Еврейхненди сёрмась 12 - Од Соткс Новый Завет на мордовском-мокша языке 2016

Азорсь сюци-тонафты минь эсонк

¹ Сяс мес минь перьфканк тяшкава лама ломаньда, конатнень кемамасна ащи кепотьксокс тейнек, тейнековок эряви ёрдамс эсь лангстонк сембе сталмоть и тёждяста педи пежеть. Эрьда, сталмонь кирдезь и сембе виеньконь путозь ласьксаськ инголенк ацаф кить.

² Апак лотксек карматама ванома Иисусонь лангс, кемаманьконь ушедыенц и педа-пес пяшкодиенц лангс. Сон инголенза ащи кеняртьксть вастс кулось крёз лангса, аф ваномок визьксть лангс, и тяни озаф Шкайть озама вастонц види ширесонза.

³ Арьседа Сянь колга, конац тняра сялдома кирдсь пежуфнень эзда. Тя лезды тейнть аф сиземс и аф лафчемомс ваймоса.

⁴ Тинь нинге ашесть вала веронтень тюремаса пежеть каршек.

⁵ Тинь прокс юкстасть кемокстафты валть, кона азфоль тейнть, кода иттненди: «Цёрай, тят вана тёждяста Азорть сюцеманц-тонафтоманц лангс и тят лафчемом, мзярда Сон лихнесы лангу тонь пежецень.

⁶ Вдь Азорсь сюцесы-тонафтсы сянь, конань кельгсы; пикссы эрть, конань сявсы Эстейнза цёракс».

⁷ Тейнть эряви кемоста кирнемс сембе стакашитнень, конатнень вельде Шкайсь касфты эсонт, кода эсь идензон. Дяряй, ули стама цёра, конань афолезе сюце-тонафта аляц?

⁸ Кда тинь эсонт аф сюцихть и аф тонафтыхть, кода тиендихть сембе иттнень мархта, эста тинь аф койть коряс шачф иттяда, аф афкуксонь цёратада.

⁹ Мзярда масторлангонь аляньке сюцекшнемазь-тонафнемазь, минь кулхцондоськ синь сюцемаснон-тонафтомаснон, сяс мес ёраме ваномс синь мяльснон. Эста конашкава сяда кулхцондыкс эряви улемс менелень Аляти, вдь тя кулхцондомась максы тейнек эряф.

¹⁰ Минь масторлангонь аляньке сюцесть-тонафтсть эсонк эсь шарьхкодемаснон коряс нюрьхкяня пингонди. Но Шкайсь тянь тиендьсы тейнек лездоманкса, сяс мес Сонь мялец максомс тейнек пялькс Эсь инярушисонза.

¹¹ Эрь сюцемась-тонафтомась эсь пингстонза маряви ризфокс, а аф кеняртьксокс. Но меле, сятненди, кит сонь вельденза ульсть тонафтфт, сон канды видексшинь и сетьмошинь имож.

¹² Сяс кемокстасть сизеф кядентень и трнаты плманжантень

¹³ и якада виде киге вага мес: шаморды пильгсь афоль муводев, меколанкт, тиеволь шумбракс.

Тясть кадонда Шкайть

¹⁴ Сатнеда сетьмоши сембонь мархта и эряда инярушиса, конафтома кивок аф няйсы Азорть.

¹⁵ Ванода, кивок афоль иляда Шкаень пароказнефтома, и тянь вельде афоль эвонда ётксонт кодамовок сяпи юр, кона маштоль кандомс зиян и ламотнень тиемс аф арукс.

¹⁶ Тяконь лаца тяза уле ётксонт кодамовок усксеви али шкайфтома, кода Исав. Сон фкя лям шаванянкса мизень ся паротнень, конат макссевихть шачемань коряс васень цёратненди.

¹⁷ Вдь тинь содасасть, кода тяда меле сонь мялецоль сявомс алянц бславаманц, но ульсь паньф. Сон ашезь машта полафтомс сянь, мезе ни тись, хуш и эняльдсь тянь колга сельмоведь мархта.

¹⁸ Тинь саде аф ся пандти, конань ули кода токамс кядьса и кона палы толса; саде аф шобдати и аф сюнерашити, афи даволти.

¹⁹ И тинь саде аф торамать кайгоманцты и аф стама вайгяльти, конац корхтась эвфти валса Израилень ломаньтналть мархта. Сят, кит кулезь ся валхнень, эняльдсть аф корхтамс тейст оду.

²⁰ Сяс мес тейст ашезь кирдев тя кошаркссь: «Кда мянь жуватась токай пандти, сон эряви шавомс кевса».

²¹ И сяшкава эвфти ульсь тя няемась-кулемась, мянь Моисейге мярьгсь: «Мон пелян и трнатан».

²² Меколанкт, тинь саде Сион пандти, эряй Шкайть ошенцты – менелень Иерусалимти, и ангелхненди, конатнень аш лувкссна;

²³ Тинь саде кеняртькшни пуромксти васень шачфнень мархта, конатнень лемсна сёрматфт менельса. Тоса Шкайсь, конац сембонь судьясна, и тоса жа видексшинь ваймопожфне, конатненди ни максовсь афсатыксфтомашись.

²⁴ Тинь саде Иисусти – од сотксса тевонь якафтыти, и Сонь валф веронцты. Сонь вероц корхтай сяда цебярьста Авелень веронц коряс.

²⁵ Ванода, афоледе шарфта Корхтайть эзда. Кда сят, кит ашезь кулхцонда масторлангста корхтайть, ашесть ворьгодев наказамать эзда, эста сядонга пяк минь аф ворьгодефтяма наказамать эзда, кда минь шарфттама менельста Корхтайть эзда.

²⁶ Сонь вайгялец эста шерьфтезе масторть, и тяни Сон макссь вал: «Тага весть шерьфтса масторть, и аф аньцек масторть, но и менельть».

²⁷ Валхне «тага весть» няфтихть: сят, конат шерьфтевихть, лиякс мярьгомс, тифне – улихть полафтфт. Эста илядыхть аньцек сят, конат аф шерьфтевихть.

²⁸ Тейнек максови Оцязорксшись, кона аф шерьфтеви. Сяс эрьда ульхтяма сюконяйкс Шкайти и сюконятама-покоттяма Тейнза Сонь мяленц коряс, лувомок Сонь лемонц питникс и пелезь эздонза,

²⁹ сяс мес минь Шкаеньке – сембонь плхтай тол.