Иоанн 1 - Од Соткс Новый Завет на мордовском-мокша языке 2016

Валсь арась ломанькс

¹ Ушетксса ульсь Валсь, Валсь Шкайть мархтоль, и Валсь ульсь Шкай.

² Сон ушетксстокиге Шкайть мархтоль.

³ Сембось вельденза тиевсь, Соньфтомонза мезевок ашезь тиев.

⁴ Сонь эсонза ульсь эряма, и эрямась ульсь ломаттненди валдокс.

⁵ Валдсь шобдашиса валдопты, сон изь сяськов шобдати.

⁶ Сась Шкаень ширде кучф ломань, лемоцоль Иоанн.

⁷ Сон сась кулянь пачфтема, Валдть колга азондома, тянь вельде сембе кемальхть.

⁸ Аф сон ульсь Валдсь, сон кучфоль Валдть колга азондома.

⁹ Ульсь афкуксонь Валда, кона сась масторлангти и валдоптозе эрь ломанть.

¹⁰ Валдсь масторлангсоль, и масторлангсь Сонь вельденза тиевсь, аньцек масторлангстотне ашезь сода Сонь.

¹¹ Валдсь сась Эсь масторозонза, но Эсь ломаненза ашезь васьфте Сонь.

¹² А конат васьфтезь и кемасть Тейнза, сятненди макссь вий арамс Шкаень идькс,

¹³ конат шачсть аф вер эзда, афи ронга, афи мирдень мяльста-арьсемаста, а Шкайть эзда.

¹⁴ Валсь арась ломанькс и эрясь ётксонк пароказнеда и видешида пяшкотьфста. И минь няеськ Сонь оцюшинц, ся оцюшить, кона максф фкя-тяка Цёрати Алянц эзда.

¹⁵ Иоанн азондсь колганза и вярьгак вайгяльхть корхтась: «Тя – Ся, конань колга азондонь: мельган Молись мондедон оцю, сяс мес ульсь мондедон инголи».

¹⁶ И Сонь пяшксешинц эзда тейнек сембонди максовсь пароказнеть лангс пароказне.

¹⁷ Вдь койсь максф Моисеень вельде, а пароказнесь и видешись састь Иисус Христость вельде.

¹⁸ Шкайть кивок мзярдовок ашезе няе. Фкя-тяка Шкай Цёрац, кона Эсь Алянц маласа, панжезе Сонь тейнек.

Иоанн Кстиндайть куляц

¹⁹ Вов мезе азондсь Иоанн, мзярда еврейхнень оцюнясна кучезь Иерусалимста озксвятихнень и левиеннетнень сонь кизефтемонза: «Кият тон?»

²⁰ Иоанн азозе, ашезе сёпа, видеста мярьгсь: «Аф мон Христоссь».

²¹ Сонь кизефтезь: «Кият ина? Тон Илиясь?» Сон мярьгсь: «Аф». «Тон ся учсеф пророксь?» Сон каршезост мярьгсь: «Аф».

²² Тейнза мярьгсть: «Кият ина тон? Мезе астама колгат кучиеньконди, мезе тонць азондат эсь колгат?»

²³ Сон мярьгсь: «Мон шавмодаса серьгядить вайгялецан: "Видептесть кить Азорти", кода мярьгсь Исаия пророксь».

²⁴ Кучфне ульсть фарисейхнень ёткста.

²⁵ Синь кизефтезь Иоаннонь: «Мес ина кстиндакшнят, кда тон аф Христоссь, аф Илиясь, аф ся пророксь?»

²⁶ Каршезост Иоанн мярьгсь: «Мон кстиндан ведьса; но ётксонт ащи Ся, конань тинь аф содасасть.

²⁷ Сон Ся, кона моли монь мельган, но Сон мондедон оцю. Мон Сонь сандалиянзон юкссемска аф кондястян».

²⁸ Тя тевсь ульсь Вифавараса, Иордан ляйть шинь стяма ширдень трвасонза, коса кстиндакшнесь Иоанн.

Иисус – Шкаень Верозсь

²⁹ Омбоце шиня Иоанн няезе ширезонза сай Иисусть и корхтай: «Вов Шкаень Верозсь, кона сявсы Эсь лангозонза сембе масторлангонь пежеть!

³⁰ Сон Ся, конань колга мярьгонь: "Мельган моли Ломань, кона мондедон оцю, сяс мес Сон ульсь мондедон инголи".

³¹ Мон ашине сода Сонь; но сань ведьса кстиндама, Сонь содафтомонза Израилень ломаттненди».

³² И Иоанн азозе: «Мон няине, кода Шкаень Ваймопожфсь менельста гуляня лаца валгсь Сонь лангозонза и ащесь лангсонза.

³³ Мон ашине сода Сонь; но ведьса кстиндама Кучиезе мярьгсь тейне: "Ся, кинь лангс няйсак Ваймопожфть валгоманц и лангсонза ащеманц, Ся и ули Иняру Ваймопожфса кстиндайсь".

³⁴ Мон тянь няине и азондса: Сон – Шкайть Цёрац».

Иисусонь васень тонафниенза

³⁵ Омбоце шиня Иоанн и кафта тонафниенза тага ащесть тоса.

³⁶ Иоанн няемок аф ичкозе моли Иисусонь, мярьгсь: «Вага Шкаень Верозсь».

³⁷ Ня валхнень марямста кафцьке тонафниенза тусть Иисусонь мельге.

³⁸ Иисус шарфтсь и няезе – сят молихть мельганза, и кизефтезень: «Мезе тейнть эряви?» Синь каршезонза мярьгсть: «Равви, – лиякс мярьгомс: тонафты, – коса эрят?»

³⁹ Иисус корхтай тейст: «Аряда, и няйсасть». Пингсь ульсь кемонце частть маласа. Синь тусть мархтонза и няезь, коса Сон эряй; и ащесть пялонза шоподемс.

⁴⁰ Фкясь кафттнень эзда, кит марязь Иоаннонь валонзон и тусть Иисусть мельге, ульсь Андрей, Симон Пёторонь брадоц.

⁴¹ Андрей васендакиге вешезе Симон брадонц и азозе тейнза: «Минь муськ Мессиять» – тя валть смузец: Христос.

⁴² И Андрей вятезе Симононь Иисусти. Иисус варжакстсь лангозонза и мярьгсь: «Тон – Симонат, Ионань цёрацат; тон лемдеват Кифакс» – тя валть смузец: кев, Пётр.

Иисус тердьсыне Филиппонь и Нафанаилонь

⁴³ Омбоце шиня Иисус срхкась Галилеяв. Сон музе Филиппонь и корхтай тейнза: «Мольхть мельган».

⁴⁴ А Филипп ульсь Вифсаидаста, сяка ошста, костоннетольхть Андрей и Пётр.

⁴⁵ Филипп музе Нафанаилонь и корхтай тейнза: «Минь муськ Сянь, конань колга Моисей сёрмадсь койса и конань колга сёрмадсть пророкневок, – Назарет ошста Иисусть, Иосифонь цёранц».

⁴⁶ Нафанаил кизефтезе: «Дяряй Назаретста мзярдовок лисендсь кодамовок пара?» Филипп корхтай тейнза: «Сак и ванк».

⁴⁷ Иисус няезе Нафанаилонь маладоманц и мярьгсь колганза: «Вага афкуксонь Израилень аля, кона мзярдонга аф васькафни».

⁴⁸ Нафанаил корхтай Тейнза: «Коста Тон содасамак?» Иисус мярьгсь каршезонза: «Филиппонь тердемда инголе Мон няихтень ни тонь смоква шуфтть ала».

⁴⁹ Нафанаил пшкядсь Тейнза: «Равви! Тон – Шкайть Цёрацат, Тон – Израильть Оцязороцат».

⁵⁰ Иисус мярьгсь каршезонза: «Тон кемат сяс, мес азыне тейть: "Мон няихтень смоква шуфтть ала"; тон кармат няема сяда оцю тефт».

⁵¹ И поладозе: «Видеста корхтан тейнть: тинь няйсасть панжада менельть и Ломанень Цёрати куценди-валгонды Шкаень ангелхнень».