Еврейхненди сёрмась 13 - Од Соткс Новый Завет на мордовском-мокша языке 2016

Эряда Шкайть мяленц коряс

¹ Фалу кельгода фкя-фкянь кемай ялгань кельгомаса.

² Тясть юксне инжиень кельгомать. Вдь ульсть ломатть, конат апак содак, васьфтсть эсь пялост ангелхт.

³ Арьседа сятнень колга, кит пякстафт, и лездода тейст тяфта, бта тиньге мархтост пякстафтада, и тясть юксне маятайхнень, бта тиньге маятатада синь мархтост.

⁴ Катк эрсь кирдьсы пара лувксса рьвяямань сотксть. Мирттненди и рьватненди эряви улемс видекс и арукс фкя-фкянь инголе; вдь Шкайсь судендасыне сятнень, кит усксевихть и васькафнесазь поласнон.

⁵ Тяда панце ярмакнень мельге, но катк тейнть саты ся, мезенте ули ни. Вдь Сонць Шкайсь мярьгсь: «Аф катте тонь и аф туян эздот».

⁶ Сяс минь аф пелезь корхтатама: «Азорсь тейне лезды, и мон аф карман пелема. Мезе тии тейне ломанць?»

⁷ Мяляфтость эсь вятиентень, конат азондозь тейнть Шкаень валть. Ванода, кода синь эрясть и кодама имож кандсь синь эряфсна, и тиендеда синь кемамаснон коряс.

⁸ Иисус Христоссь фкя тяка и исяк, и тячи, и пефтома пингс.

⁹ Тясть макса шарфтомс прянтень виде ки лангста эрь кодама и ширде саф тонафнематненди. Пара, кда седись кемокстай Шкаень пароказнеть эзда, а аф ярхцамань койхнень мельге молемать эзда. Ня койхнень мельге молемась нинге киндиге ашезь канда лезкс.

¹⁰ Минь ули алтареньке, конань лангста аф мярьгондеви ярхцамс сятнендни, кит покодихть иняру кошса.

¹¹ Тинь содасасть: озксвятиень оцюнясь каннесыне жувататнень верснон пежеть инкса озксказнекс иняру вастти, а синь ронгснон плхнесыне Израилень ломаттнень эряма вастснон эзда ширеса,

¹² сяс Иисусовок маятась и кулось ширеса, аф ошть потмоса вага мезенкса: Эсь веронц вельде иняруяфтомс ломаттнень.

¹³ Сяс листяма Тейнза, ширети, и каннесаськ Сонь сялдоманц.

¹⁴ Вдь тяса минь аш фалунь ошеньке, но минь вешендьсаськ ся ошть, кона кармай улема сай пинкнень.

¹⁵ Сяс, карматама Иисусонь вельде апак лотксек каннема шнамань озксказне Шкайти, лиякс мярьгомс, эсь валоньконь, конат шнасазь Сонь лемонц.

¹⁶ Тясть юксне паронь тиемать и фкя-фкянди лездомать, сяс мес тяфтама озксказнетне мялезонза Шкайти.

¹⁷ Кулхцондода эсь вятиентень эса и уледа сятявкс мархтост. Вдь синь шинек-венек пичедихть-канзедихть тинь ваймонтень инкса, сяс мес тейст сави тинь инксонт корхтамс Шкайть инголе. Катк синь тиендьсазь тянь кеняртькс потмоса, а аф куфцезь. Вдь тя аф лезды тейнть.

¹⁸ Озондода минь инксонк. Минь кемоста содасаськ: ваймовайгяленьке аруфт, вдь минь сембоса ёратама эрямс видеста.

¹⁹ Мон эняльдян тейнть сядонга пяк озондомс вага мезенкса: максольхть тейне сяда курок мрдамс тейнть.

Озондомась и мекольце валхне

²⁰ Сетьмошинь Шкайсь, кона вельмафтозе кулофнень эзда минь Азороньконь Иисусть (Христость), учань инь оцю Ваныть, и Сонь веронц вельде кемокстазе пефтома пингонь сотксть,

²¹ катк аноклатядязь тинь эрь кодама пара тевонди, и тяфта тинь карматада тиендема Сонь мяленц коряс. И катк Сон Иисус Христосонь вельде тисы эсонт сянь, мезе Сонь мялезонза. Улеза Христости иневалда пефтома пингс! Аминь.

²² Эняльдян тейнть, кемай ялгат, кулхцондость тя кемокстай валть. Вдь мон аф лама сёрмадонь тейнть.

²³ Тейнть эряви содамс: кемай ялганьконь, Тимофеень, нолдазь пякстамгудста. И кда сон курокста сай тейне, эста минь марса сатама тинь ширезонт.

²⁴ Азода пара вал сембе вятиентенди и сембе иняру ломаттненди. Италиянь кемай ялганьке кучихть тейнть пара валхт.

²⁵ Шкаень пароказнесь улеза тинь сембонь мархтонт! Аминь.