Иоанн 17 - Од Соткс Новый Завет на мордовском-мокша языке 2016

Иисус озонды Эсь инксонза

¹ Ня валда меле Иисус кеподезе сельмованфонц вяри менели и мярьгсь: «Аляй! Пингсь сась, няфтьк Эсь Цёрацень иневалдонц, Цёрацевок няфтелезе Тонь иневалдцень.

² Тон максоть Тейнза азорксши сембе ломаттнень лангса, вага мезенди: максоль Сон пефтома эряф сембонди сятненди, кинь Тон максыть Тейнза.

³ Вага пефтома эряфсь: содамс Тонь, фкя-тяка виде Шкайть, содамс Тонь кучфценьге Иисус Христость.

⁴ Мон пяшкодине ся тевть, конань Тон Тейне максыть тиемс, тянь вельде няфтине Тонь иневалдцень модать лангса.

⁵ Аляй, тяни Тон няфтьк Монь иневалдозень Эсь ширесот, максомок Тейне ся иневалдть, кона ульсь Монь кядьсон, мзярда Тонь мархтотолень нинге менельть-масторть тиемда инголе».

Иисус озонды Эсь тонафниензон инкса

⁶ «Мон панжине лемцень ломаттненди, конатнень Тон максыть Тейне масторлангста. Синь Тоннетольхть, и Тон максыть синь Тейне, и синь кирдезь Тонь валцень.

⁷ Тяни синь шарьхкодсть: сембось, мезть Тон максыть Тейне, Тонь эздот.

⁸ Валхнень, конатнень Тон максыть Тейне, Мон тейст максыне, и синь сявозь, и афкукс шарьхкодезь: Мон сань Тонь ширдет, и кармасть кемама – Тон кучемайть Монь.

⁹ Мон инксост эняльдян: аф сембе масторлангть инкса эняльдян, но сятнень инкса, конатнень Тон максыть Тейне, сяс мес синь Тоннет.

¹⁰ Монь сембозе – Тонне, и Тоннесь – Монне. Синь вельдест няфтевсь Монь иневалдозе.

¹¹ Мон ни аф масторлангсан, но синь масторлангсот, а Мон саян Тейть. Иняру Аляй! Ванфтыть синь Эсь лемсот, сятнень, конатнень Тон максыть Тейне: улест синь фкя седиса-ваймоса, кода Минь Тонь мархтот фкя седисотама-ваймосотама.

¹² Мзярда Мон улень мархтост масторлангса, Мон ванфтыне синь Тонь лемсот, сятнень, конатнень Тон максыть Тейне. Мон ванфтыне синь, и кивок эздост ашезь юма, ся цёрада башка, конац стясь юмамань-арамань ки лангс Сёрматфксть валонзон пяшкодеманкса.

¹³ Тяни молян Тейть, и сембонь тянь корхтаса масторлангса: синь седисна пяшкодельхть Монь кенярдемасон.

¹⁴ Мон тейст пачфтине Тонь валцень; а масторлангсь кяжи лангозост, сяс мес синь аф масторлангоннет, кода Монга аф тя масторлангоннян.

¹⁵ Эняльдян Тейть аф сявомс синь масторлангста, а ванфтомс синь кальдявда.

¹⁶ Синь аф тя масторлангоннет, кода Монга аф тя масторлангоннян.

¹⁷ Иняруяфтыть синь Эстейть видешить вельде; видешись – Тонь валце.

¹⁸ Кода Тон кучемайть Монь масторлангти, стане Монга кучине синь масторлангстотненди.

¹⁹ Мон инксост максса Эсь прязень иняру озксказнекс, катк синьге иняруяфтовихть видешить вельде».

Иисус озонды сембе кемайхнень инкса

²⁰ «Аф аньцек синь инксост эняльдян, но сятнень инксовок, конат Тейне кемайхть синь валснон коряс.

²¹ Эняльдян, синь сембе улельхть фкя седиса-ваймоса: кода Тон, Аляй, Монь эсонат, и Мон – Тонь эсотан, катк стане синьге улихть Минь эсонк фкя седиса-ваймоса. И масторлангсь кармай кемама: Тон кучемайть Монь.

²² И иневалдть, конань Тон максыть Тейне, Мон максыне тейст: улест фкя седиса-ваймоса, кода Минь Тонь мархтот фкя седисотама-ваймосотама.

²³ Мон синь эсостан, и Тон Монь эсонат. Катк синь марнек улихть фкя седиса-ваймоса. Эста масторлангсь шарьхкодьсы: Тон кучемайть Монь и кельгсайть синь, кода Монь кельгсамак.

²⁴ Аляй! Монь мялезе: кинь Тон максыть Тейне, катк улихть мархтон тоса, косан Мон, катк няйсазь Монь иневалдозень, конань Тон максыть Тейне, сяс мес кельгомайть Монь менельть-масторть тиемда инголе.

²⁵ Видексшинь Аляй! Масторлангсь Тонь аф содатанза; а Мон содате Тонь, нятка кармасть содамонза: Тон кучемайть Монь.

²⁶ И Мон панжине тейст Тонь лемцень, нинге панчса: улель седисост стама кельгома, кодамса Тон кельгсамак Монь, Монга улелень синь седисост».