Иоанн 19 - Од Соткс Новый Завет на мордовском-мокша языке 2016

¹ Эста Пилат сявозе Иисусонь и максозе Сонь пикссемс локшеса.

² Ушматтне кодасть сялги тишеста каштаз и щафтозь Сонь прязонза, а лангозонза щафтсть шобдаза-якстерь щам.

³ Синь корхтасть: «Ульхть шумбра, еврейхнень Оцязорсна!» И эрьхнезь Сонь шама ланга.

⁴ Пилат тага лиссь и мярьгсь еврейхненди: «Вага, мон лихтьса Сонь тейнть, содалесть: мон кодамовок туфтал аф мушендан Сонь муворгофтомс».

⁵ Эста лиссь Иисус сялги тишень каштазса и шобда-якстерь щамса. Пилат мярьгсь тейст: «Вага Ломанць!»

⁶ Но мзярда озксвятиень оцюнятне и Шкаень кудонь ваныхне няезь Иисусонь, синь кармасть юватькшнема: «Эськотьк, эськотьк Сонь крёзти!» Пилат корхтай тейст: «Тинць сявость Сонь и эськодесть крёзти; вдь мон кодамовок туфтал аф мушендан Сонь муворгофтомс».

⁷ Каршезонза еврейхне мярьгсть: «Минь ули коеньке, и минь коеньконь коряс Тейнза кулома, сяс мес Эсь прянц лемдезе Шкайти Цёракс».

⁸ Тянь кулемста Пилат нинге сяда пяк пелезевсь,

⁹ меки сувась азоргуду и мярьгсь Иисусонди: «Тон костоннят?» Иисус каршезонза мезевок ашезь аза.

¹⁰ Пилат корхтай Тейнза: «Аф корхтат монь мархтон? Дяряй аф содасак: монь ули виезе эськодемс Тонь крёз лангс и ули виезе нолдамс Тонь?»

¹¹ Иисус каршезонза мярьгсь: «Монь лангсон вийце ули аньцек сяс, мес сон тейть максф вярде. Сяс сяда оцю пежец сянь, кие Монь максомань тейть».

¹² Иисусонь ня валонзон меле Пилат ёразе нолдамс Сонь. Но ломаттне юватькшнесть: «Кда нолдасак Сонь, кесарти тон аф ялгат. Кие эсь прянц тиендьсы оцязоркс, моли кесарть каршес».

¹³ Тянь марямста Пилат лихтезе Иисусть и озась судендама вастти, конань лемоц Кевса-ацаф, еврейкс Гаввафа.

¹⁴ Тя ульсь Очижида ингольдень шиня, котоце частть маласа. Пилат мярьгсь еврейхненди: «Вага, тинь Оцязоронте!»

¹⁵ Но синь кармасть юватькшнема: «Сявк, сявк, эськотьк Сонь крёзти!» Пилат корхтай тейст: «Тинь монь кядьстон ёратада крёз лангс эськотьфтемс эсь Оцязоронтень?» Озксвятиень оцюнятне каршезонза: «Минь аш оцязороньке, кесарьда башка».

¹⁶ Эста сон максозе Иисусонь эськодемс крёз лангс. И ушматтне сявозь Сонь эсь мархтост.

Иисусонь крёз лангс эськодемац

¹⁷ Эсь крёзонц кандомста Иисус лиссь ся вастти, конань лемоц Пряпакарь, еврейкс Голгофа.

¹⁸ Тоса Сонь эськодезь крёз лангс и ваксозонза эськодсть лия кафта ломатть кафта пяльге, а кучкати Иисусонь.

¹⁹ Пилат мярьгсь крёзть лангс повфтамс сёрматфкс: «Назаретонь Иисуссь, Еврейхнень Оцязорсна».

²⁰ Тя сёрматфть лувондозь еврейхнень ёткста ламотне, сяс мес вастсь, коса эськотьфоль Иисус, аф ичкозель ошть эзда. Сёрматфоль евреень, греконь и римонь кяльса.

²¹ Озксвятиень оцюнятне мярьгсть Пилатонди: «Тят сёрмада "Еврейхнень Оцязорсна", а сёрматт тяфта: "Сонць лемнезе прянц: Мон Еврейхнень Оцязорснан"».

²² Пилат каршезост мярьгсь: «Мезе сёрмадонь, сянь сёрмадонь».

²³ Иисусть эськодемда меле ушматтне сявозь лангань щамонзон и явозь нилева, эрь ушманти пялькс. Синь сявозь панаронцка, конань ашельхть стафксонза, а марнек кодафоль.

²⁴ Ушматтне мярьгсть фкя-фкянди: «Аф карматама сязендемонза, а каятама жерьба, кинди саты». Вдь эрявсь пяшкодевомс Сёрматфксса азфти: «Явозь Монь щамнень эсь ётковаст, Монь щамнень инкса кайсесть жерьба». Вов тяфта тисть ушматтне.

²⁵ Иисусонь крёзонц ваксса ащесть Сонь тядяц, тядянц сазороц, Клеопань рьвац Мария и Магдаласта Мария.

²⁶ Иисус няезе тядянц и тоса ащи тонафниенц, конань кельгозе. Корхтай Эсь тядянцты: «Ава! Тя тонь цёраце».

²⁷ Тяда меле корхтай тонафниенцты: «Тя тонь тядяце!» Тонафниец тяда меле сявозе Иисусонь тядянц эсь пялонза.

Иисусонь куломац

²⁸ Иисус тяни содазе: сембось тиевсь. Сяс мярьгсь Сёрматфксть пяшкодевоманц инкса: «Симомазе сась».

²⁹ Тяса ульсь кядьгоня, пяшкотьф уцез шапама винада. Ушматтне навасть винати ведьбанга, сотозь иссоп тарадонь пес и токафтозь Сонь трванзонды.

³⁰ Мзярда Иисус варжазе шапама винать, мярьгсь: «Тиевсь!» Комафтозе прянц и ваймоц лиссь.

³¹ Эста ульсь пяденця. Еврейхнень оцюняснон ашель мяльсна кадомс крёз лангса эськотьф ловажатнень ваймама шинди, сяс мес ся ваймамань шиня ётафтовсь пяк оцю ила. Синь эняльдсть Пилатонди тапафтомс эськотьфнень пильгосяярьснон и валхтомс ловажатнень.

³² И тяфта, мольсть ушматтне, тапазь пильгосяярензон васенцеть, омбоцетьке, конат ульсть эськотьфт Иисусть ваксса.

³³ Но кодак састь Иисусть малас и няезь Сонь ни кулофста, пильгосяярензон ашезь тапа;

³⁴ но ушматтнень эзда фкясь кувака сялгоманц пезфтазе Сонь ирдезонзон ёткс, и эстокиге тусь ведь мархта вер.

³⁵ Ся, кие няезе тянь эсь сельмосонза, азондозе тянь – тиньге кемаледе. Сонь азондомац виде и сон содасы: корхтасы видеть.

³⁶ Вдь тяфта лиссь, пяшкодеволь Сёрматфксть валоц: «Сонь фкявок пакарец аф ули тапаф».

³⁷ Лия вастсовок Сёрматфкссь корхтай: «Ваныхть Сянь лангс, конань сялгозь».

Иисусонь калмамац

³⁸ Тяда меле Аримафеяста Иосифсь эняльдсь Пилатонди валхтфтомс Иисусонь ловажанц. Иосиф ульсь Иисусть тонафниец, аньцек кяшендезе тянь, сяс мес пельсь еврейхнень эзда. Пилат мярьгсь валхтомс Иисусонь ловажанц. Иосиф мольсь и валхтозе.

³⁹ Нинге сась Никодим, сяка ломанць, кона весть сашендсь Иисусти веньгучкать. Сон кандсь колмогемоньшка литра танцти шине вай, тиф алойста и смирнаста.

⁴⁰ Синь сявозь Иисусонь ловажанц и ашкодозь иляназонь котфса танцти шине шоряфкс мархта, кода тиендихть еврейхне калмамста.

⁴¹ Ся вастса, коса эськотьфоль Иисус, ульсь иможбере и тоса кевбандти карафоль од калма, коза нинге киньге ашезь путне.

⁴² А сяс мес тя ульсь ваймамань шити анокламань ши и калмось маласоль, Иисусонь путозь эзонза.