Еврейхненди сёрмась 10 - Од Соткс Новый Завет на мордовском-мокша языке 2016

Христос – афсатыксфтома озксказнесь

¹ Койсь – тя аньцек сай пингонь паротнень цильфсна. Тя нинге аф синць паротне. Сяс койти мзярдонга аф тиевихть афсатыксфтомокс сят, конат эрь кизоня сашендыхть фкя сяка озксказнеснон мархта.

² Кда Шкайти покодихне весть и сембе пинкненди улельхть аруяфтфт, синь лоткальхть тяфтама озксказнень каннемда, сяс мес лангсост афоль уле кодамовок пеже.

³ Но тяфтама озксказнетне эрь кизоня лятфнихть пежетнень колга.

⁴ Вдь букань и сявань версь аф машты валхтомс пежеть.

⁵ Сяс Христос, масторлангти самстонза, мярьгсь Шкайти: «Тейть ашесть эряв озксказнет и казнет, но Тон аноклать Тейне ронга.

⁶ Тонь мялезт ашесть ту плхтаф озксказнетне и пежетнень инкса озксказнетне.

⁷ Эста Мон мярьгонь: "Мон тясан и молян – кода книгаса сёрматф Монь колган, – тиемс Тонь мяльцень коряс, Шкай"».

⁸ Васенда Сон мярьгсь: «Аф озксказнет, аф казнет, аф плхтаф озксказнет, аф озксказнет пеже инкса Тейть ашесть эряв, синь аф мялезт Тейть», хуш синь койть коряс канневихть.

⁹ Сяльде Сон мярьгсь: «Мон тясан, и молян тиемс Тонь мяльцень коряс, Шкай». Тяфта Сон урядазе васенцеть и путозе сонь вастозонза омбоцеть.

¹⁰ Шкайть мяленц коряс минь улеме иняруяфтфт Иисус Христость ронгонц вельде, конань Сон кандозе озксказненди весть и сембе пинкненди.

¹¹ Шиста шис эрь озксвятись ащи эсь покодемасонза и каннесыне фкя сяка озксказнетнень, конатнень аш вийсна валхтомс пежетнень.

¹² А вага Христос весть и сембе пинкненди кандсь аньцек фкя озксказне пежетнень инкса и тяда меле озась Шкайть види ширезонза.

¹³ Ся пингста сявомок Христос учи, мзярда Шкайсь путсыне каршек ащихнень Сонь пильгалонза.

¹⁴ Вдь фкя озксказне вельде Сон тиезень пефтома пингс афсатыксфтомокс сятнень, конат иняруяфтовихть.

¹⁵ Тянь кемокстасы тейнек Иняру Ваймопожфське. Вдь васенда Сон корхтай:

¹⁶ «Вага соткссь, конань Мон тиса синь мархтост тона шитнень меле, – корхтай Азорсь, – Мон путсайне Эсь койнень синь седиезост и сёрмадсайне синь мялезост».

¹⁷ И сяльде Сон тага корхтай: «Пежеснон и койфтома тевснон оду мзярдонга аф лятфтасайне».

¹⁸ Мзярда пежетне нолдафт, эста ни аф эряви озксказне пежетнень инкса.

Сатама Шкайти панжада седиса

¹⁹ Кемай ялгат! Иисус Христость веронц вельде минь машттама аф пелезь сувамс сембодонга иняру вастти, молемок од и эряфонь максы киге.

²⁰ Сон панжезе тейнек тя од кить, конац ётай котфонь перяфксть пачк, лиякс мярьгомс, Сонь ронгонц пачк, кона ульсь кантф озксказнекс.

²¹ Минь ули инь оцю Озксвятиеньке, кона ащи азоркс Шкаень кудть тевонзон лангса.

²² Эрьда сашенттама Шкайть инголи панжада седиса, кеме кемамаса, стама седиса, конац аруяфтф верса мувору ваймовайгяльть эзда, и ронгса, конац штаф ару ведьса.

²³ Карматама кемоста кирдевома ся надиямаса, конань минь азонкшнесаськ сембонь инголе, сяс мес Надияфтысь кирдьсы валонц.

²⁴ Эрьда арьсетяма вага мезень кувалма: кода тейнек крьвястемс эрть эса кельгома и пара тевонь тиема.

²⁵ Аф карматама кадондомс эсь пуромксоньконь, кода конат-конат тиендихть. Меколанкт, эрьда карматама кемокстакшнема фкя-фкянь. И тяни, мзярда няйсасть Азорть шинц маладоманц, нинге сядонга пяк кемокстакшнеда фкя-фкянь.

Тяда шарфне Христость эзда

²⁶ Вдь кда минь, конатненди максф содамс видешить, шарьхкодезь тиенттяма пежет, эста минь пеженьконь инкса аш кодамовок озксказне.

²⁷ Иляды аньцек фкя: пелемаса учемс Шкаень судть и кяжи толть, кона анок нилемс Шкайти каршек ащихнень.

²⁸ Кие шарфты Моисеень койть эзда, ся апак ужяльтть ули судендаф куломати, кда улихть кафта али колма няихть-содайхть, конат кемокстасазь тя шарфтомать.

²⁹ Арьседа, конашкава сяда стака наказама учсы сянь, кие пильгса тапсесы Шкаень Цёрать и аф лувсы инярукс сотксонь верть, конаса сон ульсь иняруяфтф, и кие пароказнень Ваймопожфть сялдсы!

³⁰ Минь содасаськ Сянь, конац мярьгсь: «Монь кядьсон кяжень пандомась. Мон пандса». И нинге: «Азорсь судендасы Эсь ломаньтналонц».

³¹ Конашкава пелькс повомс эряй Шкайть кядьс!

Ащеда кемоста стака пингста

³² Лятфтасть ингольдень шитнень, мзярда Шкайсь валдоптодязь тинь Эсь валдсонза. Эста тинь кирдеде лама оцю сталма и сякокс ащеде кемоста.

³³ Ульсть пинкт, мзярда сембонь ингольде тинь эсонт сялдсть и маятафтсть, и ульсть пинкт, мзярда тинь марсоледе сятнень мархта, кит маятасть тинь лацонт.

³⁴ Тинь марясть ризнамаснон сятнень, кит ульсть пякстамгудса. Тинь кеняртькшнеде, мзярда нельгондезь тинь уликсшинтень, сяс мес содасть: менельса тинь ули сяда цебярь уликсшинте, кона кармай улема фалу.

³⁵ Сяс, тясть кадонда аф пелемать, вдь тянкса кармай инь оцю казне.

³⁶ Тейнть эряви кирдемс сталмотнень пингста. Тянь вельде тейнть пяшкодеви Шкайть мялец и максови Сонь эздонза надияфтфсь:

³⁷ «Вдь нинге аф лама, прокс аф лама, и сай Ся, кинди эряви самс. Сон пингть аф таргасы.

³⁸ Видексшинь ломанць кармай эряма кемамать вельде; а кда кие кармай пелема и сяс кадсы кемамать, ся аф туй Монь ваймозень мяльс».

³⁹ Но минь аф сятнень ёткста, конат пелеманкса кадозь эсь кемамаснон и повихть аду. Минь сятнень ёткста, конат кемайхть и сяс идефтяма.