Иоанн 13 - Од Соткс Новый Завет на мордовском-мокша языке 2016

Иисус штасыне тонафниензон пильгснон

¹ Очижинь карша шиня Иисус ни содазе: сась Сонь пингоц кадомс тя масторлангть и меки мрдамс Алянцты. Сон кельгозень Эсь ломанензон, конат эрясть тя масторлангса, кельгозень синь педа-пес.

² Иисус и тонафниенза ётафтозь илядень ярхцамаснон-симомаснон. И идемэвозсь сувафтсь ни Иудать, Симон Искариотонь цёранц седис мяль мимс Иисусть.

³ Иисус содазе: Аляц семботь максозе Сонь кядялонза, и содазе: Сон сась Шкайть ширде и туй Шкайти.

⁴ Сон стясь илядень ярхцамада меле, каязень лангстонза лангань щамонзон, сявсь нардама и карксазе перьфканза.

⁵ Тяда меле каясь штама кядьгоняс ведь и кармась тонафниензон пильгснон штама и нарнема перьфканза карксаф нардамаса.

⁶ Мольсь Симон Пёторонь ваксс; и ся корхтай Тейнза: «Азор! Тонь мяльце штамс монь пильгонень?!»

⁷ Иисус каршезонза мярьгсь: «Мезе Мон тиян, тяни тон аф шарьхкодьсак, а сяльде шарьхкодьсак».

⁸ Пётр корхтай Тейнза: «Мзярдонга Тон аф штасайть монь пильгонень». Иисус каршезонза мярьгсь: «Кда аф штасайне, эста аф улят Моннекс».

⁹ Симон Пётр корхтай Тейнза: «Азор! Эста аф аньцек пильгонень, но кядненьге и прязеньге штайть».

¹⁰ Иисус мярьгсь тейнза: «Штафти эрявихть аньцек пильгонза штамс, сяс мес сон стадонга марнек ару. Тинь аруфтада, аньцек аф сембе».

¹¹ Иисус содазе Эсь мииенц и сяс азозе: «Аф сембе тинь аруфтада».

¹² А мзярда штазень синь пильгснон и щазень Эсь щамонзон, эста тага озась и мярьгсь тейст: «Шарьхкодесть, мезе Мон тейнть тиень?

¹³ Тинь Монь лемнесамасть Тонафтыкс и Азоркс и видеста корхтатада, сяс мес афкукс Мон стаман.

¹⁴ Стане, кда Мон, Азорсь и Тонафтысь, штайне тинь пильгонтень, эста тейнтьке эряви штакшнемс фкя-фкянь пилькт.

¹⁵ Мон тянь тиине тейнть няфтеманди, тиньге тиеледе тяфта, кода Мон тиень тейнть.

¹⁶ Видеста корхтан тейнть: покодись аф сяда оцю азоронц коряс, кучфське аф сяда оцю кучиенц коряс.

¹⁷ Тинь павазуфтада, кда тянь содасасть и тянь корява тиенттяда.

¹⁸ Ёткстонт аф сембонь колга корхтан; Мон содасайне, конатнень кочкайне. Аньцек пяшкодевоза Сёрматфкссь: "Мархтон кшида ярхцайсь кеподезе лангозон эсь кочкярянц".

¹⁹ Тянь азондса тяни, улемдонза инголе. И тяфта, мзярда азфсь пяшкоди, кемаледе – тя Монан.

²⁰ Видеста, видеста корхтан тейнть: кие васьфтьсы сянь, кинь Мон кучса, ся Монь васьфтьсамань. А кие Монь васьфтьсамань, васьфтьсы Монь Кучиезень».

Иисус няфтьсы мииенц

²¹ Тянь азомда меле Иисус прась ризфс и панжезе потмонц: «Видеста корхтан тейнть: ёткстонт фкясь мисамань Монь».

²² Эста тонафниенза варжакснесть фкя-фкянь лангс, абонкшнесть: кинь колга Сон корхтай.

²³ Тонафниензон ёткста фкясь, конань кельгозе Иисус, озафоль Иисусть ваксса.

²⁴ Симон Пётр кядьса-сурса няфнесь тейнза: кизефтелезе Иисусть, кинь колга Сон корхтась.

²⁵ Ся лаподсь Иисусть мяштенцты и кизефтезе: «Азор! Ся кие?»

²⁶ Иисус каршезонза мярьгсь: «Ся, кинди максса шаваняти навсеф кши сускомть». И навазе сускомть и венептезе Симон Искариотонь цёранцты, Иуданди.

²⁷ И тя кши сускомть сявомда меле Иудань потмос сувась Сатанась. Эста Иисус мярьгсь Иудати: «Мезе срхксят тиемс, тик ни куроконе».

²⁸ Но озафнень ёткста кивок ашезь шарьхкоде, мезенди Сон тянь азозе.

²⁹ Иудань кядьсотольхть марстонь ярмакне, сяс конат-конат арьсесть: Иисус, улема, корхтай тейнза: «Рамак, мезе тейнек эряви Очижить ётафтомс», али: «Мезевок явонтт ашуфненди».

³⁰ Кши сускомть сявомда меле Иуда эстокиге лиссь; а ульсь ве.

Од кошардомвалсь

³¹ Иудань лисемда меле Иисус мярьгсь: «Тячи няфтеви Ломанень Цёрать оцюшиц, Шкайтьке оцюшиц няфтеви Сонь эсонза.

³² Кда Шкайть оцюшиц няфтевсь Сонь эсонза, эста Шкайське няфтьсы Эсьсонза Цёранц оцюшинц, и курок няфтьсы Сонь оцюшинц.

³³ Идне, аф ламос ни Тейне улемс мархтонт. Карматада Монь вешендемон, аньцек, кода ни мярьгонь еврейхненди, тяфта тейнтьке тяни корхтан: "Ков Мон молян, тинь тоза аф молефтяда".

³⁴ Мон максан тейнть од кошардомвал: кельгода фкя-фкянь. Кода Мон кельгодязь тинь, стане кельгода фкя-фкянь.

³⁵ Улендяряй ётксонт фкя-фкянди кельгома, тянь коряс сембе кармайхть содамонт – тинь Монь тонафниене».

Иисус инголькиге азонды Пёторонь потаманц колга

³⁶ Симон Пётр пшкядсь Тейнза: «Азор! Ков Тон туят?» Иисус каршезонза мярьгсь: «Ков Мон туян, тон тяни аф молеват мельган, а сяльде туят мельган».

³⁷ Пётр пшкядсь Тейнза: «Азор! Мес Мон аф молеван мельгат тяни? Мон ваймозень путса Тонь инксот!»

³⁸ Иисус каршезонза мярьгсь: «Ваймоцень путсак Монь инксон? Видеста корхтан тейть: атякшсь аф кенери моразевомс, кода тон колмоксть потат Монь эздон».