангелсь тусь маластонза.

Мария моли Елисаветань варжама

³⁹ Мзярошка шинь ётазь, Мария тусь ошу, кона ащесь панда лангонь Иудеяса.

⁴⁰ Сон сувась Захариянь кудс и шумбракстсь Елисаветань мархта.

⁴¹ Мзярда Елисавета кулезе Мариянь шумбракстоманц, потмосонза шерьхкозевсь иднясь; и Елисавета пяшкодсь Иняру Ваймопожфта.

⁴² Кайги вайгяльхть сон ювадсь: «Бславафат тон сембе аватнень ёткса, бславаф Идняське, конань каннесак потмосот!

⁴³ Киян мон тяфтамсь, тейне сась Азорозень тядяц?

⁴⁴ Ся ёткть, мзярда пачкодсь пилезон вайгяльце, потмосон кенярдезь шерьхкозевсь иднясь.

⁴⁵ Павазуват тон, кемайсь, сяс мес пяшкоди ся, мезе азфоль тейть Азорть пяльде».

Мария морай шнамань мор Шкайти

⁴⁶ Мария мярьгсь: «Седиезе шнасы Азорть,

⁴⁷ ваймозе кенярди Шкайть, монь Идиезень инкса,

⁴⁸ вдь Сон варжакстсь монь лангозон, Эсь сятяв уренц лангс. Тячиень шиста сембе пингонь ломаттне кармайхть лемнемон павазукс,

⁴⁹ вдь Вии Шкайсь тись тейне оцю тефт, и Сонь лемоц иняру.

⁵⁰ Сон сембе пинкнень максесы Эсь кельгозь ужяльдеманц сятненди, кит пелихть эздонза.

⁵¹ Сон тиезе вии тевть Эсь кядьсонза; Сон срафтозень прянь няихнень синь седиень арьсефснон мархта.

⁵² Сон валхтозень оцюнятнень азоронь вастстост и кеподезень сятяфнень.

⁵³ Вачедотнень пяшкодезень парода, а козятнень панезень шавонь кятть.

⁵⁴ Сон лездсь Израильти, Эсь покодиенцты, и мяляфтозе Эсь кельгозь ужяльдеманц,

⁵⁵ конань надияфтозе минь атянь-атяньконди, Авраамонди и сонь уноконь-уноконзонды пефтома пингс».

⁵⁶ Мария инжиендась Елисаветань пяле колмошка ков и тяда меле мрдась куду.

Иоанн Кстиндайть шачемац

⁵⁷ Елисаветанди сась пинге шачфтомс, и сон шачфтсь цёра.

⁵⁸ Шабранза и эсь ломаненза, мзярда кулезь конашкава Азорсь кельгозь ужяльдезе сонь, кеняртькшнесть мархтонза.

⁵⁹ Кафксоце шиня синь састь керомс иднять киськопенц, и ёразь лемдемс сонь алянц лемса, Захариякс.

⁶⁰ Иднять тядяц тянь каршес мярьгсь: «Аф, сон лемдеви Иоаннкс».

⁶¹ Тейнза корхтайхть: «Аш юромсонт ломань, кона каннель тяфтама лем».

⁶² Кизефтезь сурса-кядьса идть алянц, кода сонь мялец лемдемс.

⁶³ Сон анась седяфкя и лангозонза сёрмадсь: «Сонь лемоц Иоанн». Сембе дивандасть.

⁶⁴ Эстокиге панжевсь Захариянь кялец, и сон кармась корхтама, шнамонза Шкайть.

⁶⁵ Маласост сембе эряйхнень сявозень пелема; и азонкшнесть семботь тянь колга марнек Иудеянь панда лангонь масторга.

⁶⁶ Сембе кулихне путозь тянь седиезост и корхтасть: «Кикс ули тя иднясь?» Вдь Азорть виец ульсь сонь мархтонза.

Захария морай шнамань мор Шкайти

⁶⁷ Иднять аляц, Захария, пяшкодсь Иняру Ваймопожфта и пророчендась:

⁶⁸ «Шнама Азорти, Израилень Шкайти, сяс мес Сон сась и идезе Эсь ломаньтналонц.

⁶⁹ Сон кучезе тейнек виидонга вии Идить Давид покодиенц юромста,

⁷⁰ кода Сон азозе кунардонь пингстокиге Эсь иняру пророконзон вельде.

⁷¹ Сон идесамазь минь лангозонк моли душматтнень эзда и сембе аф кельгиеньконь кядьснон эзда.

⁷² Тяфта Сон кельгозь ужяльдьсыне минь атянь-атяньконь и мяляфтсы иняру сотксонц,

⁷³ максф валонц, конаса Авраам варась аляньконди.

^74-75 Тяфта Сон нолдасамазь минь душматтнень кядялда, и тяфта минь, киньге эзда аф пелезь, карматама покодема Тейнза, эрязь Сонь инголенза инярушиса и видексшиса марнек эряфоньконьберьф.

⁷⁶ И тон, идняй, лемдеват Инь Вярденнети прорококс, вдь тон кармат молема Азорть инголе и аноклама Тейнза ки:

⁷⁷ тон азсак Сонь ломаньтналонцты – синь идемасна ащи пежеснон нолдамаса.

⁷⁸ Кельги и ужяльди седи Шкаеньке кучи тейнек менельста шинь стямань валда,

⁷⁹ кона валдоптсыне шобдаса и куломань цильфса ащихнень и кона ладясыне минь пильгоньконь сетьмошинь ки лангс».

⁸⁰ Иднясь кассь-кеподсь, кемокснесь ваймопожфса. Сон эрясь шавмодаса, мзярс изь эвонда Израилень ломаньтналть инголе.