Иоаннонди панчф няйфкс 2 - Од Соткс Новый Завет на мордовском-мокша языке 2016

Христоссь пачфти вал Ефесонь кемаень пуромксти

¹ «Ефесонь кемаень пуромксть ангелонцты сёрматт: "Вов мезе корхтай Ся, кие кирди сисем тяштть види кядьсонза и якай зрнянь сисем валдоптомань кирдематнень ёткова:

² Мон содасайне тонь тефнень, стака покодемацень и кемошицень. Содаса, маласотка афолить кирде пежес ваяф ломаттнень. Тон варжайть-содайть сятнень, кит лемнесазь пряснон апостолкс, но синь аф сят, кикс няфнесазь пряснон. И тон шарьхкодить, синь васькафнихть.

³ Мон содаса, тонь ули кирдемшкаце, тон лама маятать Монь лемозень инкса и сяка ашить нолда кяттнень.

⁴ Но вов мезезе ули тонь каршезт: тон Монь кельгсамак аф сяшкава вииста, кода васенда.

⁵ Лятфтак ина, кодамкс тон улеть прамдот инголе. Аертт пежетнень эзда и мрдак васень тефненди. Но кда аф аердат, Мон саян тейть и шашфтса валдоптомань кирдемацень вастстонза.

⁶ Но пара эсот ся, мес тон Монь лацон афолить няе николаиттнень тевснон.

⁷ Кинь улихть пиленза – кулеза, мезе Ваймопожфсь корхтай кемаень пуромксненди. Сяськити максан ярхцамс иможда эряфонь шуфтть эзда, кона касы Шкайть райсонза"».

Христоссь пачфти вал Смирнань кемаень пуромксти

⁸ «Смирнань кемаень пуромксть ангелонцты сёрматт: "Вов мезе корхтай Васенцесь и Мекольцесь, Ся, кона кулофоль, а тяни шиса.

⁹ Мон содасайне тонь тефнень, тонь маятаматнень и ашушицень (хуш афкукс тон козят). Содаса сяньге, кода тонь эсот сялдыхть сят, конат эсь пряснон лувсазь еврейкс, но синь аф еврейхть, а Сатанань пуромкс.

¹⁰ Тят пеле сянь эзда, мезе тейть сави кирдемс. Ламотнень эздонт идемэвозсь ёрдасыне пякстамгуду. Тя ули тейнть кемамань варжамакс. Кемонь шит кармайхть люпштама эсонт, но сяка, тяк кадонда кемамацень, кда мянь сави куломс. И эста, кода сяськити, Мон максса тейть эряфонь каштазть.

¹¹ Кинь улихть пиленза – кулеза, мезе Ваймопожфсь корхтай кемаень пуромксненди. Кие сяськи, сянди омбоце куломась зиян аф тии"».

Христоссь пачфти вал Пергамонь кемаень пуромксти

¹² «Пергамонь кемаень пуромксть ангелонцты сёрматт: "Вов мезе корхтай Ся, кинь ули кафцьке пяльде оржа тороц:

¹³ Мон содасайне тонь тефнень, и содаса, тон эрят тоса, коса кемокстазе озама вастонц Сатанась. Но тон ванфтсак Монь лемозень и ашеть лотка Тейне кемамда нльне эстонга, мзярда тинь ошсонт, коса эряй Сатанась, ульсь шавф Антипа, седи ваксста Монь колган азондысь.

¹⁴ Но вов Монь мезе-бди ули тонь каршезт: тоса, тинь ётксонт улихть Валаамонь тонафтоманц коряс эряйхть. А Валаам тонафтозе Валаконь, кода Израилень эряйхнень сувафтомс пежес: ярхцамс сивольда, кона кантф озксказнекс аф афкуксонь шкайхненди, и усксевозь эрямс.

¹⁵ Улихть тонь маласот стаптка, конат эряйхть николаиттнень тонафтомаснон коряс.

¹⁶ Шарфтт меки Шкайти! Афток курок саян тейть и кургстон лиси торса карман тюрема мархтост.

¹⁷ Кинь улихть пиленза – кулеза, мезе Ваймопожфсь корхтай кемаень пуромксненди. Сяськити максан ярхцамс салавашинь маннада и максан акша кевня, конань лангса ули сёрматф од лем. Тя лемть кивок аф содасы, ся ломаньда башка, кинди максови кевнясь"».

Христоссь пачфти вал Фиатиронь кемаень пуромксти

¹⁸ «Фиатиронь кемаень пуромксть ангелонцты сёрматт: "Вов мезе корхтай Шкайть Цёрац, конань сельмонза, кода палы тол, и пильгонза, кода пиндолды бронза:

¹⁹ Мон содасайне тонь тефнень, кельгомацень, кемамацень, покодемацень и сталмонь кирдемацень. Содаса сяньге, тонь тяниень тефне сяда оцюфт васенцетнень коряс.

²⁰ Но вов Монь мезе-бди ули тонь каршезт: тон аф карнесак Иезавель авать, кона лемнесы прянц прорококс, а сонць эсь тонафтомасонза васькафнесыне-эрьготьфнесыне Монь покодинень. Тя авась тонафнесыне синь усксевомс и ярхцамс сивольда, конань каннесазь озксказнекс аф афкуксонь шкайхненди.

²¹ Мон максонь тейнза пинге каендамс эсь усксевомасонза, но сонь аш мялец тянь тиемс.

²² Вов, Мон прафтса сонь оцю сярядемас, а мархтонза усксевихнень пяк маятафтсайне, кда аф кадсазь пежу тевснон.

²³ Сонь мельганза молихненьге кулофтсайне. Эста содасазь сембе кемаень пуромксне: Мон Ся, кие содасыне ломаттнень кяшф мяльснон-арьсемаснон. И ёткстонт эрти Мон максан тевонзон коряс.

²⁴ Но тейнть, Фиатира ошста лиятненди, конат ашесть прафта тя тонафтомати и ашезь сода, кода корхтайхть, Сатанань крхкашить, Мон корхтан: аф путан лангозонт кодамовок од канкс.

²⁵ Аньцек сянь, мезенте ули, кирдесть Монь самозон.

²⁶ Ся, кие сяськи и петь самс кармай тиендема Монь мялезень коряс, сянди Мон максан азорксши лия тналонь ломаттнень лангса.

²⁷ Сон кармай ваномост синь кшнинь байдекса и коласыне синь кода сёвонень кядьгонятнень. Тяфтама азорксшись Тейневок максфоль Алязень эзда.

²⁸ Тяда башка, Мон максан тейнза шобдавань заря тяште.

²⁹ Кинь улихть пиленза – кулеза, мезе Ваймопожфсь корхтай кемаень пуромксненди"».