Иоанн 18 - Од Соткс Новый Завет на мордовском-мокша языке 2016

Иисусонь кундамац

¹ Тянь азомда меле Иисус Эсь тонафниензон мархта тусь Кедрон шудерьксть тона пяли. Тоса ульсь иможбере, коза Сон сувась тонафниензон мархта.

² А тя вастть содазе Иудавок, Иисусть мииец; вдь Иисус тонафниензон мархта сидеста якась тов.

³ И вага Иуда сась тов, мархтонза вятсь Римонь ушматт и Шкаень кудонь ваныхть, конатнень кучезь озксвятиень оцюнятне и фарисейхне. Сембонь кядьса ульсть тюрембяльхть и валдоптомат-месть.

⁴ А Иисус содазе семботь, мезе тиеви мархтонза, лиссь и мярьгсь тейст: «Кинь вешенттяда?»

⁵ Азозь Тейнза: «Назаретонь Иисусть». Иисус корхтай тейст: «Тя – Монан». Ётксост ульсь Иудавок, Сонь мииец.

⁶ И мзярда Иисус мярьгсь тейст: «Тя – Монан», синь потасть и прашендсть модать лангс.

⁷ Иисус тага кизефтезень синь: «Кинь вешенттяда?» Сят мярьгсть: «Назаретонь Иисусть».

⁸ Иисус каршезост мярьгсь: «Мон мярьгонь тейнть: тя Монан. Сяс, кда Монь вешендьсамасть, нолдасть мархтоннетнень, катк туйхть».

⁹ Сон мярьгсь тяфта, сяс мес эрявсь пяшкодевомс Сонь валонзонды: «Сятнень ёткста, конатнень Тон максыть Тейне, Мон киньге ашине юмафта».

¹⁰ Симон Пёторть ульсь тороц. Сон таргазе торть, яфодсь мархтонза и керозе озксвятиень оцюнять покодиенц види пиленц. Покодить лемоцоль Малх.

¹¹ Но Иисус мярьгсь Пёторонди: «Путк торцень вастозонза. Дяряй Тейне аф симома кядьгось, конань максозе Тейне Алязе?»

Иисусть вятьсазь Аннанди

¹² Эста Римонь ушматтне оцюняснон мархта и Шкаень кудонь ваныхнень мархта сявозь Иисусонь и сотнезь Сонь.

¹³ Васенда Сонь вятезь Аннанди; ся ульсь Каиафань атявозец, а Каиафа ся кизоня озксвятиень оцюняль.

¹⁴ Тя ульсь ся Каиафась, кона макссь еврейхнень оцюняснонды стама мяль-арьсема: сяда цебярь ули, кда фкя ломань кулы ломаньтналть инкса.

Пётр потай Иисусонь эзда

¹⁵ Иисусонь мельге мольсть Симон Пётр и тага фкя тонафни. Тя тонафнись ульсь озксвятиень оцюнять содафоц, сясы сувась Иисусонь мархта озксвятиень оцюнять пирьфс,

¹⁶ а Пётр лядсь ортать ваксс ушеса. Сяльде ся тонафнись, кона озксвятиень оцюнять содафоцоль, лиссь и корхнесь ортань ваны авать мархта и сувафтозе Пёторонь пирьфи.

¹⁷ Тяса ортань ваны авась корхтай Пёторонди: «Улема, тонга Ся Ломанть тонафниензон эзда?» Сон мярьгсь: «Аф».

¹⁸ Якшамоль, сяс покодихне и Шкаень кудонь ваныхне плхтасть седень толмар, ащесть вакссонза и эжендсть. Пёторга ащесь мархтост и эжендсь.

Анна озксвятиень оцюнясь кизефнесы Иисусонь

¹⁹ Озксвятиень оцюнясь кизефнесь Иисусонь кядьста Сонь тонафниензон и тонафтоманц колга.

²⁰ Иисус каршезонза мярьгсь: «Мон корхнень масторлангти панжада, сембонь ингольде. Мон най тонафтонь синагогава и Шкаень кудса, коза еврейхне фалу пуромкшнихть марс. Салава мезевок ашень корхне.

²¹ Мес Монь кизефнесамак? Кизефтить сятнень, кит марямазь, мезе Мон корхнень тейст; вов, синь содасазь, мезе Мон корхнень».

²² Мзярда Иисус тянь азозе, Шкаень кудонь ваныхнень эзда фкясь, кона ащесь сяда маласа, эрьхтезе Сонь шама ланга и мярьгсь: «Тяфта Тон корхтат озксвятиень оцюняти?!»

²³ Иисус каршезонза мярьгсь: «Кда мярьгонь аф лац, няфтьк, мезсь кальдяв; а кда видеть азыне, эста мес эрьхтемайть?»

²⁴ Анна кучезе Иисусонь сотнефста Каиафа озксвятиень оцюняти.

Пётр тага потай Иисусонь эзда

²⁵ А Симон Пётр ащесь и эжендсь. Тяса тейнза мярьгсть: «Улема, тонга Ся Ломанть тонафниензон ёткста?» Сон тянь сёпозе и мярьгсь: «Аф».

²⁶ Эста озксвятиень оцюнянь фкя покодись, сянь радняц, конань пиленц керозе Пётр, мярьгсь: «Афоли тонь няихтень иможбереса Ся Ломанть мархта?»

²⁷ Пётр тага сёпсь; и ся пингть моразевсь атякшсь.

Иисус Пилатонь инголе

²⁸ Шобдава Иисусонь сявозь Каиафань пяльде и вятезь Пилатонь азоргудонцты. Синць куду ашесть сува – пельсть гастямада, конань инкса синь афольхть ярхцав Очижинь верозда.

²⁹ Сяс лиссь Пилат и мярьгсь тейст: «Мезьса муворгофнесасть Тя Ломанть?»

³⁰ Синь каршезонза мярьгсть: «Аф улендяряль Сон кальдяв тевонь тии, минь афолеськ вяте Сонь тейть».

³¹ Пилат мярьгсь тейст: «Тинць сявость Сонь и эсь коентень коряс судендасть». Еврейхне каршезонза мярьгсть: «Минь аш азорксшиньке ломанень шавомс».

³² Тя лиссь, сяс мес эрявсь пяшкодевомс Иисусть валонзонды, конатнень вельде Сон шарьхкотьфтезе, кодама куломаса кулы.

³³ Эста Пилат тага сувась азоргуду, тердезе Иисусонь и кизефтезе Сонь: «Тон еврейхнень Оцязорснат?»

³⁴ Иисус каршезонза мярьгсь: «Тонць тянь арьсить, али лиятне азондсть колган?»

³⁵ Пилат мярьгсь каршезонза: «Дяряй мон евреян? Тя Тонцень ломаньтналце и озксвятиень оцюнятне максодязь тейне. Мезе Тон тиеть?»

³⁶ Иисус азозе: «Монь Оцязорксшизе аф тя масторлангонь. Кда улель Монь Оцязорксшизе тя масторлангонь, эста Моннетне тюрельхть инксон и Монь афолемазь макса еврейхнень оцюняснонды. Но Монь Оцязорксшизе аф тястонь».

³⁷ Пилат мярьгсь Тейнза: «Лисенди, Тон Оцязорат?» Иисус каршезонза: «Тон корхтат: Мон Оцязоран. Мон шачень и сань масторлангти видешить колга азондома; сембе, кит видешить эзда, кулхцондсазь Монь вайгялезень».

³⁸ Пилат мярьгсь каршезонза: «Мезсь видеши?» Кизефтемок тянь, тага лиссь еврейхненди, мярьгсь тейст: «Сонь муворгофтомс мон кодамовок туфтал аф мушендан.

Иисусонь куломас судендамац

³⁹ Тинь вдь ули коенте: Очижинди мон нолдан тейнть фкя ломань. Ули мяленте, нолдаса еврейхнень Оцязорснон?»

⁴⁰ Эста сембе кармасть юватькшнема: «Аф Сонь, нолдак Вараввань!» А Варавва ульсь салай-шави ломань.