Иоаннонди панчф няйфкс 9 - Од Соткс Новый Завет на мордовском-мокша языке 2016

Ветеце торамать торамац

¹ Ветеце ангелсь торазевсь – и мон няень тяште, кона прафоль менельста модать лангс. Тейнза максфоль потмаксфтома томбать эзда панжема.

² Мзярда сон панжезе потмаксфтома томбать, тя томбаста, кода кабаконашка пянакудста, кеподсь тяфтама качам, нльне шобдалгодсь тя качамть эзда шись и кожфсь.

³ А качамть потмоста лиссь модать лангс ламодонга лама саранча. Тейст максфоль сяка вийсь, кона ули масторлангонь скорпиоттнень.

⁴ Тейст азфоль, афольхть тие кальдяв аф модалангонь тишети, аф кодамовок сянгяряти, аф кодамовок шуфтти, но аньцек ся ломаттненди, конатнень конясост аш Шкайть тяштьфксоц.

⁵ И сятненьге ашезь мярьгондев шавондомс, а аньцек маятафтомс вете кофт. Маятамась синь эздост стамоль, кода скорпиононь пупамать эзда, мзярда сон пупасы ломанть.

⁶ Маятамань ня шитнень ломаттне синць кармайхть вешема кулома – но аф муйхть; ёрайхть куломс, но куломась ворьгоди эздост.

⁷ Саранчатне, ланга ванозь, шаркстсть алашатнень лангс, конат аноклафт тюреманди. Прясост ульсть бта зрнянь каштаст, а шамасна шаркстсть ломаненнети.

⁸ Саранчатнень шяярьсна лятфнезь аваннетнень, а пейсна ульсть, кода лефоннет.

⁹ И лангсост ульсть ваксарщапт, кода кшнинь панархт, а пацянь либорьфсна ульсь, кода дуборф лама алашас кильтьф крандаснень эзда, конат шанчк ардыхть тюремань паксяв.

¹⁰ Синь ульсть пулосна и эсост ульсть пупамат, кода скорпиоттнень. Тейст максфоль азорксши тиендемс ломаттненди зиян вете кофт.

¹¹ Синь лангсост оцязоркс ульсь потмаксфтома томбать ангелоц. Евреень кяльса сонь лемоц Аваддон, грекокс тя лемсь – Аполлион.

¹² Ётась васенце кальдявсь, но вов, мельганза молихть лия кафттне.

Котоце торамать торамац

¹³ Котоце ангелсь торазевсь – и мон кулень вайгяль, кона мольсь Шкайть инголе ащи зрнянь алтарть ниле сюронзон эзда.

¹⁴ Тя вайгяльсь мярьгсь котоце ангелти, конань ульсь торамац: «Нолдайть ниле ангелхнень, конат сотнефт Ефрат оцюдонга оцю ляйть видеса».

¹⁵ И нолдазь ся ниле ангелхнень, конат аноклафтольхть тя частти, шити, ковти и кизоти: тейст эрявсь шавомс ломаттнень колмоце пяльксснон.

¹⁶ Ластя ушманда ульсь кафта сятт миллион. Мон кулине ластятнень лувксснон.

¹⁷ Вага кодамкс мон няине няйфксса алашатнень и лангсост ластятнень: синь кшнинь панарсна ульсть толкс якстерьхть, качам лаца шобда-сенепт и палыкандоркс тюжя тюсоннет. Алашатнень прясна ульсть, кода лефоннет, а кургстост општыесь тол, качам и палыкандор.

¹⁸ И шавфоль ломаттнень колмоце пялькссна ня колма машфтоматнень эзда: толть, качамть и палыкандорть, конат лиссть алашатнень кургстост.

¹⁹ Алашатнень вийсна ульсь аф аньцек кургсост, а пулосостка. Синь пулосна ульсть пря мархтот, куй лацот, и ня прятнень мархта синь пупсезь ломаттнень.

²⁰ А лядыкс ломаттне, конат ашесть кула ня машфтоматнень эзда, сяка ашесть шарфта эсь кядьсост тиф шкайдост. Синь ашесть лотка сюконякшнемда кяжи ваймопожфненди и зрняста, сияста, сереста, кевста и шуфтста тиф шкайснонды, конат аф няихть, аф кулихть, аф якайхть.

²¹ И синь ашесть каенда аф шавондомаснон инкса, аф колдавамаснон, аф усксевомаснон, аф саламаснон инкса.