Иоаннонь омбоце сёрмац 1 - Од Соткс Новый Завет на мордовском-мокша языке 2016

Шумбракстомась

¹ Кемаень пуромксонь содавикс атясь кучи пара вал Шкайса кочкаф азоравати и сонь шабанзонды. Мон видешить инкса кельктядязь тинь, и аф аньцек мон, но сембе лиятневок, конат содасазь видешить.

² Мон кельктядязь тинь ся видешить инкса, кона эряй минь эсонк и кармай улема мархтонк пефтома пингс.

³ Шкай Алясь и минь Азороньке Иисус Христос, Алять Цёрац, максыхть тейнек, кельгомаса и видешиса эряйхненди, пароказне, кельгозь ужяльдема и сетьмоши.

Эряда кельгомаса

⁴ Мон пяк кенярдень, мзярда содайне: тонь кой-кона шабатне эряйхть видешиса, кода и кошардомазь минь Шкай Аляньке.

⁵ И тяни, азорава, эняльдян тейть: карматама кельгома фкя-фкянь. Мон сёрмадан тейть аф од кошардома, но сянь, конац максфоль тейнек нинге ушетксста сявомок.

⁶ А тя кельгомась вага мезьса: тейнек эряви эрямс Сонь кошардоманзон коряс. Тя тона кошардомась, конань тинь марясть нинге ушетксстокиге, и сонь коряванза тейнть эряви эрямс.

Ванфтода пря васькафнихнень эзда

⁷ Вдь масторлангса эвондась лама васькафнида, конат аф кемайхть Иисус Христость ломанень ронгса саманцты. Тяфта корхтайхне – васькафни ломатть и антихристт.

⁸ Ванода эсь мельгант, тясть юмафта-арафта сянь, мезень лангса минь покодеме, но путода вий сатомс марнек казнеть, кона аноклаф тейнть.

⁹ Эрсь, кие шарфты Христость тонафтоманц эзда и туй лия киге, ся Шкайфтома. А ся, кие эряй Христость тонафтоманц коряс, сянь эса ули Шкай Алясь и Сонь Цёрац.

¹⁰ Кда кие сай ширезонт и аф кандсы тя тонафтомать, сянь тясть сявонде пялонт и тяда шумбраксне мархтонза.

¹¹ Вдь кие шумбраксни тяфтама ломань мархта, ся лезды тейнза тиендемс кяжи тевонзон.

Мекольце валхне

¹² Лама мезезе ули сёрмадомс тейнть, но аш мялезе тиемс тянь черниласа кагод лангс. Мон надиян курок самс тейнть и корхтамс мархтонт сельмода-сельмос. Эста минь кеняртьксоньке ули пяшксе.

¹³ Шкайса кочкаф сазорцень иденза кучихть тейть пара валхт. Аминь.