Иоанн 5 - Од Соткс Новый Завет на мордовском-мокша языке 2016

Иисус пчкафтсы алять Вифездань эшеляма вастса

¹ Сяда меле ульсь еврейхнень иласна, и Иисус сась Иерусалиму.

² Иерусалимса Учань ортатнень маласа ули эшеляма васта, кона евреень кяльса лемневи Вифезда. Тоса ульсть вельхкс мархта вете ётама вастт,

³ коса матфоль пяк лама сярядида, сокорда, шаморда, параличса колафта, конат учсезь ведть комболдоманц.

⁴ Шкаень ангелсь пингонь-пингонь сувсесь эшеляма вастти и шорсезе ведть; и кие васенцекс сувсесь ведти шорямдонза меле, ся пчксесь, кодама урмаса афоль сяряде.

⁵ Тоса ульсь ломань, кона сярядсь колмогемонь кафксува киза.

⁶ Иисус няемок сонь веляда и содамок: сон сяряди ни куватьс, корхтай тейнза: «Ули мяльце пчкамс?»

⁷ Сярядись каршезонза мярьгсь: «Ули, пара ломань; аньцек аш ломанезе, кона сувафтолемань эшеляма васту ведть шорявомста; а мзярс мон пачкотькшнян, лиясь ни сувси тоза».

⁸ Иисус корхтай тейнза: «Стяк, сявк ацамцень и якак».

⁹ Ся эстокиге пчкясь, сявозе ацамонц и ушедсь якама. Тя ульсь ваймамань шиня,

¹⁰ сяс еврейхнень оцюнясна мярьгсть пчкафти: «Тячи ваймамань ши, койть коряс аф мярьгови тейть кандомс ацамце».

¹¹ Сон каршезост корхтай: «Кие монь пчкафтомань, Ся мярьгсь тейне: "Сявк ацамцень и якак"».

¹² Сонь кизефтезь: «Кие Ся Ломанць, конац мярьгсь тейть: "Сявк ацамцень и якак"?»

¹³ Но пчкафсь ашезе сода, кие Сон, сяс мес Иисус кяшевсь тостонь ломаттнень ёткс.

¹⁴ Сямольде Иисус васьфтезе сонь Шкаень кудса и азозе тейнза: «Вов, тон пчкять; оду тят сувсе пежес, афоль лисе мархтот мезевок сяда кальдяв».

¹⁵ Ся ломанць тусь и пачфтезе еврейхнень оцюняснонды: сонь пчкафтыец – Иисус.

¹⁶ Оцюнятне кармасть панцемонза Иисусонь, мяльсноль шавомс Сонь, сяс мес Сон тиендсь тяфтама тефт ваймамань шиня.

¹⁷ Но Иисус корхтась тейст: «Алязе фалу тевса, стане Монга тевсан».

¹⁸ Эста еврейхнень оцюняснон нинге сяда пяк кемокснесь мяльсна шавомс Сонь, сяс мес Сон аф аньцек колсезе ваймамань шить, но и Шкайть лемнезе Эстейнза Алякс, тянь мархта латцезе Эсь прянц ряцок Шкайть мархта.

Шкаень Цёрать азорксшиц

¹⁹ Тянь каршес Иисус мярьгсь: «Видеста корхтан тейнть: Цёрати мезевок аф тиеви Эсьстонза, кда аф няйсы, мезе тии Аляц. Вдь мезе тии Алясь, сянь тисы Цёрацка.

²⁰ Алясь кельгсы Цёранц и няфнесы Тейнза семботь, мезть тиендьсы Сонць. Сон няфти Тейнза нинге сяда оцю тефт, и тинь эздост дивас пратада.

²¹ Вдь кода Алясь вельмафнесыне кулофнень и максы тейст эряф, стане Цёрацка максы эряф сянди, кинди ули мялец максомс.

²² Алясь киньге аф судендасы, но судендамань сембе тефнень максозень Цёранцты,

²³ сембе ванондолезь Цёрать мяленц, кода ванондсазь Алятьке мяленц. Кие аф ванцы Цёрать мяленц, ся аф ванцы Алятьке мяленц, кона Сонь кучезе.

²⁴ Видеста корхтан тейнть: кие кулхцондсы Монь валозень и кемай Монь Кучиезти, сянь ули пефтома эряфоц. Сон аф ули судендаф, сон ни ётась куломать эзда эряфти.

²⁵ Видеста корхтан тейнть: сашенды пингсь, и сась ни, мзярда кулофне марясазь Шкаень Цёрать вайгяленц, и кит марясазь вайгяленц, сят кармайхть эряма.

²⁶ Вдь кода Алясь эряфонь максы лихтибря, стане Цёранцка Сон тиезе эряфонь максы лихтибрякс,

²⁷ и макссь Цёранцты азорксши ётафтомс судтьке, сяс мес Сон – Ломанень Цёрась.

²⁸ Тяда диванда тянди; вдь сай пинге, мзярда сембе кулофне марясазь Сонь вайгяленц

²⁹ и лисихть калмостост: паронь тиендихне вельмайхть эряфти, а кяжень тиендихне – судс.

³⁰ Тейне мезевок аф тиеви Эсьстон. Кода кошардсамань Алязе, стане судендан, и Монь судендамазе виде: вдь Мон тиендян аф Эсь мялезень, а Кучиезень, Алязень мяленц коряс».

Иисусонь колга няфтематне-азондоматне

³¹ «Кда азондан Эсь колган Монць, эста азондомазе аф ули афкуксонь.

³² Ули колган лия азонды: и Мон содаса – сон азондсы видеть.

³³ Тинь кучседе Иоаннонди ломатть; и сон азондозе видеть.

³⁴ Сембе сяка Тейне аф эряви ломанень пяльде азондомась; тянь корхтаса аньцек тинь идемантень инкса.

³⁵ Иоанн ульсь кода палы и вандолды валдоптома; а тинь мялентель аньцек аф ламос кеняртькшнемс сонь валдонцты.

³⁶ Но Монь ули лия няфтемазе-азондомазе, кона сяда оцю Иоанноннеть коряс: ся тефне, конатнень путозень лангозон Алязе и конатнень Мон тиендьсайне. Ня тефне няфнесазь – Монь кучемань Алязе.

³⁷ И Алязе, кона кучемань Монь, Сонць азондсь колган. А тинь Сонь вайгяленц мзярдовок ашесть куле, шаманцка ашесть няе.

³⁸ И аф кирдьсасть седисонт Сонь валонц, сяс мес тинь аф кематада Кучфонцты.

³⁹ Тинь тонафнесасть Сёрматфксть, сяс мес арьсетяда вельденза пачкодемс пефтома эряфти; а сон корхтай Монь колган.

⁴⁰ Но тинь аш мяленте самс Тейне эряфонкса.

⁴¹ Тейне аф эряви шнама ломаттнень эзда.

⁴² Содатядязь тинь: потмосонт аш Шкайти кельгома.

⁴³ Мон сань Алязень лемса и тинь аф васьфнесамасть; а кда сай лия эсь лемсонза, сянь васьфтьсасть.

⁴⁴ Кода тинь карматада кемама, кда фкя-фкянь кядьста учсетяда шнама, а фкя-тяка Шкайть эзда шнама аф вешенттяда?

⁴⁵ Тяда арьсе, бта Мон карман муворгофнемонт Алязень инголе; ули тинь муворгофтыенте – Моисей, конань лангс тинь надиятада.

⁴⁶ Кда тинь кемаледе Моисеенди, эста тинь кемаледе Тейненге, сяс мес сон сёрмадсь Монь колган.

⁴⁷ Кда ни сонь сёрматфонзонды аф кематада, кода карматада кемама Монь валненди?»