Апостолхнень тевсна 3 - Од Соткс Новый Завет на мордовском-мокша языке 2016

Коське пильге ломанть пчкафтомац

¹ Весть Пётр и Иоанн марса мольсть Шкаень куду. Тя ульсь вейхксоце частста, озондома пингть.

² Шкаень кудть Якстерькс лемневи ортанзон видеса озадоль ломань, конань пильгонза шачемстокиге афольхть яка. Эрь шиня сонь каннезь ня ортатненди анцема Шкаень куду сашендыхнень кядьста.

³ Сон няезе кода Пётр и Иоанн срхкасть сувама Шкаень кудть пирьфозонза, и анась кядьстост.

⁴ Пётр Иоаннонь мархта варжакстсть лангозонза и Пётр мярьгсь: «Ватт лангозонк».

⁵ Ся оржаста варжакстсь, учсь, сят мезевок максыхть.

⁶ Эста Пётр мярьгсь тейнза: «Аф сиязе, аф зрнязе аш. Но мезезе ули, сянь максса тейть. Назаретонь Иисус Христость лемса – стяк и якак».

⁷ Сявозе сярядить види кядьта и кеподезе сонь. Алять эстокиге пильге полданза и плманжанза кемокстасть,

⁸ сон комотсь вастстонза и ушедсь якама. Сон сувась мархтост Шкаень кудть пирьфозонза, тосовок кенярдемать эзда якась и комотнесь, шназе Шкайть.

⁹ Сембе ломаттне няезь, кода сон якась и шназе Шкайть.

¹⁰ Синь содазь, тя ульсь вчёк ся алясь, кона ащекшнесь Шкаень кудть Якстерь ортанзон видеса и анцесь. Синь пяк дивандафтозе и абонтфтозе ся, мезе лиссь алять мархта.

Пёторонь корхтамац Шкаень кудса

¹¹ Сяс мес пчкафтфсь ашезень кадонда Пёторонь и Иоаннонь, дивас праф ломаттне ласьксть тейст, ся вастти, конань лемнезь – Соломононь вельхтяф пирьфоц.

¹² Тянь няемста Пётр мярьгсь ломаттненди: «Израилень ломатть! Мес дивандатада тянди? Мес ваттада лангозонк стане, бта минь эсь вийсонк али эсь видексшисонк стяфтоськ сонь пильге лангс и сон арась якайкс?

¹³ Авраамонь, Исааконь, Иаковонь Шкайсна, минь атянь-атяньконь Шкайсна кеподезе-шназе Эсь Цёранц Иисусонь. Тинь мисть Сонь и потаде эздонза Пилатонь инголе, мзярда ся мярьгондсь нолдамс Сонь.

¹⁴ Тинь потаде Иняруть и Видексшинь Тиить эзда и эняльдеде нолдамс ломанень шавить.

¹⁵ Тинь шавость Эряфонь Максыть. Но Шкайсь кеподезе Сонь кулофнень эзда, тянь минь няеськ эсь сельмосонк и тянь колга азонттама.

¹⁶ Иисусонь лемоц и Тейнза кемамась кемокстазе тя ломанть, конань тинь няйсасть и содасасть. Иисусонди кемамась пчкафтозе алять сельминголент.

¹⁷ Мон содаса, ялгат, тинь и тинь оцюнянтевок аф содамошида максость Христость куломас.

¹⁸ Но тяфта Шкайсь пяшкодезе сянь, мезе кунаркиге азондсь сембе пророконзон вельде: Христости сави кирдемс оцю маятамат.

¹⁹ Сяс каендада и шарфтода Шкайти эсь пежентень нолдаманкса! Кда тяфта тихтяда,

²⁰ эста сай одкстоптомань пингсь, кона максови Азорть эзда; и Сон кучсы тейнть Иисус Христость, конань инголькиге кочказе тейнть.

²¹ Тейнза лядома менельса ся пингть самс, мзярда Шкайсь одукс тисы семботь, кода надияфтсь кунаркиге иняру пророконзон вельде.

²² Вов мезе мярьгсь атянь-атятненди Моисей: "Азорсь, Шкаенте, кучи тейнть Пророк тинь ломанентень ёткста, кода кучемань монь. Кулхцондость Сонь сембоса, мезе Сон мярьги.

²³ Эрь ломанць, кие аф кулхцондсы ся Пророкть, ули паньф Шкаень ломаньтналста и юмай".

²⁴ Ня шитнень колга корхтасть лия пророкневок: Самуил и сембе, кит ульсть прорококс сонь мельганза.

²⁵ А тинь пророкнень уноконь-уноксна, сят, кинди катф соткссь, конань Шкайсь ладязе тинь алянтень мархта, мзярда мярьгсь Авраамонди: "Масторлангонь сембе ломаньтналхненди канды бславама тонь уноконь-унокце".

²⁶ И мзярда Шкайсь вельмафтозе Эсь Цёранц, Сон васенда кучезе Сонь тейнть – бславамонт и кяжи тевда аерфтомонт».