Еврейхненди сёрмась 2 - Од Соткс Новый Завет на мордовском-мокша языке 2016

Инь оцю идемась

¹ Сяс тейнек эряви кемоста кирдемс мяльсонк сянь, мезе кулеме: афолеме усков виде киста.

² Вдь, кда ангелхнень вельде азф валсь ульсь кеме и коень эрь кодама коламась и аф кулхцондомась кандсть кодама эряви пандома,

³ эста дяряй минь мянттяма пандомада, кда тя инь оцю идемать лувсаськ аф питникс? Тя идемать колга васенцекс корхтась Сонць Азорсь, и сят, конат кулезь Сонь валонц, кемокстазь сонь и пачфтезь сонь тейнек.

⁴ Сонцьке Шкайсь синь мархтост марса кемокстазе тя валть тяштькснень, дивань тефнень и эрь кодама вии тефнень вельде, и Иняру Ваймопожфть казнензон вельде, конатнень Сон явондсыне Эсь мяленц коряс.

Иисус вятьсыне ломаттнень идемати

⁵ Сай пингонь масторлангть, конань колга минь тяса корхтатама, Шкайсь максозе аф ангелхнень кядялу.

⁶ Меколанкт, кие-бди коса-бди Сёрматфксса корхтась: «Кие стамсь ломанць, мес Тон арьсят колганза? Али ломанень цёрась, мес Тон ванат мельганза?

⁷ Нюрьхкяня пингонди Тон путыть сонь ангелхнень коряс сяда алу. Тон щафтыть сонь прязонза иневалдонь и шнамань каштазть и путыть сонь азоркс Тонь тефнень лангса.

⁸ Тон семботь путыть сонь пильгонзон алу». Мзярда Шкайсь ладязе сонь азоркс семботь лангса, эста Сон мезевок ашезь када сонь азорксшифтомонза. Тяни минь нинге аф няйсаськ сонь азорксшинц семботь лангса.

⁹ Но минь няйсаськ Иисусонь, конань прязонза щафтф иневалдонь и шнамань каштаз маятамаса куломанц инкса. Сон нюрьхкяня пингонди путфоль ангелхнень коряс сяда алу, сяс мес Шкаень пароказнеть коряс Иисусонди эрявсь куломс эрь ломанть инкса.

¹⁰ Тяфта улемаль: Шкайсь, конань инкса и конань вельде сембось ули-эряй, и кона лама идь вятни Эсь иневалдонцты, маятаматнень вельде тиезе афсатыксфтомокс Сянь, кие тюрсь инксост и вятьсыне синь идемати.

¹¹ Вдь и Ся, кие иняруяфты и сят, конат иняруяфтовихть, синь сембонь фкя Алясна. Сяс Иисус аф визди лемнемс синь брадкс. Сон корхтай:

¹² «Мон пачфтьса Тонь лемцень брадненди, пуромксса моразь шнате Тонь».

¹³ И нинге корхтай: «Мон карман надияма Сонь лангозонза», и нинге: «Ваган Мон и иттне, конатнень максозень Тейне Шкайсь».

¹⁴ Ня иттне ащихть ронгста и верста, сяс Иисусовок арась синь лацост. И тяфта, куломать вельде Сон машфтозе вийда сянь, конань ули азорксшиц куломать лангса, лиякс мярьгомс, идемэвозть,

¹⁵ и нолдазень воляшис сембонь сятнень, конат куломада пелеманкса кирневсть эряфоньберьф урексшиса.

¹⁶ Вдь Сон лезды аф ангелхненди, а Авраамонь идензонды.

¹⁷ Сяс Иисусонди эрявсь сембоса арамс брадонзон лаца. Эста Сон маштоль покодемс кельгозь ужяльди озксвятиень оцюнякс, кона тиенди Шкайть мяленц коряс, и маштоль максомс Эсь прянц озксказнекс ломаттнень пежеснон идемаснон-рамамаснон инкса.

¹⁸ Сяс мес Сон ётазень маятаматнень и ульсь варчсев, Сон машты лездомс сятнендинге, конат повондыхть варчсемас.