Еврейхненди сёрмась 5 - Од Соткс Новый Завет на мордовском-мокша языке 2016

¹ Эрь озксвятиень оцюнясь кочкави ломаттнень ёткста и путови покодемс Шкайти ломаттнень инкса: каннемс казнет и озксказнет пежеснон инкса.

² Сон машты ужяльдезь пшкядемс сятненди, конатнень аш содамошисна и конат васькафтфт-эрьготьфт, сяс мес сон сонць, кода и сембе – лафча ломань.

³ И тянкса тейнза эряви каннемс озксказнет кода лиятнень инкса, стане жа эсь пежензон инкса.

⁴ Киндинге аф сявови эсь лангозонза тяфтама питни тев. Сонь тя тевти тердьсы Шкайсь, кода ульсь Аарононьге мархта.

⁵ Тяфта Христосовок аф Сонць Эстейнза сявозе иневалдть улемс озксвятиень оцюнякс, но Сонь путозе Ся, кие мярьгсь Тейнза: «Тон Монь Цёразят, тячи Мон шачфтыхтень Тонь».

⁶ И лия вастса Шкайсь корхтай: «Тон улят озксвятикс сембе пинкненди, Мелхиседеконь лаца».

⁷ Иисус, масторлангонь эряфонц пингста, оцю вайгяльса авардсь и, эняльдезь, сельмоведь мархта озондсь Шкайти, конань ульсь виец идемс Сонь куломада. И Сон ульсь кульф Шкайть мяленц ваноманц инкса.

⁸ Хуш Сон Шкаень Цёра, сякокс, Эсь маятаманзон вельде Сон тонадсь кулхцондома.

⁹ И мзярда тянь вельде арась прокс анококс, Сон тиевсь пефтома пингс идемань кандыкс сембонди сятненди, конат кулхцондсазь Сонь,

¹⁰ и Шкайсь Сонь лемдезе Озксвятиень оцюнякс Мелхиседеконь лаца.

Ваймопожфонь ярхцамбяль

¹¹ Тянь колга минь маштолеме лама азондомс, аньцек стака тейнть тянь пачфтемс, сяс мес тяни тинь араде аф оцю мяльса кулхцондыкс.

¹² Тейнть кунаркиге эряволь улемс лия ломанень тонафтыкс, аньцек вага, тинь тинцень эряви тага тонафтомс васенце содамошитненди Шкаень валса. Тейнть эряви лофца, а аф калгода ярхцамбяль.

¹³ Эрсь, конань нинге аннесазь лофцта, аф шарьхкоди видексшить колга тонафтомаса, сяс мес сон пиже шаба.

¹⁴ А вага калгода ярхцамбяльсь максови сятненди, конат кассть. Синь потмонь марямасна эряфонь тевснон вельде тонадсть явомонза сянь, мезсь пара и мезсь кальдяв.