Еврейхненди сёрмась 11 - Од Соткс Новый Завет на мордовском-мокша языке 2016

Кунардонь пингонь кемайхне

¹ Кемамась – тя, мзярда минь эрятама сянь коряс, мезть лангс надиятама и кемоста содасаськ сянь, мезе тейнек нинге аф няеви.

² Шкайсь шназень кунардонь пингонь ломаттнень кемамаснон инкса.

³ Кемамать вельде минь шарьхкодьсаськ: сембе менельсь-масторсь ульсь тиф Шкайть валонц вельде, и тянь лаца сембось, мезсь няеви тяни, ульсь тиф аф няевить эзда.

⁴ Эсь кемаманц вельде Авель кандсь Шкайти сяда цебярь озксказне Каинонь коряс. Сяс мес Авель кемась, Шкайсь шназе сонь и мярьгсь: сон видексшинь ломань, и сявозень кантф казнензон. Тяниенге сонь кемамац тейнек корхтай, хуш сонць Авель ни кулось.

⁵ Кемамать вельде Енох сявфоль менели куломань апак содак. И ашезь му сонь, сяс мес Шкайсь сявозе сонь Эстейнза. Нинге менели сявомдонза инголи тейнза кемоста азфоль: сон тусь Шкайть мяльс.

⁶ А кемамафтома аш кода тумс Шкайть мяльс. Сяс мес эрти, кие сашенды Тейнза, эряви кемамс: Шкай ули и Сон казьсыне сятнень, кит вешендьсазь Сонь.

⁷ Кемамать вельде Ной тись оцю венч эсь кудэряензон идеманкса. Сон ванозе Шкайть мяленц и кулхцондозе Сонь, мзярда тейнза азфоль ся, мезе нинге ашезь няев. Кемамать вельде сон судендазе тя масторлангть, а эстейнза максфоль видексши, кона сай кемамать вельде.

⁸ Кемамать вельде Авраам кулхцондозе Шкайть, мзярда Шкайсь мярьгсь тейнза тумс ся модати, конань надияфтозе максомс тейнза. Сон тусь тоза, хуш ашезе сода коза моли.

⁹ Кемамать вельде сон эрясь надияфтф модать лангса, кода лия масторонь ломань. Сон эрясь кошева, тяконь лаца эрясть Исааконь мархта Иаковок. Тейст максфоль ся сяка надияфтомась, конань Шкайсь максозе Авраамонди.

¹⁰ Сон аноколь эрямс кошева, сяс мес учсь ош, кона ащи кеме юр лангса и конань арьсезе-тиезе Сонць Шкайсь.

¹¹ Кемамать вельде Сарравок, улемок аф шачфтыкс, маштсь пекиямс, хуш ульсь ни пяк сире. Вдь сон арьсесь: Надияфтысь кирдьсы валонц.

¹² И сяс фкя сире алять эзда, кона ульсь кулома лангса, шачсь сяшкава лама идьта, конашкава лама менельса тяштьта и оцюведень трваса шуварда.

¹³ Сембе ня ломаттне ванфтозь кемамать куломозост, хуш тейст апак макстоль ся, мезе Шкайсь надияфтсь. Синь аньцек ичкозде няезь ся надияфтоматнень, и кеняртькшнесть тейст. Эсь колгаст корхнесть: синь лия масторонь ломатть и аньцек нюрьхкяня пингонди лоткасть тя масторти.

¹⁴ Сят, кит тяфта корхтайхть, няфнесазь: синь вешендьсазь эсь афкуксонь шачемань масторснон.

¹⁵ И кда синь арьсельхть ся масторть колга, коста синь тусть, эста синь маштольхть мрдамс меки.

¹⁶ Но синь мяльсноль сатомс сяда цебярь масторть, лиякс мярьгомс, менеленнеть. Вага мес Шкайсь аф визди, мзярда синь лемнесазь Сонь эсь Шкайкс; вдь Сон аноклась тейст ош.

¹⁷ Кемамать вельде Авраам максозе Исааконь озксказнекс, мзярда Шкайсь варчсезе сонь. Ся, кинди максфтольхть надияфтоматне, ульсь анок кандомс озксказнекс эсь фкя тяка цёранц,

¹⁸ конань колга ульсь азф: «Исааконь эзда шачи-касы тонь юромце».

¹⁹ Авраам арьсесь: Шкайсь машты мянь кулофнень эзда вельмафтомс. Сяс, мзярда Шкайсь мрдафтозе Авраамонди Исааконь – тя ульсь кода кулофнень эзда вельмама.

²⁰ Кемамать вельде Исаак бславазень Иаковонь и Исавонь, и азозе тейст, мезе ули мархтост сай пингть.

²¹ Кемамать вельде Иаков, куломда инголе, бславазень Иосифонь кафцьке цёранзон и, нежедезь эсь байдеконц лангс, озондсь Шкайти.

²² Кемамать вельде Иосиф, улемок кулома лангса, азозе Израилень ломаттнень Египетста лисемаснон колга и мярьгсь тейст, мезе эряви тиемс сонь пакарензон мархта.

²³ Кемамать вельде Моисеень шачфтыенза кяшендезь сонь колма кофт шачемдонза меле. Сяс мес синь няезь конашкава мазы Моисей, и ашесть пеле оцязорть кошардоманц коламда.

²⁴ Кемамать вельде Моисеень, мзярда сон кассь, ашель мялец лемнемс эсь прянц фараононь стирти идькс.

²⁵ Пежеть нюрьхкяня пингонь ламбамашинзон и тёждя эряфть вастс сон сяда цебярькс лувозе Шкаень ломаньтналть мархта маятамать.

²⁶ Сон лувозе Христость инкса сялдомать сяда питникс Египетонь козяшитнень коряс, сяс мес сон ванць инголе ащи казнеть лангс, кона учсезе сонь.

²⁷ Кемамать вельде сон кадозе Египетть, оцязоронь кяжда аф пелезь. Вдь сон, кода ба няезе Аф Няевить, и сяс ульсь кеме.

²⁸ Кемамать вельде сон ладязе-ётафтозе евреень Очижить. Сон валозень верса кенкшень касякнень: куломань ангелсь афолезень шава Израилень иттнень Египетонь васень шачф иттнень мархта марса.

²⁹ Кемамать вельде Израилень ломаньтналсь ётась Якстерь оцюведть пачк, кода коське модава. Но мзярда египтяттне тяряфтсть тиемс тяконь лаца – синь ваясть.

³⁰ Кемамать вельде прасть Иерехон ошть стенанза сисем шит перьфканза якамда меле.

³¹ Кемамать вельде Раав, усксеви авась, сетьмоши мархта нолдазень эсь кудозонза Израилень алятнень, конат састь салава ваномс Ханаанонь масторть, и тянкса сонь ашезь шава Шкаень аф кулхцондыхнень мархта.

³² Мезе нинге азан тейнть? Аф саты тейне пинге азондомс Гедеононь, Вараконь, Самсононь, Иеффаень, Давидонь, Самуилонь и пророкнень колга.

³³ Кемамать вельде синь сяськондезь масторхнень, кемокснезь виде эряфть, няезь Шкаень надияфтоматнень пяшкодемаснон, пякснезь лефнень кургснон,

³⁴ матнезь вии толть, ворьготькшнесть оржа торда. Синь ульсть лафчт и арасть эрьгафт. Синь арасть кемокс тюремаса, панцезь душматтнень тюриснон.

³⁵ Ульсть ават, конатненди кулоф раднясна максфтольхть меки вельмафста. Ина лиятне ашезь сяв ся воляшить, конань тейст макссезь, и маятазь кулость, сяс мес синь мяльсноль сатомс вельмамать сяда цебярь эряфса.

³⁶ Лиятне кирдсть эсь лангсост сялдомат и локшеса пикссемат, и кирдсть мянь цинзерса и пякстамгудса улема.

³⁷ Синь шавондозь кевса, керсезь кафтова, синь маятафтозь и сялгондозь торса. Синь якасть-шяясть верозонь и сявань кедьста тиф щамса, кирдсть ашуши, люпштамат и пикссемат-маятамат.

³⁸ Ня ломаттне ульсть вельф цебярьхть тя масторлангти и сяс синь якасть-шяясть шавмодава и пандова, и эрясть кевботмарга и модань лазкснень ёткова.

³⁹ Шкайсь шназень сембе ня ломаттнень кемамаснон инкса. Но сякокс тейст ашезь максов ся, мезе надияфтфоль,

⁴⁰ сяс мес Шкайть ульсь сяда цебярь арьсефоц аф аньцек тейст, но тейнеконга. Сонь мялец ульсь тяфтама: сатолезь ня ломаттне афсатыксфтомашить аньцек минь мархтонк марса.