Иоанн 16 - Од Соткс Новый Завет на мордовском-мокша языке 2016

¹ «Тянь Мон азыне тейнть, афолесть када кемамантень.

² Паттядязь тинь синагогаста, и сай нинге стама пинге, мзярда тинь шавондыенте кармайхть арьсема – тянь вельде сюконяйхть-покодихть Шкайти.

³ Тяфта кармайхть тиендема, сяс мес ашезь сода аф Алязень, аф Монь.

⁴ Мон тянь азыне тейнть вага мезенкса: мзярда сай ся пингсь, лятфталесть: тянь колга Мон тейнть азондонь. Васенда тянь колга ашень корхне тейнть, сяс мес Монць мархтонтолень».

Иняру Ваймопожфть тевоц

⁵ «А тяни молян Кучиезти, и кивок эздонт аф кизефнесамань Монь: "Ков молят?"

⁶ Но сянь эзда, мезе Мон азонь тейнть, седиенте пяшкодсь ризфта.

⁷ Но Мон видеть корхтаса тейнть: Монь тумазе тейнть ули цебяренди. Вдь кда аф туян, Лездысь аф сай тейнть; а кда туян, эста кучса Сонь тейнть.

⁸ Мзярда Сон сай, няфтьсы масторлангть аф виде арьсеманц пежеть колга, видексшиса эрямать и судендамать колга:

⁹ масторлангть пежец тоса, мес аф кемай Тейне;

¹⁰ видексшись тоса: Мон молян Эсь Алязти, и тинь аф няйсамасть ни Монь;

¹¹ а судендамась тоса: тя масторлангть азороц судендаф ни.

¹² Монь нинге лама мезезе ули азомс тейнть; но тяни тейнть ся аф шарьхкодеви.

¹³ А мзярда сай видешити вяти Ваймопожфсь, эста Сон вяттядязь видешить педа-пес шарьхкодеманцты: вдь Сон аф Эсь эздонза кармай корхтама, а корхтасы сянь, мезе маряй, сай пингтьке азсы тейнть.

¹⁴ Сон няфтьсы Монь иневалдозень, вдь мезе Сон азы, сянь сявсы Моннеть эзда и азондсы тейнть.

¹⁵ Сембось, мезсь Алязень, ся Монне; сяс Мон мярьгонь: "Сявсы Моннеть эзда и азондсы тейнть".

¹⁶ Курок Монь ни аф няйсамасть, и курок Монь тага няйсамасть, сяс мес Мон молян Алязти».

Тонафнихнень ризфсна шары кенярдемакс

¹⁷ Эста Сонь тонафниензон ёткста кой-конатне пшкядсть фкя-фкянди: «Мезе тяфта Сон корхтай тейнек: "Курок Монь ни аф няйсамасть, и курок Монь тага няйсамасть", и "Мон молян Алязти"?»

¹⁸ Стане синь корхнесть: «Мезе тяфта Сон корхтай: "Курок ни"? Аф шарьхкодьсаськ, мезе корхтай».

¹⁹ Иисус няезе, синь мяльсноль кизефтемс кядьстонза, азозе тейст: «Афоли тянь колга кизефнетяда фкя-фкянь, мес Мон мярьгонь: "Курок Монь ни аф няйсамасть, и курок Монь тага няйсамасть"?

²⁰ Видеста корхтан тейнть: тинь карматада авардема и явсема, а масторлангсь кенярди; тинь пратада ризфс, но тинь ризфонте шары кенярдемакс.

²¹ Авась шачфтомста маятай, сяс мес сась шачфтома пингоц; но мзярда шачи идец, кенярдемада юкстасы маятаманц, сяс мес масторлангти эвондась ломань.

²² Тяфта тиньге тяни ризнатада; но Мон тинь тага няйхтядязь, и эста кенярди тинь седиенте, и тинь кенярдеманте киндинге аф сявови.

²³ И ся шиня тинь аф кизефтьсамасть мезень колгавок. Видеста корхтан тейнть: мезе аф анатада Алязень кядьста Монь лемсон, макссы тейнть.

²⁴ Тячемс тинь мезевок ашеде анце Монь лемсон; анада, и максови тейнть, улеза пяшксе тинь кенярдеманте».

Иисус сяськозе масторлангть

²⁵ «Тянемс Мон корхнень тейнть валвеляфксса; но сай пинге, мзярда карман корхтама Алязень колга аф валвеляфксса, а видеста.

²⁶ Ся шиня тинь карматада анама Сонь кядьстонза Монь лемсон, и эста Мон ни аф мярьган тейнть: Мон анан Алязень кядьста тинь инксонт;

²⁷ Сонць Алязе кельктядязь тинь, сяс мес тинь кельгомасть Монь и кармаде кемама: Мон сань Шкайть ширеста.

²⁸ Мон сань Алязень ширеста и сань масторлангти; и тяни кадса масторлангть и туян Алязти».

²⁹ Тонафниенза мярьгсть Тейнза: «Вов тяни Тон видеста корхтат, и кодамовок валвеляфкс аф азондат.

³⁰ Тяни шарьхкодьсаськ: Тон семботь содасак, кизефнемдотка инголе ни содасак. Сяс кематама: Тон Шкайть ширде сать».

³¹ Иисус каршезост мярьгсь: «Тяни кематада.

³² Но вов сай пинге, и сась ни: тинь сраттада эсь вастовант и кадсамасть Монь ськамон, но Мон аф ськамонан, Монь мархтон Алязе.

³³ Тянь Мон азыне тейнть, муледе сетьмоши Монь эсон. Масторлангса тинь кармайхть улема пичефксонте; но кирдеда: Мон сяськине масторлангть».