Иоанн 11 - Од Соткс Новый Завет на мордовском-мокша языке 2016

Лазарень куломац

¹ Урмаськодсь фкя ломань, лемоцоль Лазарь. Сон Вифания велестоннель, коса эрясть Мария и Марфа сазоронза.

² Мария ся авасель, кона вадендезе Азорть танцти шине вайса и эсь пряшяярьсонза нардазень Сонь пильгонзон. Тя сонь Лазарь брадоц сярятькстсь.

³ Сазорхне пачфсть куля Иисусти: «Азор! Тонь кельгома ялгаце сяряди».

⁴ Иисус марязень ня валхнень, мярьгсь: «Тя сярядемась аф куломанди, а Шкайть оцюшинц няфтеманди, тянь вельде шнаволь-оцюлгофтоволь Шкаень Цёрась».

⁵ Иисус кельгозень Марфа и Мария сазорхнень и синь Лазарь брадснон.

⁶ Лазарень сярядеманц колга кулемда меле Иисус ащесь нинге кафта шит тоса, коса ульсь.

⁷ Сяда меле мярьгсь тонафниензонды: «Аряда меки Иудеяв».

⁸ Тонафниенза мярьгсть Тейнза: «Равви! Аф кунара еврейхне ёрадязь шавомс кевса, и Тон тага молят тоза?»

⁹ Иисус каршезост мярьгсь: «Дяряй аф кемгафтува частт фкя шиса? Кие якай ши валдса, ся аф пупоряй, сяс мес няйсы тя масторлангонь валдть.

¹⁰ А кие якай веть, пупоряй, сяс мес эсонза аш валда».

¹¹ Тянь азомда меле корхтай тейст: «Лазарь ялганьке матодовсь; но Мон молян стяфтомонза».

¹² Тонафниенза мярьгсть: «Азор! Кда матодовсь, эста пчкяй».

¹³ Иисус корхтась Лазарень куломанц колга, а синь арьсесть: Сон корхтай эрь шинь матодовомать колга.

¹⁴ Эста Иисус видеста азозе тейст: «Лазарь кулось.

¹⁵ Но Мон кеняртькшнян инксонт, мес Мон ашелень тоса: тяфта тинь карматада кемама Тейне. Аряда ина тейнза».

¹⁶ Эста Фома, конань нинге лиякс лемнесазь Кафтась, азозе тонафни ялганзонды: «Аряда ина кулотама Тонафтыеньконь мархта».

Иисус – вельмамась и эряфсь

¹⁷ Мзярда Иисус сась, кулезе, Лазарь ниле шит ни калмоса.

¹⁸ А Вифаниясь Иерусалимть эзда аф ичкозель, ётксост колмошка вайгяльбе,

¹⁹ сяс ламотне сашендсть Иудеяста Марфань и Мариянь мархта ризнама синь брадснон инкса.

²⁰ Мзярда Марфа марязе: сай Иисус, сон тусь каршезонза, а Мария лядсь куду.

²¹ Марфа корхтай Иисусонди: «Азор! Улендярялеть Тон тяса, афоль кула брадозе.

²² Но тянивок содаса, мезе Тон анат Шкайть кядьста, Сон макссы Тейть».

²³ Иисус корхтай тейнза: «Вельмай брадце».

²⁴ Марфа мярьгсь: «Содаса, вельмай мекольце шиня, мзярда ули вельмамась».

²⁵ Иисус азозе тейнза: «Мон – вельмамась и эряфсь. Тейне кемайсь, кда и кулы, кармай эряма.

²⁶ И эрь эряйсь и Тейне кемайсь мзярдонга аф кулы. Кемат тянди?»

²⁷ Марфа корхтай Тейнза: «Кеман, Азор! Мон кеман, Тон Христоссят, Шкайть Цёрацат, конанди сама масторлангти».

Иисус аварди

²⁸ Тянь азомда меле Марфа тусь и салава тердезе Мариянь, эсь сазоронц и мярьгсь: «Тонафтысь тяса, тернетянза тонь».

²⁹ Кодак Мария кулезе тянь, сон эрязста стясь и тусь Иисусти.

³⁰ Иисус нинге ашезь сува вели, а ульсь тозк, коса Сонь васьфтезе Марфа.

³¹ Еврейхне, конат ульсть Мариянь мархта кудса и ваймафнезь-кемокснезь сонь, няезь, кода сон эрязста стясь и лиссь, и синьге тусть мельганза. Синь арьсесть: Мария тусь калмоть ваксс явсема.

³² Мария сась тоза, коса ульсь Иисус и няемстонза, прась инголенза плманжа лангс и мярьгсь Тейнза: «Азор! Кда Тон улелеть тяса, афоль кула брадозе».

³³ Иисус, мзярда няезе – Мария аварди и мархтонза саф еврейхневок авардихть, тя пяк токазе Сонь ваймонц и Сонцьке ризназевсь.

³⁴ И мярьгсь: «Ков сонь путость?» Тейнза азозь: «Азор! Сак и ванк».

³⁵ Иисусть тусть сельмоведенза.

³⁶ Эста еврейхне корхтасть: «Ватт, конашкава Сон кельгозе Лазарень».

³⁷ А конат-конат эздост мярьгсть: «Сон пчкафтозень сокорть сельмонзон. Дяряй Тейнза афоль ванфтов Лазарь куломада?»

Иисус вельмафтсы Лазарень кулофста

³⁸ А Иисус тага ризназевсь, сась калмоть ваксс. Калмось карафоль кевбанда бокс, и сувама вастозонза путфоль оцю кев.

³⁹ Иисус мярьгсь: «Веляфтость кевть». Кулофть сазороц, Марфа, корхтай Тейнза: «Азор! Тусь ни шине; вдь ниле шит ни сон ащи лазксса».

⁴⁰ Иисус корхтай тейнза: «Дяряй ашень мярьге Мон тейть: кда кармат кемама, няйсак Шкайть оцюшинц?»

⁴¹ Веляфтозь калмоть ваксста кевть. Иисус кеподезе прянц вяри менели и мярьгсь: «Аляй! Сюконян Тейть сяс, мес марямайть Монь.

⁴² Мон стадонга содаса: Тон фалу марясамак Монь. Тянь азса тяса ащи ломаттнень инкса, кемальхть синь: Тон кучемайть Монь».

⁴³ Тянь азомда меле Сон кайгиста серьгядсь: «Лазарь! Листь тоста!»

⁴⁴ И кулофсь лиссь, сон кяднек-пильгонек ашкотфоль кулыень котфса, шамацка вельхтяфоль котфкаса. Иисус корхтай ломаттненди: «Юкссесть-калафнесть нуланзон, катк якай».

Евреень озксвятиень оцюнятне арьсихть шавомс Иисусонь

⁴⁵ Ламотне ся еврейхнень эзда, конат сашендсть Мариянди и няезь, мезе тись Иисус, кармасть кемама Иисусти.

⁴⁶ А конат-конат тушендсть фарисейхненди и азондозь тейст, мезе тись Иисус.

⁴⁷ Эста озксвятиень оцюнятне и фарисейхне кочкасть пуромкс и азозь: «Мезе тейнек тиемс? Тя Ломанць тиенди лама тяштькс.

⁴⁸ Кда кадсаськ Сонь тяфтак, эста сембе кармайхть кемама Тейнза; и сайхть римляттне и сявсазь Шкаень кудоньконьге и ломаненьконьге».

⁴⁹ Синь ёткстост фкясь, Каиафа, кона ся кизоня путфоль озксвятиень оцюнякс, мярьгсь тейст: «Тинь мезевок аф содатада.

⁵⁰ Дяряй аф шарьхкоттяда: тейнек ули сяда пара, кда фкя ломань кулы ломаттнень инкса, марнек Израилень ломаньтналть юмаманц вастс».

⁵¹ Тянь сон мярьгозе аф эсьстонза, а улемок ся кизоня озксвятиень оцюнякс, инголькиге азозе: Иисус кулы ломаньтналть инкса,

⁵² и аф аньцек Израилень ломаньтналть инкса, но Шкайть срафнеф идензон марс пуроптомаснон инксовок.

⁵³ Тя шиста сявомок синь арьсекшнезь, кода Сонь шавомс.

⁵⁴ Сяс ни Иисус еврейхнень ёткса пря ашезь няфне, а тусь тоста шавмодать маласа ащи масторс – ошти, кона лемневсь Ефраим. И тоса лядсь Эсь тонафниензон мархта.

⁵⁵ Малаткшнесь еврейхнень Очижисна. Ламотне сембе пяльде састь Иерусалиму – эсь иласнон коряс Очижида инголе прянь аруяфтома.

⁵⁶ Синь вешендезь Иисусонь, и Шкаень кудса фкя-фкянди корхтасть: «Кода арьсетяда? Сон сай Очижить ётафтома?»

⁵⁷ Озксвятиень оцюнятне и фарисейхне Иисусть кундаманкса кошардозь ломаттнень: «Кда кие содасы, коса Иисус, катк азсы тейнек».