Еврейхненди сёрмась 1 - Од Соткс Новый Завет на мордовском-мокша языке 2016

Шкайсь корхтай Эсь Цёранц вельде

¹ Ётай пинкнень Шкайсь ламоксть и эрь кода корхнесь минь аляньконди пророкнень вельде, пяльксонь-пялькс няфнемок тейнек Эсь прянц.

² А ня мекольдень шитнень Сон корхтась тейнек Эсь Цёранц вельде, конань вельде тиезень менельхнень-масторхнень и конанди Сон макссы семботь.

³ Цёрась – Шкаень иневалдть вандолфоц и Сон Эсьсонза няфнесы афкукс кодама Шкайсь, и Сон семботь кирдьсы Эсь валонц виенц вельде. Сон аруяфтомазь минь пеженьконь эзда и тяда меле озась менельса инь оцю Шкайть озама вастонц види ширезонза.

Цёрась ангелда оцю

⁴ Цёрац арась ангелда оцюкс сяшкада, конашкада оцю Тейнза максф лемсь ангелхнень лемснон коряс.

⁵ Вдь Шкайсь мзярдонга фкявок ангелти ашезь мярьге: «Тон Монь Цёразят, тячи Мон шачфтыхтень Тонь» али тяфта: «Мон улян Тейнза алякс, а Сон ули Тейне Цёракс».

⁶ И тага, Эсь васень Цёранц масторти сувафтомста, Сон мярьгсь: «Катк сембе Шкаень ангелхне комайхть Сонь инголенза».

⁷ Ангелхнень колга азф: «Сон тиендьсыне Эсь ангелонзон вармакс и Эсь покодиензон толгялькс».

⁸ А Цёранц колга азф: «Шкай, Тонь оцязоронь озама вастце кирдеви пефтома пинге и Тонь азорондамань вийце няфневи видексшить вельде.

⁹ Тон кельгить видешить и прокс ашить кельге койфтома тефнень, сянкса Шкайсь, Тонь Шкайце, вадензе Тонь кеняртьксонь елейса сядонга пяк сятнень коряс, конат мархтот».

¹⁰ И нинге азф: «Азор, ушетксса Тон путыть тя масторть юронц, и менельхне тифт Тонь кядьсот.

¹¹ Синь сембе юмайхть, аньцек Тон илядат. Синь сембе таштомихть, кода щапт.

¹² Тон ашкордасайть синь сире щам лаца, и синь полафтовихть. Аньцек Тон фалу стамкат, и кизотне Тонь аф аделавихть».

¹³ Фкявок ангелонди Шкайсь ашезь мярьге: «Озак Монь види ширезон, мзярс аф путсайне Тонь пильгалот Тейть каршек ащихнень».

¹⁴ Дяряй аф сембе ангелхне – тя лезды ваймопожфт? Синь кучфт лездома сятненди, кинди максови идемась.