Иоанн 4 - Од Соткс Новый Завет на мордовском-мокша языке 2016

Иисус корхтай Самариянь авать мархта

¹ Фарисейхне марязь: Иисусонь тонафнидонза и кстиндафтонза сяда лама Иоаннонь коряс,

² хуш Иисус Сонць ашезь кстиндакшне, тянь тиендезь Сонь тонафниенза.

³ Мзярда Иисус содазе, мезе кульсть колганза фарисейхне, Сон кадозе Иудеять и тусь меки Галилеяв.

⁴ А Тейнза эрявсь ётамс Самария масторть пачк.

⁵ Тяфта Сон сась Самариянь Сихарь ошу. Тя ошсь ащесь ся паксять ваксса, конань Иаков кунардонь пингоня максозе Иосиф цёранцты.

⁶ Тоса ульсь Иаковонь эшиц. Иисус сизесь стака кить эзда, и сяс озась эшить ваксс. Тя ульсь котоце частть маласа.

⁷ Самариянь фкя ава сась веденкса. Иисус корхтай тейнза: «Макст Тейне симомс».

⁸ Ся пингть тонафниенза туфтольхть ошу ярхцамбялень рамама.

⁹ Авась корхтай Тейнза: «Кода Тон, евреень ломань, анат симомс Самариянь ломанть кядьста?» Вдь еврейхне самарияннетнень мархта ашесть ладя.

¹⁰ Иисус каршезонза мярьгсь: «Содандярялить Шкайть казненц и Кие корхтай тейть: "Макст Тейне симомс", эста тон тонць аналеть кядьстонза, и Сон максоль тейть эряфонь максы ведь».

¹¹ Авась корхтай Тейнза: «Пара ломань! Тейть аш мезьса амолдамска, а эшись крхка: коста Тейть таргави эряфонь максы ведсь?

¹² Дяряй Тон Иаков атянь-атядонк оцюват, Иаковда, кона максозе тейнек тя эшить, и эздонза сонцьке симондсь, цёранзовок, жуватанзовок?»

¹³ Иисус корхтай тейнза: «Кие сими тя ведьта, сянь тага сай симомац;

¹⁴ а кие сими ведьта, конань Мон максса, сянь симомац мзярдовок аф сай. И ведсь, конань Мон максса тейнза, потмосонза тиеви лихтибрякс, конань ведец максы пефтома эряф».

¹⁵ Авась корхтай Тейнза: «Пара ломань! Макст тейне тяфтама ведь, эста симомазе аф сай и аф эряви тейне сашендомс тяза веденкса».

¹⁶ Иисус корхтай авати: «Архт тертьк мирдценьге тяза».

¹⁷ Авась мярьгсь: «Монь аш мирдезе». Иисус корхтай тейнза: «Видеть азыть: мирдце аш,

¹⁸ вдь тонь ульсть вете мирттне, и ся, кона тяни эряй мархтот, аф мирдце; видеста корхтать».

¹⁹ Авась корхтай Тейнза: «Пара ломань! Няйса, Тон пророкат.

²⁰ Вов минь атянь-атяньке сюконякшнесть Шкайти тя пандть пряса; а тинь, еврейхне, корхтатада: вастсь, коса эряви сюконякшнемс, аньцек Иерусалимса».

²¹ Иисус мярьгсь: «Кемак Тейне, сашенды пингсь, мзярда афи тя пандть пряса, афи Иерусалимса карматада сюконякшнема Шкай Аляти.

²² Тинь аф содасасть, кинди сюконякшнетяда; а минь содасаськ, кинди сюконякшнетяма, сяс мес еврейхнень ширде сай идемась.

²³ Но сай пинге, сась ни, мзярда афкуксонь сюконякшнихне кармайхть озондома Аляти Ваймопожфса и видешиса; вдь тяфтама сюконякшнихнень Алясь вешендьсыне Эстейнза.

²⁴ Шкайсь – Ваймопожф, и Тейнза озондыхненди эряви сюконякшнемс Ваймопожфса и видешиса».

²⁵ Авась корхтай Тейнза: «Содаса, сай Мессиясь, лиякс мярьгомс, Христоссь. Мзярда Сон сай, Сон азсы тейнек семботь».

²⁶ Иисус корхтай тейнза: «Тя Монан, Тя, кие корхтай мархтот».

²⁷ Тя ёткть састь Иисусть тонафниенза и таяскодсть, мес Сон корхтай ава мархта; но кивок эздост ашезе кизефте: «Мезе вешендят?» али «Мезень колга корхнят мархтонза?»

²⁸ Эста авась кадозе кукшененц, мрдась ошу и корхтай ломаттненди:

²⁹ «Арда ваность Ломанть, кона азондозе тейне семботь, мезе мон тиень. Пади Сон Христоссь?»

³⁰ Ломаттне лиссть ошста и тусть Иисусти.

Нуманди кенерьф паксят

³¹ Сяка пингть тонафнихне эняльдсть Иисусти: «Равви! Ярхцак».

³² Но Сон мярьгсь тейст: «Монь ули ярхцамбялезе, конань тинь аф содасасть».

³³ Тонафниенза корхтасть эсь ётковаст: «Дяряй кивок макссесь Тейнза ярхцамс?»

³⁴ Иисус мярьгсь тейст: «Монь ярхцамбялезе – ваномс Кучиезень мяленц и педа-пес тиемс Тейне максф тевонц.

³⁵ Дяряй тинь аф корхнетяда: "Тага ниле кофт, и сай нумась"? А Мон корхтан тейнть: панжесть сельмонтень и ванода видеф паксятнень лангс, кода синь акшелгодсть и кенерсть нумати.

³⁶ Нуйти пандыхть тяникиге, и сон урядасы сёроть пефтома пингонь эряфти; эста видиське и нуйське марса кенярдихть.

³⁷ Тяса ладяй азомс тяфтама валмуворкс: "Фкясь види, омбоцесь нуй".

³⁸ Мон кучедязь тинь сёронь урядама ся паксять лангста, конань тинь ашесть сока: лиятне покодсть, а тинь кочкасасть сёроснон».

Ламоц Самариянь эряйхне ушедсть кемама Иисусти

³⁹ И ся ошста лама Самариянь ломань кармась кемама Иисусти авать валонзон инкса, кона мярьгсь: «Сон азозе семботь, мезе мон тиендень».

⁴⁰ Сяс Самариянь эряйхне, мзярда састь Иисусти, эняльдсть Тейнза ащемс ширесост; и Сон ащесь тоса кафта шит.

⁴¹ И нинге сяда лама ломань кармась кемама Иисусти, сяс мес марязь Сонь валонзон.

⁴² А ся авати корхтасть: «Кематама ни аф тонь валхнень инкса; минць кулхцондоськ Иисусть и содасаськ: Сон афкукс масторлангть Идиец, Христоссь».

Иисус пчкафтсы оцюнять цёранц

⁴³ Ся кафта шида меле Иисус тусь Самарияста Галилеяв.

⁴⁴ Иисус Сонць азозе, пророкть эсь шачема масторсонза прорококс аф лувондсазь.

⁴⁵ Мзярда сась Галилеяв, тостонь эряйхне васьфтезь Сонь пара мяльса. Вдь синь якасть Иерусалиму Очижинь илати и няезь семботь, мезе Сон тись тоса.

⁴⁶ Вов Иисус тага сась Галилеянь Канав, коса тиезе ведть винакс. Капернаум ошса ульсь фкя аля, кона оцязорть ширеса ульсь оцюнякс, и сонь сярядсь цёрац.

⁴⁷ Мзярда оцюнясь марязе: Иисус Иудеяста сась Галилеяв, сон мольсь Тейнза и эняльдсь молемс пялонза и пчкафтомс цёранц, конац ульсь кулома лангса.

⁴⁸ Иисус мярьгсь тейнза: «Тинь аф кематада, кда аф няйхтяда тяштькст и дивань тефт».

⁴⁹ Оцюнясь корхтай Иисусти: «Азор! Сак, мзярс нинге ашезь кула цёразе».

⁵⁰ Иисус корхтай тейнза: «Архт, цёраце кармай эряма». Оцюнясь кемась Иисусть валонцты и тусь.

⁵¹ Ки лангса васьфтезь сонь покодиенза и мярьгсть: «Цёраце шумбра».

⁵² Сон кизефтезе кядьстост: «Кона пингста тейнза арась сяда тёждя?» Тейнза мярьгсть: «Исяк сисемце частса псиц прась».

⁵³ Тянь коряс алясь содазе: ся ульсь сяка частоня, мзярда Иисус азозе тейнза: «Цёраце кармай эряма». Алясь кармась кемама Иисусти сонць и кудсонза сембе эряйхневок.

⁵⁴ Тя омбоце тяштьксть Иисус тиезе Иудеяста Галилеяв мрдамдонза меле.