Иоаннонь колмоце сёрмац 1 - Од Соткс Новый Завет на мордовском-мокша языке 2016

Шумбракстомась

¹ Кемаень пуромксонь содавикс атясь кучи пара вал кельгома Гаий ялгати. Мон видешить инкса келькте тонь.

² Кельгома ялгай, мон озондан сянкса: улеза тонь эряфсот сембось лац и улеза шумбра тонь ронгце, кода шумбра тонь ваймоцевок.

³ Мон пяк кенярдень, мзярда тейне сашендсть кемай ялгане и азондозь: синь няезь, кода кемоста тон эрят видешиса. Виде, тон якат видешинь киге.

⁴ Тейне аш сяда оцю кеняртькс тя куляда башка: монь шабане якайхть видешинь киге.

Лездода Шкайть якай-шяяй покодиензонды

⁵ Кельгома ялгай, тонь лангозт ули кода надиямс. Тянь колга корхтайхть сембе тефне, конатнень тон тиендьсайть кемай ялгатнень инкса, и нльне сятнень инкса, конат ульсть тейть аф содафт.

⁶ Кемаень пуромксть ингольде синь корхтасть тонь кельгомацень колга. И улель пяк пара, кда тон лездолеть тейст синь якамасост стане, кода ладяй тиендемс Шкаень ломаттненди.

⁷ Вдь синь тусть тя якамас Христость лемонц инкса и мезевок аф вешендихть аф кемайхнень эзда.

⁸ Сяс тейнек эряви лездомс тяфтама ломаттненди, и тянь вельде минь аратама видешить инкса покодикс синь мархтост фкя тевса.

Диотреф и Димитрий

⁹ Мон сёрмадонь сёрма кемаень пуромксти, но Диотреф, кона кельгсы азорондамс тоса, аф сявсы мяльс сянь, мезе минь корхтатама.

¹⁰ Сяс, мзярда мон саян тоза, эста сембонь ингольде лихтсайне лангу ся тефнень, конатнень сон тиендьсыне. Сон ноляй минь колганк кяжи васькафнемат, но тейнза тявок кржа. Сон аф васьфнесыне ширде саф кемай ялгатнень и лиятнендиге аф мярьгонди тянь тиендемс. Сон мянь кемаень пуромксста панцесыне сятнень, кит васьфнесазь ширде саф кемай ялгатнень.

¹¹ Кельгома ялгай, тят моле кяжень тиихнень мельге, а мольхть паронь тиихнень мельге. Кие тиенди пара тефт, ся ломанць Шкайть эзда. Кие тиенди кальдяв тефт, ся мзярдонга ашезе няенде Шкайть.

¹² Димитриень колга сембе корхтайхть аньцек цебярь, тяфта корхтай сонь эряфоцка, кона видешить коряс. Миньге корхтатама сонь колганза аньцек пара, и тинь содасасть: минь валоньке видет.

Мекольце валхне

¹³ Ламонь колга мон ёралень азондомс тейть, но аш мялезе тиемс тянь черниласа и толгаса.

¹⁴ Мон надиян курок няемс тонь, и эста минь корхтатама сельмода-сельмос.

¹⁵ Сетьмоши тейть! Тонь тястонь ялгатне кучихть тейть пара валхт. Аст пара вал сембе минь ялганьконди, пшкятть эрти лемга. Аминь.