Иоанн 6 - Од Соткс Новый Завет на мордовском-мокша языке 2016

Иисус анды вете тёжятть ломань

¹ Тяда меле Иисус тусь Галилеянь эрьхкть тона пяли, тя эрьхкть нинге лемнезь Тивериадань эрьхкокс.

² Мельганза мольсь пяк лама ломань, сяс мес синь няезь дивань тефнень, конатнень Сон тиендезень сярядихнень пчкафнемста.

³ Иисус куцсь панда пряс и озась тоса Эсь тонафниензон мархта.

⁴ Малаткшнесь еврейхнень Очижисна.

⁵ Иисус кеподезе сельмованфонц и няезе: ширезонза сай пяк лама ломань. Сон корхтай Филиппонди: «Коста раматама кши ня ломаттнень андомс?»

⁶ А Сон тяфта корхтась сяс, мес ёразе содамс Филиппонь мяленц; Сонць ни содазе, мезе кармай тиема.

⁷ Филипп мярьгсь каршезонза: «Кда и рамалеме кафта сятт динарийда кши, сянь эздовок пакшкяньге афоль сата эрь ломанти».

⁸ Лия тонафнись, Андрей, Симон Пёторонь брадоц, корхтай Тейнза:

⁹ «Тяса фкя цёранять улихть шужень вете кшинза и кафта калонза; аньцек тя мезе тняра ломанти?»

¹⁰ Иисус мярьгсь: «Мярьгода ломаттненди озсемс». Ся вастса кассь туста тише, и ломаттне озсесть, ётксостоль ветешка тёжянь аля.

¹¹ Иисус сявозень кшитнень, сюконясь Шкайти, и явозень тонафниензонды, а тонафниенза ломаттненди. Тяфта тись калхнень мархтовок. И ломаттне сявондсть кинь мзяра мялец.

¹² Мзярда топодемс ярхцасть, Иисус азозе Эсь тонафниензонды: «Кочкасть лятф сускопнень, мезевок тяза юма».

¹³ Синь кочказь, и пяшкодезь кемгафтува кептерьхнень кши сускомса, конатнень кадозь шужень вете кшида ярхцайхне.

¹⁴ Мзярда ломаттне няезь Иисусть тя тиф тяштьксонц, мярьгсть: «Тя видекс ся пророксь, конанди сама масторть лангс».

¹⁵ Иисус кодак содазе – синь ули мяльсна сявомс Сонь и вихца арафтомс оцязоркс, Сон тага тусь пандть пряс ськамонза.

Иисус моли ведть ланга

¹⁶ Сась илядьсь, и Иисусть тонафниенза валгсть эрьхкть трвас.

¹⁷ Синь озасть венчти, тусть эрьхкть тона пяли, Капернауму. Шопотькшнесь ни, а Иисус ашезь сашенда ширезост.

¹⁸ Яфодсь вии варма, и эрьхксь комболгодсь.

¹⁹ Мзярда синь уйсть комсь ветиешка али колмоньгемоньшка стадион, няезь Иисусонь, кона мольсь ведть ланга и малаткшнесь венчти. Синь эводсть.

²⁰ Но Сон мярьгсь тейст: «Тя Монан, тяда пеле».

²¹ Синь ёразь озафтомс Сонь венчти; и венчсь эстокиге токась эрьхкть ся трвазонза, коза синь уйсть.

Эряфонь максы кши

²² Омбоце шиня ломаттне, конат лядсть эрьхкть тона пяли, няезь: тоса ульсь аньцек фкя венч, коза озсесть Иисусть тонафниенза. Иисус ашезь озсе венчти тонафниензон мархта, синь тусть Соньфтомонза.

²³ Ся пингоня састь Тивериадаста лия венчт ся вастть малас, коса ломаттне ярхцасть кшида Азорть бславамдонза меле.

²⁴ Тяфта, мзярда ломаттне няезь: Иисус аш, тонафниензовок ашет, синь озасть ня венчненди и уйсть Капернауму Иисусть вешендема.

²⁵ Мзярда музь Сонь эрьхкть тона пяльде, мярьгсть Тейнза: «Равви! Мзярда сать тяза?»

²⁶ Иисус каршезост мярьгсь: «Видеста корхтан тейнть: тинь Монь вешендьсамасть аф сяс, мес няендесть тяштьксонень, а сяс, мес ярхцаде кшида и топодеде.

²⁷ Прафтода аф ся ярхцамбяльти, кона коли, а ся ярхцамбяльти, кона аф коли и максы пефтома эряф. Тянь казьсы тейнть Ломанень Цёрась; вдь Алясь, Шкайсь, путозе Эсь тяштьксонц Ломанень Цёрать лангс».

²⁸ Эста мярьгсть Тейнза: «Мезе тейнек эряви тиемс: улельхть минь тевоньке Шкайть мяленц коряс?»

²⁹ Иисус мярьгсь каршезост: «Вов Шкайть мяленц коряс тевсь: кемада Сянди, кинь Сон кучезе».

³⁰ Сят каршезонза: «А кодама тяштькс няфтят, конань няемста минь кемалеме Тейть? Мезе Тон тиендят?

³¹ Атянь-атяньке ярхцсесть шавмодаса маннада, кода азф Сёрматфксса: "Сон макссь тейст ярхцамс кши менельста"».

³² Иисус мярьгсь тейст: «Видеста корхтан тейнть: аф Моисей макссь тейнть кши менельста, а Монь Алязе максси тейнть афкуксонь кши менельста.

³³ Вдь Шкаень кшись – Ся, кие валгонды менельста и максси масторлангти эряф».

³⁴ Тянь каршес мярьгсть Тейнза: «Пара ломань! Макссек тейнек фалу тяфтама кши».

³⁵ А Иисус тейст мярьгсь: «Мон – эряфонь максы кшисян; Тейне сашендысь аф ули вачеда, и Тейне кемайть мзярдовок аф сай симомац.

³⁶ Но кода Мон азыне тейнть: няемасть Монь и аф кематада.

³⁷ Сембе, кинь Алязе макссесыне Тейне, сайхть Тейне; и Тейне сайть аф панца.

³⁸ Мон валгонь менельста аф Эсь мялезень, а Монь Кучиезень, Алязень мяленц тиема.

³⁹ А Монь Кучиезень мялец тяфтама: сембонь ёткста, кинь Сон максозе Тейне, киньге аф юмафтомс, а сембонь синь вельмафтомс мекольце шиня.

⁴⁰ Кучиезень мялец тяфтама: эрть, кие няйсы Цёрать и кемай Тейнза, сянь ули пефтома эряфоц; и Мон вельмафтса сонь мекольце шиня».

⁴¹ Еврейхне лангозонза изгордсть, сяс мес Сон мярьгсь: «Мон ся кшись, кона валгсь менельста».

⁴² Синь корхтасть: «Дяряй тя аф Иисуссь, Иосифонь цёрац, конань алянц и тядянц минь содасаськ? Кода стане Сон корхтай: Мон валгонь менельста?»

⁴³ Иисус каршезост мярьгсь: «Лоткада изгордомда эсь ётковант.

⁴⁴ Кивок аф сай Тейне, кда аф вятьсы Алязе, Монь Кучиезе; и Мон вельмафтса ся ломанть мекольце шиня.

⁴⁵ Пророкнень ули сёрматфсна: "И сембонь тонафтсыне Шкайсь". Эрь ломанць, кона кулхцондозе Алязень и тонадсь эздонза, сай Тейне.

⁴⁶ Но тяса Мон аф корхтан, бта кивок няезе Алять, Шкайть пяльде Сайть башка. Аньцек Сон няезе Алять.

⁴⁷ Видеста корхтан тейнть: Тейне кемайть ули пефтома эряфоц.

⁴⁸ Мон – эряфонь максы кшисян.

⁴⁹ Атянь-атянте ярхцасть шавмодаса маннада и сяка кулость.

⁵⁰ Но кшись, кона валги менельста, тяфтама: эздонза ярхцайсь аф кулы.

⁵¹ Мон менельста валкф эряфонь максы кшисян: тя кшида ярхцайсь кармай эряма пефтома. Кшись, конань Мон максса, – Монь ронгозе, конань Мон максса масторлангонь эряйхнень инкса».

⁵² Эста еврейхне кармасть эсь ётковаст пялькстома: «Кода Сон макссы тейнек ярхцамс Эсь ронгонц?»

⁵³ Иисус мярьгсь тейст: «Видеста корхтан тейнть: кда аф ярхцатада Ломанень Цёрать ронгтонза и аф сиптяда Сонь вердонза, эста аф ули тинь эсонт эряф.

⁵⁴ Монь ронгтон ярхцайть и вердон симить ули пефтома эряфоц; и Мон вельмафтса сонь мекольце шиня.

⁵⁵ Вдь Монь ронгозе – афкуксонь ярхцамбяль, и Монь верозе – афкуксонь симомбяль.

⁵⁶ Монь ронгтон ярхцайсь и вердон симись ащи Монь эсон, и Монга эсонзан.

⁵⁷ Алязе, конац эряй, кучемань Монь, и Мон эрян Сонь вельденза. Тяфта Моньдон ярхцайське кармай эряма Монь вельден.

⁵⁸ Вов кодама менельста валкф кшись. Сон аф кода маннась, конада ярхцасть атянь-атянте и кулость: тя кшида ярхцайсь кармай эряма пефтома».

⁵⁹ Тянь Сон корхтазе Капернаумонь синагогаса тонафтомста.

Ламоц тонафнихне кадсазь Иисусонь

⁶⁰ Тянь марямок, тонафниензон эзда ламотне корхнесть: «Кодама стака тонафтомац! Кие кармай Сонь кулхцондомонза?»

⁶¹ Но Иисус Эсь потмосонза марязе тонафниензон пеняцямаснон и мярьгсь тейст: «Кали тянь эзда керовсь седиенте?

⁶² Мезе ина улель мархтонт, кда няендярялесть Ломанень Цёрать кеподеманц тоза, коса ульсь тяда инголе?

⁶³ Аньцек Ваймопожфсь кази эряф, ломанть тяса аш виец. Валхне, конатнень Мон тейнть азыне, – ваймопожф и эряма.

⁶⁴ Но ётксонт ули мзярошка аф кемайда». Вдь Иисус ушетксстокиге содазень, кит аф кемайхть и кие Сонь мисы.

⁶⁵ Иисус мярьгсь: «Сяс Мон корхтань тейнть: кивок аф сай Тейне, кда тейнза тянь аф макссы Монь Алязе».

⁶⁶ Тяда меле тонафниензон ёткста ламотне тусть ваксстонза и лоткасть мархтонза якамда.

⁶⁷ Эста Иисус мярьгсь кемгафтувотненди: «Тиньге ули мяленте тумс эздон?»

⁶⁸ Симон Пётрсь мярьгсь каршезонза: «Азор! Кинди минь мольхтяма? Тонь кядьсот валхне, конат максыхть пефтома эряф.

⁶⁹ И минь кармаме кемама и лац шарьхкодеськ: Тон Христоссят, эряй Шкайть Цёрацат».

⁷⁰ Иисус каршезост корхтась: «Дяряй аф Монць кочкадязь тинь, кемгафтувотнень? И сембе сяка, фкясь ёткстонт – идемэвозь».

⁷¹ Тяфта Иисус корхтась Иудань, Симон Искариотонь цёранц колга. Иудась кемгафтувотнень ёткста фкясель и сембе сяка пингонь ётазь мисы Иисусть.