Иаковонь сёрмац 5 - Од Соткс Новый Завет на мордовском-мокша языке 2016

Мезе учсыне козятнень

¹ Тяни кулхцондода тинь, козят! Авардеда и кайгиста явседа зиянда, конат прайхть лангозонт.

² Тинь козяшинте наксадсь и тинь щамонтень сивозень ки мелавсь.

³ Зрнянтень и сиянтень порезень шямонць. Тя шямонць няфтьсы тинь муворшинтень, и сон сивсы-юмафтсы ронгонтень, кода тол. Тинь кочкаде козяши ня мекольдень шитненди.

⁴ Ваность, тинь ашеде панне ярмак паксясонт сёронь нуйхненди, и сянкса синь явсихть-авардихть. Сёронь кочкайхнень пеняцямасна пачкодсть Саваоф Азорть пилес.

⁵ Тинь эряде модать лангса козяшиса и пяшкотькшнесть сембе мялентень. Тинь андость-куялгофтость эсь прянтень кода печкома шинди.

⁶ Тинь судендасть и шавость видексшиса эряйть, а сон ашезь уле каршек тейнть.

Уледа куватьс кирдикс

⁷ Кемай ялгат, уледа куватьс кирдикс Азорть сама шинцты. Ванода, конашка оцю кирдемшкац сокайть-видить, кона ученды модать эзда козя раштафкс, и мзярс аф туй тундань али сёксень пизем.

⁸ Тейнтьке улема куватьс кирдикс. Кемокстасть седиентень, сяс мес Азорть самац ни маласа.

⁹ Кемай ялгат, тяда пеняця фкя-фкянь лангс, эста тинь аф ульхтяда судендафт. Судьясь ни кенкш лангса.

¹⁰ Кемай ялгат, мзярда пофтада маятамас, ванода пророкнень лангс, конат корхтасть Азорть эзда, кода синь кемоста ащесть и куватьс кирдезь сембе маятаматнень.

¹¹ Минь лемнесаськ павазукс сятнень, конатненди кирдевсть сембе маятаматне. Тинь марьседе Иовонь кирдемшканц колга, и содасасть кодама эряфонь пе макссь тейнза Азорсь. Вдь Азорсь кельгозь ужяльди и лезды стакашис повфненди.

Варамать колга

¹² Васендакиге, кемай ялгане, мзярдовок тяда вара, – аф менельса, аф модаса и аф мезеньге лиянь лемса; катк «тяфта» валонте ули аньцек «тяфта» валкс, а «аф» валонте улеза аньцек «аф» валкс. Эста тинь аф ульхтяда судендафт.

Озондомать виец

¹³ Кда кивок тинь ёткстонт маятай, ся катк озонды. Кда кие кеняртькс потмоса, ся катк морафты псалопт.

¹⁴ Кда кие ёткстонт сяряди, ся катк тердьсыне кемаень пуромксонь оцюнятнень, и синь катк озондыхть сярядить вельхксса и Азорть лемса вадьсазь сонь елейса.

¹⁵ Кемама мархта озондомась пчкафтсы сярядить, и Азорсь стяфтсы сонь. И кда ся ломанць тись пежет, синь нолдавихть тейнза.

¹⁶ Сяс виденцяда фкя-фкянди эсь пежентень колга и озондода фкя-фкянь инкса: эста пчкатада. Видексшиса эряй ломанть озондомац пяк лама тии.

¹⁷ Илия ульсь тяфтамка ломань, кода и минь. Но сон пяк озондсь: афоль ту пизем. И ашель пизем модать лангса колма кизот и кота кофт.

¹⁸ Меле сон тага озондсь, и эста тусть пизепне, и модась раштазе эсь иможенц.

¹⁹ Кемай ялгане, кда кие эздонт туй шири видешинь киста, и кивок мрдафтсы сонь меки,

²⁰ эста катк сон содасы: ся, кие мрдафтсы пежуть видешинь ки лангс, идесы пежуть ваймонц куломада и нолдафтсы лама пеженц.