Иоанн 8 - Од Соткс Новый Завет на мордовском-мокша языке 2016

Лия алянь ваксста кундаф ава

¹ А Иисус тусь Вайшуфта пандть лангс.

² Шобдава тага сась Шкаень куду, и сембе мольсть Тейнза. Сон озась и кармась тонафтома эсост.

³ Тяса койти тонафтыхне и фарисейхне вятсть Тейнза ава, кона кундафоль лия алянь ваксста, арафтозь сонь кучкати,

⁴ мярьгсть Иисусти: «Тонафты! Тя авась кундаф лия алянь ваксста,

⁵ а Моисей койсонза мярьгсь тейнек шавондомс тяфтапнень кевса: Тон мезе азат?»

⁶ Тяфта синь корхтасть, сяс мес ёрасть кундамс Иисусть валса и мумс кодамовок туфтал Сонь муворгофтомс. Но Иисус комась и сурсонза сёрмадсь модать лангс.

⁷ А мзярда тага ушедсть Сонь кизефнемонза, Сон кеподезе прянц и азозе тейст: «Кие ёткстонт пежефтома, ся катк васенцекс ёрдай авать лангс кев».

⁸ Иисус тага комась и сёрмадсь модать лангс.

⁹ Мзярда синь марязь тянь, ваймовайгяльсна лихтезень лангу муворшиснон, и синь ушедсть тушендома фкя-фкянь мельге, и васенцекс тусть сиретне. Лядсь ськамонза Иисус и авась, кона ащесь инголенза.

¹⁰ Иисус кеподезе Эсь прянц и авада башка киньге апак няйхть, мярьгсь авати: «Ава! Косот тонь муворгофнихне? Кивок ашензе суденда?»

¹¹ Авась мярьгсь каршезонза: «Кивок аш, Азор». Иисус корхтай тейнза: «Монга аф судендате, архт и оду тят тиенде пежет».

Иисус – валдсь масторлангти

¹² Иисус тага корхтась ломаттненди и мярьгсь: «Мон валдсь масторлангти. Кие моли мельган, ся аф якай шобдашиса, но сянь ули эряфонь максы валдоц».

¹³ Эста фарисейхне мярьгсть Тейнза: «Тон Тонць азонкшнят Эсь колгат; Тонь азонкшнемаце аф виде».

¹⁴ Иисус каршезост мярьгсь: «Катк Эсь колган Монць азонкшнян, Монь азондомазе виде; сяс мес Мон содаса, коста сань и ков молян. А тинь аф содасасть, коста сань и ков молян.

¹⁵ Тинь судендатада ланга ванозь; Мон киньге аф судендаса.

¹⁶ А кда ни судендалень, Монь судендамазе улель виде, сяс мес Мон аф ськамонан, Монь мархтон Алязе, Монь Кучиезе.

¹⁷ Тинь коентень эса сёрматф: "Кафта ломаттнень азондомасна виде".

¹⁸ Мон Монць азондан Эсь колган, и азонды колган Алязе, Монь Кучиезе».

¹⁹ Эста мярьгсть Тейнза: «Коса Аляце?» Иисус каршезост мярьгсь: «Аф Монь, аф Алязень тинь аф содасасть; содалемасть Монь, эста содалесть Монь Алязеньге».

²⁰ Ня валхнень Иисус азозень ярмаконь кочкама арзять ваксса, мзярда Сон тонафтсь Шкаень кудса. И кивок ашезе кунда Сонь, сяс мес нинге ашезь са Сонь пингоц.

²¹ Иисус тага мярьгсь тейст: «Мон туян, и карматада Монь вешендемон; но кулотада эсь пежесонт. Ков Мон молян, тов тинь аф сафтада».

²² Тяса еврейхнень оцюнясна корхтасть: «Кали шавсы Эсь прянц, мес корхтай: "Ков Мон молян, тов тинь аф сафтада"?»

²³ Иисус мярьгсь тейст: «Тинь тяста, алдоннетнень эзда, а Мон вярденнетнень; тинь тя масторлангста, Мон аф тя масторлангонь.

²⁴ Сяс Мон мярьгонь тейнть: кулотада эсь пежесонт. Кда аф кематада – тя Монан, эста кулотада эсь пежесонт».

²⁵ Эста синь кизефтезь Сонь: «Ина кият Тон?» Иисус азозе тейст: «Мон Ся, кие ушетксстокиге ули, кода Мон и корхнень тейнть.

²⁶ Мон мулень лама мезе корхтамс колгант и мезенкса судендамс тинь; но Монь Кучиезе виде, и мезе Мон кулень ширденза, сянь и корхтаса масторлангти».

²⁷ Синь ашесть шарьхкоде: Сон корхтась Алянц колга.

²⁸ Сяс Иисус мярьгсь тейст: «Мзярда кеподьсасть Ломанень Цёрать, эста карматада содамонза: тя Монан и мезевок аф тиендян Эсь эздон. Но кода тонафтомань Алязе, стане и корхтан.

²⁹ Монь Кучиезе мархтон. Сон ашемань када ськамон, сяс мес Мон фалу тиендьса сянь, мезсь туй Сонь мялезонза».

³⁰ Иисусть ня валонзон кулемста ламотне кармасть Тейнза кемама.

Видешись нолдасы ломанть воляс

³¹ Эста Иисус мярьгсь ся еврейхненди, конат кармасть Тейнза кемама: «Эряндярятада Монь валозень коряс, эста тинь видекс Монь тонафнине.

³² И карматада содамонза видешить, и видешись нолдатядязь тинь воляс».

³³ Каршезонза мярьгсть: «Минь Авраамонь уноконь-уноконзотама и мзярдовок киндинге урекс ашеме уленде; мес ина Тон корхтат: "Мянттяда воляс"?»

³⁴ Иисус азозе: «Видеста корхтан тейнть: эрь пежень тиись – пежети уре.

³⁵ Уресь азоронц кудса эряй аф сембе пингс; кудса сембе пингс эряй кудазорть цёрац.

³⁶ Вов, кда Цёрась нолдатядязь тинь воляс, эста афкукс аратада воляс нолдафокс.

³⁷ Содаса: тинь Авраамонь уноконь-уноконзотада; и сякокс ёрасамасть Монь шавомс, сяс мес Монь валозе ашезь сува эзонт.

³⁸ Мон корхтаса сянь, мезе няень Алязень ваксса; а тинь тиендьсасть сянь, мезть кулесть эсь алянтень эзда».

Авраамонь афкуксонь иденза тиендихть Авраамонь лаца

³⁹ Синь каршезонза мярьгсть: «Минь аляньке Авраам». Иисус азозе тейст: «Улендяряледе Авраамонь иденза, эста тиенделесть Авраамонь тевонзон.

⁴⁰ А тяни ёрасамасть шавомс Монь, Ломанть, кона азозе тейнть ся видешить, конань кулезе Шкайть кургста. Авраам лацонт афоль тие.

⁴¹ Тинь тиендьсасть эсь алянтень тевснон». Тянь каршес мярьгсть Тейнза: «Минь аф лия алянь эзда шачфтама; минь ули фкя аляньке, Шкайсь».

⁴² Иисус мярьгсь тейст: «Улендяряль Шкайсь тинь алянте, кельголемасть Монь, сяс мес Мон сань Шкайть эзда; вдь Мон аф Эсь эздон сань, а Сон кучемань Монь.

⁴³ Мес тинь аф шарьхкодьсасть корхтамазень? Сяс мес аф ёратада Монь валозень кулхцондомс.

⁴⁴ Тинь алянте идемэвозсь; и тинь мяленте тиендемс алянтень лаца визькс тефт. Сон ушетксстокиге ульсь ломанень шавонды и ашезь ащев видешиса; сяс мес аш эсонза видеши. Мзярда сон кяльготни, корхтай эсенц; сяс мес сон – кяльготнись и кяльготнемать аляц.

⁴⁵ А мзярда Мон видеть корхтаса, тинь аф кематада Тейне.

⁴⁶ Киндивок няфтеви Монь пежес сувамазе? А кда Мон корхтан видеста, мес ина аф кематада Тейне?

⁴⁷ Кие Шкайть эзда, ся кульсыне Шкаень валхнень. Тинь сяс аш мяленте кулхцондомс, мес аф Шкайть эздотада».

Иисус ульсь Авраамонь шачемдонза инголе

⁴⁸ Тянь каршес еврейхне корхтасть Иисусонди: «Дяряй аф видеть корхтасаськ: Тон Самариянь эряят и эсот кяжи ваймопожфсь?»

⁴⁹ Иисус каршезост мярьгсь: «Эсон аш кяжи ваймопожф; Мон шнаса Алязень, а тинь сялдсамасть Монь.

⁵⁰ Мон аф вешендян эстейне шнама; ули вешенди и ули судендай.

⁵¹ Видеста корхтан тейнть: кие тиенди Монь валнень коряс, ся мзярдовок аф кулы».

⁵² Еврейхне мярьгсть Тейнза: «Тяни минь содасаськ: кяжи ваймопожфсь эсот. Кулось Авраам, пророкневок; а Тон корхтат: "Кие тиенди Монь валнень коряс, ся мзярдовок аф кулы".

⁵³ Дяряй Тон сяда оцюват минь аляньконь Авраамонь коряс, кона кулось? Пророкневок кулсесть: кикс лувондсак Эсь пряцень?»

⁵⁴ Иисус каршезост: «Кда Мон Монць шнаса-оцюлгофнеса Эсь прязень, эста Монь шнамазе-оцюлгофтомазе мезевок аш. Монь эсон шнай-оцюлгофты Алязе, конань колга тинь корхтатада: "Сон минь Шкаеньке".

⁵⁵ И тинь ашесть сода Сонь; а Мон Сонь содаса; и кда мярьган: "Аф содаса Сонь", эста аран тинь лацонт кяльготникс. Но Мон содаса Сонь и тиендян Сонь валонц коряс.

⁵⁶ Тинь алянте Авраам кенярдсь, сяс мес Тейнза сави няемс Монь сама шизень; няезе и кенярдсь».

⁵⁷ Тянь каршес еврейхне Тейнза мярьгсть: «Тейть аш нинге ведьгемонь кизовок, и Тон няить Авраамонь?»

⁵⁸ Иисус мярьгсь тейст: «Видеста корхтан тейнть: Авраамонь шачемдонза инголе Мон ни улень и улян».

⁵⁹ Эста синь кочкасть кефт лангозонза ёрямс; но Иисус кяшсь, лиссь Шкаень кудста, ётась синь ётковаст и тусь сяда тов.