Иудань сёрмац 1 - Од Соткс Новый Завет на мордовском-мокша языке 2016

Шумбракстомась

¹ Иуда, Иисус Христосонь покодиец и Иаковонь брадоц, кучи пара вал тертьфненди, конатнень иняруяфтозень Шкай Алясь и ванфтозень Иисус Христос.

² Катк ламолгоды тинь ётксонт кельгозь ужяльдемась, сетьмошись и кельгомась.

Аф виде тонафтыхне и синь судендамасна

³ Кельгомне! Монь пяк мялезель сёрмадомс тейнть марстонь идеманьконь колга, но тяни мон лувине сяда эрявиксокс сёрмадомс тейнть кошардома – тейнть эряви тюремс ся кемамать инкса, кона весть и сембе пинкненди максф Шкаень ломаттненди.

⁴ Тевсь ва мезьса: тинь ёткозонт салава эцесть ломатть, конат кунаркиге аноклафт Шкаень судс. Ня шкайфтомотне Шкайть пароказненц шарфнесазь эсь визькс мяльснон пяшкодеманкса, и туйхть-потайхть фкя-тяка Инь Оцю Шкайть и Иисус Христос Азороньконь эзда.

⁵ Монь мялезе лятфтамс тейнть, хуш тинь содасасть тянь: Азорсь, кона лихтезе Эсь ломаньтналонц Египетонь масторста, меле машфтозень сятнень, кит Тейнза ашесть кема.

⁶ И ангелхнень, конат ашезь ванфта тейст максф азорксшить и конат кадозь менелень эряма вастснон, Сон кирдьсыне шобдашиса пефтома пингонь цинзерса, оцю судть шинц самс, мзярда синь улихть наказафт.

⁷ Тяфта Содомське и Гоморраське, и синь перьфкаст ащи ошневок, конат лацост усксевсть и тиендсть ронгонь эрь кодама визьксонь тефт, улихть наказафт пефтома пингонь толти максомаса, и сяс синь путфт кепотьксокс лиятненди.

⁸ Тяконь лаца ня шкайфтомотне, ононь-няйфксонь няихне, тиендьсазь аф арукс эсь ронгснон, мезькска аф лувсазь оцюнятнень и сялдсазь менелень вийхнень.

⁹ Архангел Михаил, мзярда корхтась-пялькстась идемэвозть мархта Моисеень ронгонц колга, ашезь сменда сюцемс и судендамс идемэвозть. Сон аньцек мярьгсь: «Катк Азорсь кардатанза тонь».

¹⁰ А ня ломаттне сялдсазь сянь, мезть аф шарьхкодьсазь. А мезть шарьхкодьсазь, кода ёньфтома жувататне, эсь шачема обуцяснон коряс, сянь мархта и юмафтсазь эсь пряснон.

¹¹ Кальдяв тейст! Синь молихть Каинонь киге; синь максовсть васькафтомас-эрьготьфтемас ярмакнень инкса, кода Валаам; и синь кулыхть каршек молемать инкса, кода Корей.

¹² Ня ломаттне визьксфтома вятьсазь эсь пряснон тинь кельгомань каваняма пуромкссонт. Синь сашендыхть мархтонт ярхцама и аф виздезь пяшкотькшнесазь эсь пекснон. Синь пичедихть аньцек эсь пряснон инкса. Синь пиземфтома коволхт, конат канневихть вармаса; синь сёксень шуфтт, иможфтомот, кафксть кулофт, юрнек таргафт.

¹³ Синь оцюведень кяжи комболкст, конат шовиякшнихть эсь визьксфтома тевснон мархта. Синь кифтома-янфтома якай тяштть, конатненди сембе пингс аноклаф шобдашись.

¹⁴ Синь колгаст пророчендась Енох, Адамста сявомок сисемце атянь-атясь. Сон корхтась: «Вага, Азорсь сай Эсь тёжянь тёжятть иняру ангелонзон мархта –

¹⁵ сембонь лангса судонь тиема. Сон лихтьсыне лангти Шкайти аф кемайхнень шкайфтома тевснон, конатнень синь тиезь Шкайть каршес, и сембе кяжи валхнень, конатнень азозь ня аф кемай пежуфне Сонь каршезонза».

¹⁶ Синь фалу кропцяйхть, сембось фалу аф синь лацост, синь тиендихть эсь визьксонь мяльснон коряс (Шкайть аф кулхцондозь и коень колсезь). Синь кепсесазь эсь питнеснон шава валса и ёладайхть лиятнень инголе эсь сатфксснон инкса.

Тясть юксне апостолхнень валснон

¹⁷ А тейнть, кельгомне, эрявихть мяляфтомс валхне, конатнень аноконди азозь минь Иисус Христос Азороньконь апостолонза.

¹⁸ «Мекольдень пингть, – корхтасть синь, – эвондайхть сялдыхть, конат кармайхть пряснон вятема шкайфтома эсь визьксонь мяльснон коряс».

¹⁹ Тяфтама ломаттне, конат явфтсазь эсь пряснон (кемамань марстоньшить эзда), эряйхть аньцек эсь модалангонь арьсемаснон коряс, синь эсост аш Шкаень Ваймопожф.

²⁰ Но тинь, кельгома ялгане, кемокстада-касода эсь иняру кемамасонт и озондода Иняру Ваймопожфть вятеманц коряс.

²¹ Ванфнесть прянтень Шкаень кельгомаса, учеда, мзярда минь Азороньке Иисус Христоссь Эсь кельгозь ужяльдеманц коряс максы тейнть пефтома эряф.

²² Уледа кельгозь ужяльдикс сятненди, кинь явожкшни мяльсна.

²³ Омбонцнень идесть, лихтемок синь толста. А лиятненди уледа кельгозь ужяльдикс, но ванфтода пря эздост, нулгодеда мянь щамдост, конат тиевсть аф арукс визьксонь аф содай ронгснон эзда.

Шкайти шнама!

²⁴ Но Шкайть ули виец ванфтомс тинь кальдявс прамада и путомс тинь кенярдемаса афсатыксфтомокс Эсь иневалдонц инголи.

²⁵ Тейнза, фкя-тяка Сембодонга Смузю Шкайти, минь Идиеньконди, шнама, иневалда, вий и азорксши Иисус Христос Азороньконь вельде, сембе пингта инголе, тяни, и пефтома пингс! Аминь.