Еврейхненди сёрмась 4 - Од Соткс Новый Завет на мордовском-мокша языке 2016

¹ Сяс мес надияфтомась Шкайть ваймама вастонцты сувамать колга нинге иляткшни вийса, тейнек эряви пелемс вага мезьда: афоль иляда кие ёткстонт пяле ки лангс.

² Вдь Пара кулясь ульсь азф тейнек стане жа, кода тейстка. Аньцек кульф валсь ашезь канда тейст лезкс, сяс мес синь ашезь сота сонь кемамаснон мархта.

³ А минь, кит араме кемайкс, суватама Сонь ваймама вастозонза, сяс мес Шкайсь мярьгсь: «Кяженьбачк Мон варань: "Мзярдонга аф сувайхть Монь ваймама вастозон"». Сон азозе тянь, хуш менельхнень-масторхнень тиемста сявомок Сонь тевонза ульсть шумордафт.

⁴ Сяс мес Сёрматфксса корхтави сисемце шить колга тяфта: «И ваймясь Шкайсь сисемце шиня сембе тевонзон эзда».

⁵ А сяда вяре корхтави: «Мзярдонга аф сувайхть Монь ваймама вастозон».

⁶ Сят, конат васенцекс кулезь Пара кулять, ашесть пов тоза аф кулхцондоманкса. Сембе сяка, кие-бди нинге сувави Сонь ваймама вастозонза,

⁷ сяс Шкайсь путсь лия ши, конань лемдьсы «тячи». Лама пингонь ётазь Шкайсь корхтась Давидонь вельде, кода инголе ни азфоль: «Тячи, кда тинь кульхтяда Шкаень вайгяль, тясть калготкстофта седиентень».

⁸ Кда Иисус Навин вятелезень синь ваймама вастти, Шкайсь тяда меле афоль корхта кодама-бди лия шинь колга.

⁹ Тяфта лисенди, сисемце шинь ваймамань илась нинге учсы Шкаень ломаньтналть.

¹⁰ Кие сувай Сонь ваймама вастозонза, ся ваймоси эсь тевонзон эзда стане жа, кода Шкайське эсь тевонзон эзда.

¹¹ Сяс сембе вийсонк варжасаськ сувамс ся ваймама вастти: афоль иляда кие пяле ки лангс, молезь сяка аф кулхцондомать мельге.

¹² Сяс мес Шкаень валсь эряй и вии, и кафцьке пяльде шоваф торда сяда оржа. Сон крхкаста сувай ломанень потмоти и пачкоди мянь тоза, коса ваймось и пожфсь, эзнетне и пакарь уйхне, и машты панжемс седиень мяльхнень и арьсематнень.

¹³ Шкайть эзда мезевок аф кяшеви. Сонь сельмонзон инголе сембось штада и панжада, Сон – Судьяньке и Сонь инголенза тейнек сави корхтамс сембе тевоньконь колга.

Иисус – инь оцю Озксвятиень оцюнясь

¹⁴ Сяс мес минь ули инь оцю Озксвятиень оцюняньке – Иисус, Шкаень Цёрась, кона ётась менельхнень пачк, эрьда карматама кемоста кирдема ся кемамати, конань азонкшнесаськ ломаттнень ингольде.

¹⁵ Вдь минь Озксвятиень оцюняньке аф стама, конанди афоль шарьхкодев минь лафчашиньке, меколанкт, Сон минь лацонк ульсь варжаф сембоса, аньцек Сон ашезь тие кодамовок пеже.

¹⁶ Эрьда апак пельхть сатама пароказнень максы Шкайть озама вастонц инголи. Тоса минь мутама кельгозь ужяльдема и пароказне, конат лездыхть тейнек эрявикс пингста.