Иоанн 12 - Од Соткс Новый Завет на мордовском-мокша языке 2016

Мария вадьсы Иисусонь танцти шине вайса

¹ Очижинь карша кота шида инголе Иисус сась Вифанияв, коса эрясь Лазарь, конань Иисус вельмафтозе кулофста.

² Тоса анокласть Тейнза илядень ярхцама-симома. Марфа каванясь эсост, Лазарь шрать вакссоль Иисусонь и лия инжихнень мархта.

³ А Мария сявсь фунтошка ару нардонь пяк питни вай, вадендезень Иисусонь пильгонзон и нарнезень эсь пряшяярьсонза; и марнек кудсь пяшкодсь тя вайть пяк танцти шинеса.

⁴ Эста Иисусонь тонафниензон эзда фкясь, Иуда, Симон Искариотонь цёрац, кона сяльде мизе Сонь, мярьгсь:

⁵ «Мес тя вайть ашезь ми колма сятт динарийда, а ярмакнень эздонза ашезь яв ашуфненди?»

⁶ Тяфта сон мярьгсь аф сяс, мес арьсесь ашуфнень колга, а сяс, мес ульсь салай ломань. Сонь кядьсонзоль марстонь ярмак мархта арзянясь и тоза кайсефнень эзда сон сявондель эстейнза.

⁷ Иисус каршезонза мярьгсь: «Кадость авать; сон тянь ванфтозе Монь калмама шизенди.

⁸ Вдь ашуфне фалу улихть вакссонт, а Мон – аф».

Оцюнятне ёрасазь шавомс Лазарень

⁹ Еврейхнень ёткста ламотне содазь: Иисуссь тоса, и састь аф аньцек Сонь инксонза, но Лазареньге ванома, конань Иисус вельмафтозе кулофста.

¹⁰ Сяс озксвятиень оцюнятне арьсезь шавомс Лазареньге:

¹¹ вдь сон ульсь туфталсь, мес еврейхнень эзда ламотне аердсть синь эздост и ушедсть кемама Иисусти.

Иисус сай Иерусалиму озада осёл лангса

¹² Омбоце шиня Очижи илати сафнень ёткста ламотне марязь: Иисус моли Иерусалиму.

¹³ Сявсть пальмань тараткат, лиссть Сонь каршезонза и юватькшнесть: «Осанна! Бславаф Азорть лемса сайсь, Израилень Оцязорсь!»

¹⁴ А Иисус мусь од осёл и озась лангозонза, кода азф Сёрматфксса:

¹⁵ «Тят пеле, Сиононь стирсь! Вага, тонь Оцязорце сай озада од осёл лангса».

¹⁶ Васенда Сонь тонафниенза тянь ашезь шарьхкоде. Аньцек мзярда Иисус вельмась и кепотьфоль Шкайть иневалдозонза, эста лятфтазь: тяфта колганза сёрматфоль, и тя тифоль Тейнза.

¹⁷ Ломаттне, конат инголи ульсть Иисусть мархта, азондозь: Сон стяфтозе Лазарень калмоста и вельмафтозе сонь кулофста.

¹⁸ Вага мес ломаттне лиссть Иисусонь васьфтема: синь кулезь, тя тяштьксть тиезе Сон.

¹⁹ А фарисейхне корхтасть эсь ётковаст: «Дяряй аф няйсасть: мезьсовок аф лисенди тевоньке? Сембе масторсь моли мельганза».

Пингсь сась!

²⁰ Очижиста озондома сайхнень ёткса ульсть гректка.

²¹ Синь састь Филиппонь ваксс, кона ульсь Галилеянь Вифсаидаста, и эняльдсть тейнза: «Пара ломань! Минь мяленьке няемс Иисусонь».

²² Филипп мольсь и азозе тянь Андреенди, и сяльде Андрей и Филипп тянь азозь Иисусти.

²³ Но Иисус мярьгсь каршезост: «Сась пингсь, мзярда Шкайсь няфтьсы Ломанень Цёрать афкуксонь оцюшинц.

²⁴ Видеста корхтан тейнть: кда тозеронь видьмось модати прамста аф кулы, эста ляды ськамонза; а кда кулы, эста канды лама видьмода.

²⁵ Кие кельгсы эсь эряфонц, юмафтсы сонь; а тя масторлангса эсь эряфонь аф кельгись ванфтсы сонь пефтома эряфти.

²⁶ Кинь мялец Тейне покодемс, молеза мельган. Косан Мон, тоса улеза покодиезевок. И кие Тейне покоди, сянь шнасы Монь Алязе».

Иисус азонды Эсь куломанц колга

²⁷ «Монь колавсь марнек ваймозе; и мезе Мон азан? Аляй! Ванфтомак тя пингть эзда? Но тя пингть инкса Мон и сань.

²⁸ Аляй! Няфтьк Эсь лемцень оцюшинц!» Эста менельста сась вайгяль: «Мон ни няфтине Эсь лемозень оцюшинц и нинге няфтьса».

²⁹ Ломаттне, марямок тянь, корхтасть: «Тя атямсь». А лиятне корхтасть: «Ангелсь мархтонза корхтась».

³⁰ Иисус тянь каршес мярьгсь: «Тя вайгяльсь ульсь аф Тейне, а тейнть.

³¹ Тяни сась масторлангть судендама пингоц; тяни тя масторлангть азороц ули паньф тяста.

³² И мзярда Мон масторть лангста кеподеван вяри, сембонь сявсайне Эсь ширезон».

³³ Ня валхнень вельде Сон макссь тейст содамс, кодама куломаса Сон кулы.

³⁴ Ломаттне корхтасть Тейнза: «Минь содаськ Сёрматфксста, Христоссь эряй пефтома. Кода ина Тон корхтат, Ломанень Цёрась ули кепотьф вяри? Кие тя Ломанень Цёрась?»

³⁵ Эста Иисус мярьгсь тейст: «Нинге аф лама пингс валдсь ляды мархтонт. Якада, мзярс нинге валдсь мархтонт, афоледязь комача шобдась: кие якай шобдашиса, ся аф содасы, коза моли.

³⁶ Мзярс валдсь мархтонт, кемада валдти. Эста аратада валдти идькс». Тянь азомда меле Иисус аердсь и кяшсь эздост.

Еврейхне аф кемайхть Иисусти

³⁷ Тняра тяштькс Сон тись инголест; и синь сембе сяка ашесть кема Тейнза.

³⁸ Тя лиссь сяс, мес эрявсь пяшкодевомс Исаия пророкть валонцты: «Азор! Кие кемась минь валоньконди? И кинди панчфоль Шкайть виец?»

³⁹ Тейст ашель кода кемамс, сяс мес, кода нинге азозе Исаия:

⁴⁰ «Ня ломаттне сокоргофтозь эсь сельмоснон и калготкстоптозь эсь седиснон: афольхть няе эсь сельмосост и афольхть шарьхкоде седисост, афольхть шарфта Тейне и афолине пчкафта синь».

⁴¹ Исаия тянь азозе, сяс мес няезе Христость оцюшинц и корхтась Сонь колганза.

⁴² Оцюнятнень эздовок ламотне кармасть кемама Иисусти; аньцек фарисейхнень инголе ашесть виденця, сяс мес пельсть синагогаста панемада.

⁴³ Ня оцюнятне Шкайть шнаманц коряс сяда пяк кельгозь ломаттнень эзда шнамать.

Иисусонь валоц ули судьякс мекольце шиня

⁴⁴ Иисус кайгиста азозе: «Тейне кемайсь кемай аф аньцек Тейне, но Монь Кучиезтивок.

⁴⁵ Монь няиезе Монь Кучиезеньге няйсы.

⁴⁶ Мон сань масторлангти валдокс, Тейне фкявок кемайсь афоль ляда шобдашиса.

⁴⁷ И кда кие марясыне Монь валнень и тии аф синь корязост, сянь аф судендаса. Мон сань масторлангть идема, аф судендама.

⁴⁸ Эздон аердыть, Монь валозень аф кулхцондыенц ули ни судендаец: Монь валозе кармай сонь судендамонза мекольце шиня.

⁴⁹ Вдь Мон аф Эсь эздон корхтань, а Кучиезе, Монь Алязе, Сон мярьгсь Тейне, мезе азомс и мезе корхтамс.

⁵⁰ И Мон содаса, Сонь кошардомвалоц – тя пефтома эряфсь. И Мон корхтан аньцек сянь, мезе мярьгсь корхтамда Алязе».