Иоанн 2 - Од Соткс Новый Завет на мордовском-мокша языке 2016

Канаса рьвяямань илась

¹ Сяда меле колмоце шиня Галилеянь Кана ошса ётафтовсь рьвяямань ила, и Иисусонь тядяц ульсь тоса.

² Иисусовок тонафниензон мархта тертьфоль тя илати.

³ Мзярда тоса ашезь сата винасна, тядяц пшкядсь Иисусти: «Синь винасна аделавсь».

⁴ Иисус мярьги тейнза: «Вай, ава, кали тя Монне али тонне тевсь? Монь пингозе нинге ашезь са».

⁵ Тядяц пшкядсь покодихненди: «Мезе Сон мярьги, сянь тиесть».

⁶ Тоса ульсть кевста тиф кота оцю кукшетть. Синь путфтольхть тоза евреень аруяфтомань койхнень ванфтоманкса. Эрь кукшенти тяльгондсь кафтошка али колмошка мера ведь.

⁷ Иисус корхтай покодихненди: «Пяшкодесть кукшеттнень ведьта». Пяшкодезь синь вельф.

⁸ И мярьги тейст: «Тяни амолдада и кандость рьвяямань илань вятити». Сят амолдасть и кандозь.

⁹ Мзярда илань вятись копордась ведьта, кона тиевсь винакс, – а сон ашезе сода, коста тя винась; содазь аньцек покодихне, конат амолясть ведь, – эста илань вятись тердезе рьвяяйть

¹⁰ и корхтай тейнза: «Эрь ломанць васенда канды цебярь вина, а мзярда инжихне иредихть – сяда кальдявня; а тон тнярс ванфтыть цебярь винать».

¹¹ Тяфта Иисус Галилеянь Кана ошса тиезе васень тяштьксонц и тянь вельде няфтезе Эсь оцюшинц, и тонафниенза кармасть кемама Тейнза.

¹² Тяда меле Сон сась Капернаум ошу: Сонць, тядяц, брадонза, тонафниензовок; тоса ащесть аф куватьс.

Иисус панцесыне Шкаень кудста мишендихнень-рамсихнень

¹³ Малаткшнесь еврейхнень Очижисна, и Иисус тусь Иерусалиму.

¹⁴ Сон няезе: Шкаень кудса мишендевсть букат, учат, гуленят, тязк озсефтольхть ярмаконь полафнихне.

¹⁵ Иисус тись лама пикскаста локша, сембонь панезень Шкаень кудть пирьфстонза учаснон и букаснон мархта; ярмаконь полафнихнень ярмакснон ёрязень келес, а шраснон веляфнезень.

¹⁶ Гуленянь мишендихненди мярьгсь: «Сявость тяста семботь тянь; и тясть тиенде Алязень кудонц мишендемань-рамсемань вастокс!»

¹⁷ Ся ёткть Сонь тонафниенза лятфтазь, мезе азфоль Сёрматфксса: «Кельгомась Тонь кудцти пидесы седизень».

¹⁸ Тянь каршес еврейхне мярьгсть: «Кодама тяштьксса Тон няфтьсак тейнек, ули али аш азорксшице тяфта тиендемс?»

¹⁹ Иисус мярьгсь тейст: «Калафтость тя Шкаень кудть, и Мон колма шиста путса сонь меки».

²⁰ Еврейхне каршезонза: «Тя Шкаень кудть эса путсть нильгемонь котува киза, и Тон колма шиста путсак сонь?»

²¹ Но Иисус, Шкаень кудть колга корхтамста, корхтась Эсь ронгонц колга.

²² Мзярда Сон вельмась кулофнень эзда, эста тонафниензон мяльс лядсь азфоц, и кармасть кемама Сёрматфксти и валти, конань азозе Иисус.

Иисус содасыне ломаттнень потмонь мяльснон-арьсемаснон

²³ Мзярда Иисус Очижинь ёткова ульсь Иерусалимса, ламотне кемасть Тейнза тиф тяштьксонзон няемста.

²⁴ Сонць Иисус марнек седиенц тейст ашезе панчсе, сяс мес содазень, кодапт синь.

²⁵ Тейнза ашезь эряв: кивок мезевок азондоль ломаттнень колга, Сон Сонць содазе, мезе эрь ломанть седиса.