Иоанн 20 - Од Соткс Новый Завет на мордовском-мокша языке 2016

Иисусонь вельмамац

¹ Недляшиня, шобдавакиге, мзярда нинге ашезь варьхмоде, Магдалань Мария сась калмоть ваксс, и няезе: кевсь калму сувама вастста веляфтф.

² Сон ласьксь Симон Пёторонди и омбоце тонафнити, конань кельгозе Иисус, и корхтай тейст: «Калмоста Азорть лихтезь, афи содасаськ, ков Сонь путозь!»

³ Эстокиге лиссть Пётр и омбоце тонафнись и тусть калмоти.

⁴ Синь кафцьке тусть ласькозь; но омбоце тонафнись ласьксь сяда вишкста, и сась калмоть ваксс васенцекс.

⁵ Сон комась и няйсы: иляназонь котфсь тосоль. Но калму ашезь сува.

⁶ Мельганза сась Симон Пётр, сувась калму и няезе тоса иляназонь котфть

⁷ и ся котфкять, конань мархта ашкотфоль Иисусть пряц. Аньцек ся котфкясь аф марсоль иляназонь котфть мархта, а тапардафста путфоль башка.

⁸ Эста омбоце тонафниське, кона сась калмоть ваксс сяда инголи, сувась, няезе тянь и кемась.

⁹ Синь вдь нинге ашезь шарьхкоде Сёрматфксста тяштьфть: Тейнза вельмама кулофнень эзда.

¹⁰ Сяльде тонафнихне мрдасть куду.

Иисус няфти пря Магдалань Мариянди

¹¹ А Мария ащесь калмоть ваксса и авардсь. Сон авардезь комась калмоти

¹² и няйсы: ся вастса, коза инголи путфоль Иисусть ронгоц, озафт акша щамса кафта ангелхт, фкясь озаф пряпеса, омбоцесь пильгопеса.

¹³ Синь пшкядсть тейнза: «Ава! Мес авардят?» Мария корхтай тейст: «Лихтезь монь Азорозень, афи содаса, ков путозь».

¹⁴ Азозе тянь, шарфтсь меки и няйсы: инголенза ащи Иисус; аньцек тейнза Иисус ашезь содав.

¹⁵ Иисус кизефнесы: «Ава! Мес тон авардят? Кинь эса вешендят?» Мария арьсесь: тя – иможберень мельге якайсь, корхтай Тейнза: «Пара ломань! Кда Тон лихтить Сонь, азк тейне, ков Сонь путыть, и мон молян сявса».

¹⁶ Иисус корхтай тейнза: «Мария!» Мария шарфтсь ширезонза и мярьги Тейнза еврейкс: «Раввуни!», тя валсь шарьхкодеви кода «Тонафты!»

¹⁷ Иисус корхтай тейнза: «Тямак токсе Монь, сяс мес Мон нинге ашень кеподев вяри Алязти. Архт, азонтк мала ялганенди: "Туян меки Алязти, кона тиньге Алянте, Монь Шкаезти, кона тиньге Шкаенте"».

¹⁸ Магдалань Мария мольсь и корхтай тонафнихненди: «Няине Азорть!» И сон пачфтезе тейст ся кулять, конань тейнза азозе Иисус.

Иисус няфти пря тонафнихненди

¹⁹ Сяка шиня, недляшиста илять Иисусонь тонафниенза пуромсть марс и еврейхнень эзда пелемада пякстазь кудгенкшнень. Апак учсек сась Иисус, арась кучказост и корхтай тейст: «Сетьмоши тейнть!»

²⁰ Сяльде няфтезень тейст Эсь кядензон, пильгонзон и ирдезонзон. Тонафниенза кенярдсть Иисусть няемста.

²¹ Иисус мярьгсь тейст омбоцеда: «Сетьмоши тейнть! Кода Алязе кучемань Монь, стане Монга кучтядязь тинь».

²² Мярьгсь тяфта, уфась ширезост и корхтай тейст: «Сявость Иняру Ваймопожфть.

²³ Кинь пежеснон нолдасасть, сятнень лангста нолдавихть; кинь лангс кадсасть, сятнень лангс лядыхть».

Иисус няфти пря Фоманди

²⁴ Мзярда сашендсь Иисус, кемгафтувотнень ёткста фкясь, Фома, конанди лиякс мярьгондсть Кафтась, мархтост ашель.

²⁵ Лия тонафнихне азозь Фоманди: «Минь няеськ Азорть». Но сон мярьгсь тейст: «Мзярс аф няйсайне Сонь кядензон эса эськса пяльф варятнень, и эзост аф тонгса сурозень, а бокстонза пяльф вастти кядезень, аф кеман!»

²⁶ Кафкса шида меле Иисусть тонафниенза тага пуромкшнесть марса, Фомавок мархтостоль. Кенкшне пякстафтольхть, но Иисус сувась, арась кучказост и мярьгсь: «Сетьмоши тейнть!»

²⁷ Тяда меле корхтай Фоманди: «Венептьк сурцень тяза, варжайть кяднень; венептьк кядцень и тонк боксон пяльф вастти. Тят уле аф кемай ломанькс, но ульхть кемайкс».

²⁸ Фома мярьгсь Сонь каршезонза: «Монь Азорозе и Шкаезе!»

²⁹ Иисус корхтай тейнза: «Тон кемать, мес няемайть Монь. Павазуфт сят, конат апак няйхть кемайхть».

³⁰ Лама лия тяштькста тись Иисус Эсь тонафниензон инголе, конатнень колга апак сёрматт тя книгаса.

³¹ А мезсь сёрматф, сёрматф вага мезенди – кемаледе: Иисус – тя Христоссь, Шкайть Цёрац, и Тейнза кемазь, тейнть ули максф эряф Сонь вельденза.