Иоаннонди панчф няйфкс 15 - Од Соткс Новый Завет на мордовском-мокша языке 2016

Сисем ангелхт и сисем кальдяфне

¹ Мон няень лия дивань тяштькс менельса, вельф оцю и дивандафты: мон няень сисем ангелхт, конатнень кядьсост сисем мекольце кальдяфне. И ня кальдяфнень мархта аделсеви Шкаень кяжсь.

² Мон няень бта тол мархта шоряф клянцеконь оцюведь. Клянцеконь оцюведть лангса ащесть сят, кит сяськозь кяжи жуватать, сонь ликонц и сонь тяштьфксонц, кона няфневсь лемонц числаса. Синь кядьсост кирдсть арфат

³ и моразь Шкаень покодить Моисеень и Верозть морснон: «Азор Шкай, Семботь Кирдиец, оцюдонга оцюфт и дивандафтыхть Тонь тефне! Иняруфнень Оцязорсна, видет и видексшинь Тонь китне!

⁴ Кие аф кармай пелема эздот, Азор, и кие аф шнасы Тонь лемцень? Вдь Тон ськамот Инярусь! Сембе ломаньтналхне сайхть и сюконяйхть-комайхть Тонь инголет, сяс мес няевикст арасть Тонь виде тефне!»

⁵ Тяда меле мон няине, кода Шкаень кудсь, иняру кошсь, панжевсь менельса.

⁶ Шкаень кудста лиссть сисем ангелхт сисем кальдяфнень мархта. Синь щафтольхть ару, пиндолды иляназонь щамса и мяште видес карксафтольхть зрнянь карксса.

⁷ Фкясь ниле эряй ваймотнень эзда макссь сисем ангелхненди зрнянь сисем кядьгот. Синь пяшкотьфтольхть пефтома пингс эряй Шкайть кяждонза.

⁸ И Шкаень кудсь пяшкодсь качамса Шкайть иневалдонц и виенц эзда. И кивок ни ашезь сував Шкаень куду снярс, мзярс ашесть аделав сисем ангелхнень сисем кальдявсна.