Еврейхненди сёрмась 8 - Од Соткс Новый Завет на мордовском-мокша языке 2016

Од Сотксонь Озксвятиень оцюнясь

¹ Минь азфоньконь эзда инь оцюсь тя: минь ули тяфтама Озксвятиень оцюняньке, кона озась менельса инь оцю Шкайть оцязоронь озама вастонц види ширесонза.

² Сон покоди Озксвятиень оцюнякс иняру вастса, афкуксонь иняру кошса, конань стяфтозе Шкайсь, а аф ломанць.

³ Эрь озксвятиень оцюнясь путневи казнень и озксказнень каннема; сяс тянь лаца миньге Озксвятиень оцюняньконди эряволь мезевок кандомс озксказнекс.

⁴ Кда Сон илядоль модать лангса, эста Сон афоль уле кодамовок озксвятикс, сяс мес тяса ни улихть ломатть, конат койть коряс каннихть Шкайти казнет.

⁵ Синь покодемасна иняру кошса – аньцек кепотькс и цильф менеленнеть эзда. Вдь Моисеенди, мзярда Сон ушедозе иняру кошть тиеманц, азфоль: «Ватт, семботь тик ся кепотьксть коряс, кона няфтьфоль тейть панда пряса».

⁶ Но Иисусти максф покодемась сяда оцю мода лангонь озксвятихнень покодемаснон коряс. Тяконь лаца сяда цебярь ся соткссь, конаса Иисус тевонь якафты Шкайть и ломаттнень ёткса, сяс мес сонь юрозонза путфт Шкайть сяда цебярь надияфтоманза.

⁷ Улендяряль васенце соткссь афсатыксфтома, эста вастозонза афоль эряв вешендемс лия.

⁸ Но Шкайсь корхтай Эсь ломаньтналонцты муворшиснон няфтезь: «Кулхцондода, сайхть шит, – корхтай Шкайсь, – мзярда Мон тиян од соткс Израилень и Иудань ломаттнень мархта.

⁹ Тя соткссь ули аф стама, кодама сон ульсь тинь алянтень мархта ся пингть, мзярда Мон сявине синь кядьта и лихтине Египетонь масторста. Вдь синь ашезь кирде Монь мархтон сотксть, и тянкса Мон шарфтонь эздост, – корхтай Азорсь.

¹⁰ Вага соткссь, конань тиса Израилень ломаттнень мархта тона шитнень меле, – корхтай Азорсь, – Мон путсайне Эсь койнень синь мялезост и сёрмадсайне синь седиезост; и карман улема тейст Шкайкс, а синь улихть Тейне ломаньтналкс.

¹¹ И эста кивок аф кармай тонафтома эсь маластонц и эсь брадонц тяфтама валса: "Маласта содак Азорть" – сяс мес сембе, ёмланек-оцюнек, кармайхть содамон Монь.

¹² Вдь Мон кельгозь ужяльдьсайне синь, нолдасайне синь аф видешиснон и аф лятфтасайне оду синь пежеснон и койфтома тевснон».

¹³ Мзярда Сон корхтай «од соткс», тяфта няфнесы васенце сотксть таштомоманц. Ся, мезсь эрязе эсь пингонц и таштомсь, курок юмай.