Еврейхненди сёрмась 3 - Од Соткс Новый Завет на мордовском-мокша языке 2016

Иисус Моисейда оцю

¹ Сяс, иняру кемай ялгат, конатненди минь мархтонк марса максовсь менелень тердемась, шарфтость сельмованфонтень Иисус Христосонь лангс. Минь сембонь инголе лемнесаськ Сонь Шкаень Кучфокс и Озксвятиень оцюнякс.

² Шкайсь макссь Тейнза покодема, и Сон тиезе тя покодемать Шкайть мяленц коряс, кода Моисейге Шкаень кудса тиезе семботь Шкайть мяленц коряс.

³ Но Иисус лувови сяда оцюкс Моисеень коряс, тяфта жа кода и кудонь путысь-стяфтысь лувови сяда оцюкс тиф кудть коряс.

⁴ Эрь кудсь киньге кядьса путови, а Шкайсь путозе-стяфтозе семботь.

⁵ Моисей ульсь покодикс, кона тиендсь Шкайть мяленц коряс сембе Шкаень кудонь тефнень эса, и тейнза ульсь максф няфтемс сянь, мезе Шкайть мялецоль азомс сай пингонь эряйхненди.

⁶ А Христоссь – Шкаень Цёра и Шкаень кудть лангса Азор, кона тиенди Шкайть мяленц коряс. Сонь кудоц – тя минь, кда аньцек минь кемоста и педа-пес ванфтсаськ аф пелемашить и надиямать, конаса минь кенярдезь шнафттама пря.

Шкаень ваймама васта

⁷ Сяс, кода корхтай Иняру Ваймопожфсь: «Тячи, кда тинь кульхтяда Шкаень вайгяль,

⁸ тясть калготкстофта седиентень, кода ульсь варчсемань шиня шавмодаса, мзярда тинь кропцяде Монь лангозон и моледе Тейне каршек.

⁹ Тоса тинь алянте мольфнезь мялезень и варчсемазь Монь, хуш няендезь Монь тевнень нильгемонь киза.

¹⁰ Сяс Монь састь кяжне синь лангозост и мярьгонь: "Синь седисна фалу бралги и синь ашель мяльсна содамс Монь кинень".

¹¹ Сяс Мон кяженьбачк варань: "Мзярдонга синь аф сувайхть Монь ваймама вастозон!"»

¹² Ванода, кемай ялгат, катк киньге эздонт аф ули кяжи и аф кемай седиец, и тяфта афоледе пота эряй Шкайть эзда.

¹³ Меколанкт, кемокснеда фкя-фкянь эрь шиня, мзярс нинге ули пинге мярьгомс «тячи». Катк киньге седиец аф васькафтови пежеса и аф калготкстоми тянкса.

¹⁴ Вдь минь суваме марстонь тевс Христость мархта, кда аньцек педа-пес кемоста ванфтсаськ ся кемамать, конац ульсь минь эсонк ушетксста.

¹⁵ Кода Сёрматфксса корхтави: «Тячи, кда тинь кульхтяда Шкаень вайгяль, тясть калготкстофта седиентень, кода ульсь ся пингть, мзярда тинь кропцяде Монь лангозон и моледе Тейне каршек».

¹⁶ Кит ульсть сят, конат кулезь Сонь и ушедсть кропцяма? Кали аф сембе сят, конатнень Моисей лихтезень Египетста?

¹⁷ И кинь лангс Шкайсь ульсь кяжи нильгемонь киза? Кали аф сятнень лангс, конат сувасть пежес и конатнень пакарьсна илядсть шавмодаса?

¹⁸ И кинь каршес варась Шкайсь: мзярдонга аф сувайхть Сонь ваймама вастозонза? Кали аф сятнень каршес, конат ашесть кулхцонда?

¹⁹ И тяфта минь няйсаськ, синь ашесть сував ся ваймама вастти эсь аф кемамаснон инкса.