Иоаннонди панчф няйфкс 18 - Од Соткс Новый Завет на мордовском-мокша языке 2016

Вавилонть прамац

¹ Тяда меле мон няень лия ангел, кона валгондсь менельста. Сонь ульсь оцюдонга оцю азорксшиц, и модась вандолгодсь сонь иневалдонц эзда.

² Ангелсь ювадсь кайги вайгяльса: «Прась, прась инь оцю Вавилон ошсь! Сон тиевсь кяжи ваймопожфненди эряма вастокс и эрь кодама аф ару ваймопожфти кяшема вастокс, эрь кодама аф ару и нулготькс нармонти пизокс; сяс мес сон симдезень сембе ломаньтналхнень усксевомань кяжи винадонза.

³ Масторлангонь оцязорхне усксевсть мархтонза и масторлангонь мишендихне-рамсихне козякодсть сонь пяк оцю козяшидонза».

⁴ Сяльде мон кулень менельста лия вайгяль, кона корхтась: «Листь эздонза, Монь ломаньтналозе, афолеть тие пежет сонь лацонза, и афолеть пова ся кальдяфнень алу, конат учендсазь сонь.

⁵ Менельти кассь сонь пежень пандоц, и Шкайсь ашезень юкста сонь аф видешинзон.

⁶ Пандода ина тейнза сняра, мзяра сон макссесь тейнть, кафтонь-крда пандода сонь тевонзон инкса. Сяка кядьготи, конаса сон аноклакшнесь симомбяль лиятненди, аноклада тейнза кафксть сяда сяпи вина.

⁷ Мзяра сон шнафнезе прянц и эрясь козяшиса, сняра максода тейнза маятамада и ризфта. Вдь сон корхтай эсь седисонза: "Озадан оцязорава лаца, мон аф удаван и мон аф няян ризф".

⁸ Вов мес фкя шиня лангозонза прайхть сембе кяльдяфне: куломась, ризфсь и вачашись, и сон ули плхтаф толса, сяс мес Азор Шкайсь, сонь судендаец, виидонга вии».

⁹ Масторлангонь оцязорхне, конат мархтонза прашендсть усксевомас и козяшис, кармайхть авардема и явсема инксонза, мзярда няйсазь сонь паломань качамонц.

¹⁰ Синь ащихть ичкозе сонь эздонза, пелезь ваныхть сонь маятаманзон лангс, и корхтайхть: «Кальдяв, кальдяв тейть, оцюдонга оцю ош, инь вии Вавилон ош! Фкя частонь потмоста тиевсь лангсот суд!»

¹¹ И масторлангонь мишендихне-рамсихне кармайхть авардема и явсема сонь инксонза, сяс мес кивок ни аф рамсесыне синь паршиснон,

¹² зрнянь и сиянь паршихнень, питни кефнень и жемчукнень, шуваня иляназть и шобда-якстерь котфть, парьхцить и валда-якстерь котфть; эрь кодама танцти шине шуфттнень и слононь пакарьста эрь кодама паршихнень; и эрь кодама тифкснень – питни шуфтонь, серень, кшнинь, и мраморонь;

¹³ корицать и фимиамть, мирать и ладанть, винать и вайшуфтонь вайть, почфть и тозерть; тракснень и учатнень, алашатнень и крандаскятнень, уретнень и ломанень ваймотнень.

¹⁴ Мишендихне-рамсихне корхтайхть: «Кенерьф имошт, конатнень анасыне ваймоце, аф улихть тейть, марнек козяшице и марнек пиндолфце юмасть, мзярдовок аф мрдайхть тейть».

¹⁵ Пелемась сявсыне сятнень, кит мишендсть-рамсесть ня паршихнень эса и кит козякодсть оцюдонга оцю усксеви авать вельде. Синь ащихть ичкозе эздонза, пелезь ваныхть сонь маятаманзон лангс. Синь авардезь и явсезь

¹⁶ корхтайхть: «Кальдяв, кальдяв оцюдонга оцю ошти, кона щаф шуваня иляназса, шобда-якстерь и валда-якстерь котфса, и кона пиндолды зрняса, питни кевняса и жемчугса,

¹⁷ сяс мес фкя частонь потмоста юмась-арась сонь козяшиц!» Сембе оцю венчень вятихне, сембе оцюведьге уендихне, и оцю венчса покодихне, сембе, кие пря трясь оцюведть эзда – сембе синь арасть ширеняв.

¹⁸ И мзярда няезь паломань качамонц, ювадсть: «Кодама ош ладяви тя оцюдонга оцю ошть ваксс?»

¹⁹ Синь кулуса почерязь пряснон и авардезь и явсезь юватькшнесть: «Кальдяв, кальдяв тейть, оцюдонга оцю ош! Сембе, кинь ульсть оцю венченза оцюведьса, козякоткшнесть тонь питни паршихнень эзда – вов фкя частста тон тиевоть шава вастокс!»

²⁰ «А тон, менель, кеняртькшнек! Тиньге, Шкаень сембе ломаттне, апостолхне и пророкне, кеняртькшнеда! Шкайсь судендазе сонь сембонкса сянкса, мезе сон тиендсь тейнть!»

²¹ Эста фкя пяк вии ангелсь сявсь кев, яжафтоманнешка, и ёрдамок оцюведти, мярьгсь: «Ва тяфтама вийса ули врнофтф оцюдонга оцю Вавилон ошсь, и аф муви тяда меле сон.

²² Тонь эсот оду аф кулихть аф арфань вайгяль, аф морамань вайгяль; аф кайгозевихть тонь ульцяват нюдиень и торамань морамат; тонь эсот аф муйхть фкявок ломань, кона стаки кармаль машты кядьса тиема эсь тевонц, и яжамань кефнень увфсновок аф кулеви тоньцот.

²³ Валдоптоматневок аф кармайхть валдоптома тейть, рьвяяень и рьвянянь вайгяльхтьке аф кулевихть тоньцот. И сембе сяс, мес тонь мишендихне-рамсихне ульсть сембода оцюкс масторлангса, и тонь колдувамацень вельде васькафтфтольхть сембе ломаньтналхне.

²⁴ И тонь лангсот пророкнень версна, Шкаень ломаттнень версна, и масторлангса сембе шавфнень версна».