Апостолхнень тевсна 2 - Од Соткс Новый Завет на мордовском-мокша языке 2016

Иняру Ваймопожфть валгомац

¹ Мзярда сась Ведьгемонь шинь илась, синь сембе фкя седиса-мяльса ульсть марса.

² Апак учт менельста кайгозевсь увф, кона ульсь оцю вармань увфть лаца, и сон пяшкодезе марнек кудботмоть, коса синь ащесть.

³ Синь няйсть кяльхть-корхтамат, конат ульсть бта толоннет. Ня кяльхне явожкшнезь валгондсть эрть лангс.

⁴ Сембе синь пяшкодсть Иняру Ваймопожфта и кармасть корхтама лия кяльхнень лангса сянь, мезе Ваймопожфсь макссесь корхтамс тейст.

⁵ Ся пингть Иерусалимса ульсть коень ванфты еврейхть масторбень сембе уженяста.

⁶ Увфть кайгозевомста сей кочкавсь лама ломань, конат прасть оцю абонксс, сяс мес эрсь кулезе – синь корхтайхть сонь кяльсонза.

⁷ И сембе синь дивандакшнесть и корхнесть эсь ётковаст: «Афоли сембе ня ломаттне, кяльсонк корхтайхне, Галилеянь эряйхть?

⁸ Мес ина эрсь эздонк марясы эсь шачема кяленц?

⁹ Ётксонк улихть парфияннет, мидияннет, еламитт, састь ломатть Месопотамияста, Иудеяста и Каппадокияста, Понтста и Асияста,

¹⁰ Фригияста и Памфилияста, Египетста и Ливиять Киринеянь аймакста, и Римста, кода еврейхть, стане и евреень кемамати шарфтф лия тналонь ломатть,

¹¹ Критонь и Аравиянь эряйхть. И сембе минь кульсаськ, кода синь корхтайхть Шкаень оцюдонга оцю тефнень колга минь кяльсонк!»

¹² Сембе вельф дивандакшнесть и абондозь кизефнесть фкя-фкянь: «Мезе тя тяфтамсь?»

¹³ Лиятне пеетькшнесть лангсост и корхтасть: «Ня ломаттне топодемс симсть ламбама винада!»

Пёторонь корхтамац ведьгемонь шинь иласта

¹⁴ Эста Пётр и лядыкс кефкие апостолхне стясть, и Пётр кайгиста пшкядсь пуромфненди: «Евреень ломатть, Иерусалимонь сембе эряйхне! Кулхцондость монь валнень! Содасть,

¹⁵ синь аф ирецтот, кода тинь арьсетяда. Вдь пингсь аньцек колмоце частть малава!

¹⁶ А мезе тяса тиендеви, ся азф Иоиль пророкть вельде:

¹⁷ "Вов мезе ули мекольдень шитнень, – корхтай Шкайсь, – Мон валса Эсь Ваймопожфозень сембе ломаттнень лангс. И кармайхть пророчендама тинь цёранте и стиренте, од ломаненте кармайхть няема няйфкст, атянте кармайхть няема отт, конат панчсазь сай пингть.

¹⁸ Тяконь лаца, ся шитнень Мон валса Эсь Ваймопожфозень покодинень лангс: кода алятнень стане аватненьге, и синь кармайхть пророчендама.

¹⁹ Няфтян дивань тефт вяре менельса и тяштькст алува, мода лангса: вер, тол и туста качам.

²⁰ Ши валдсь шобдалгоды и ковсь верыей Азорть инь оцю и иневалдонь шинц самда инголе.

²¹ И ули тяфта: эрсь, кие тердьсы Азорть лемонц, ули идеф".

²² Израилень ломатть! Кулхцондость монь валнень. Назаретонь Иисуссь ульсь Ломань, конань кучезе тейнть Шкайсь. Шкайсь тянь няфтезе-кемокстазе вии тевса, дивань тевса и тяштьксса, конатнень Сон тиендезень Иисусонь вельде. Тинь тинць содасасть тянь, сяс мес сембось тя тифоль тинь ётксонт.

²³ Сонь, Иисусонь, максозь тинь кядезонт Шкайть арьсефонц коряс и инголькиге содаманц коряс, и тинь коень аф содайхнень кядьснон вельде эськодесть Сонь крёзти, и шавость.

²⁴ Но Шкайсь вельмафтозе Сонь кулофнень эзда и сязезень куломань уськнень, сяс мес куломати аф вийс коре ульсь Сонь кирдемс кядялонза.

²⁵ Вов мезе Давид корхтай Иисусонь колга: "Мон фалу няине инголен Азорть: Сон ащи Монь види кядь ширесон, мезьдонга афолезан пеле.

²⁶ И сяс седиезе пяшкотьф кенярдемада, трвастон лисихть кенярдемань валхт, и нльне ронгозе эряй надиямаса,

²⁷ вдь Тон аф кадсак монь ваймозень тонашиса, кулофнень ёткса, и аф максат иняруцень ловажанцты наксадомс калмоса.

²⁸ Тон няфтить тейне эряфти вяти кить. Тон пяшкодьсамак кенярдемань таколфта, мзярда мон няйса Тонь шамаликцень".

²⁹ Ялгат! Ожуда, мон видеста азса тейнть: минь Давид атянь-атяньке кулось, сонь калмазь, и калмоц ванфтовсь тянемс.

³⁰ Но сон ульсь прорококс и содазе, мезе надияфтсь тейнза Шкайсь: Шкайсь варась тейнза кеподемс Христость ломанень ронгса и озафтомс Сонь оцязоронь озама вастти.

³¹ Давид няезе сай пингть, и корхтась Христость вельмаманц колга, мзярда мярьгсь: "Шкайсь ашезе када Сонь ваймонц тонашиса, кулофнень ёткса, и ловажац ашезь наксада калмоса".

³² Ся Иисусть вельмафтозе Шкайсь, а минь сембе тянь няеськ и тянь колга азонттама.

³³ Шкайсь кеподезе Сонь види кядь ширезонза и максозе Тейнза надияфтф Иняру Ваймопожфть, конань Сон сяльде каязе минь лангозонк. И тинь тяни няйсасть тянь и кульсасть.

³⁴ Давид ашезь кепсе менели, но сонць корхтай: "Азорсь мярьгсь монь Азорозти: озак Монь види кядь ширезон,

³⁵ мзярс аф путсайне Тонь пильгалот Тейть каршек ащихнень".

³⁶ Марнек Израилень ломаньтналсь, содак тянь кемоста: Шкайсь тиезе Азоркс и Мессиякс ся Иисусть, конань тинь эськодесть!»

³⁷ Ня валхнень кулемста ломаттнень седисна ляпомсь, и синь кармасть кизефнема Пёторонь и лядыкс апостолхнень: «Мезе ина тейнек тиемс, ялгат?»

³⁸ Пётр каршезост мярьгсь: «Кадость пежентень и эздонт эрсь кстиндафтоза пря Иисус Христость лемса пежень нолдаманкса. Эста тейнть казненди максови Иняру Ваймопожф.

³⁹ Тя надияфтф тейнть и тинь идентенди, и сембонди сятненди, кит ичкозет Шкайть эзда и кинь Шкайсь тердьсы Эстейнза».

⁴⁰ Лама лия валса Пётр корхнезень синь и тердсь эсост: «Максода Шкайти идемс прянтень тяниень пингонь кяжи ломаттнень эзда».

Кемайхнень эряфсна

⁴¹ Сят, кит мяльс сявозь сонь валонц, кстиндафтсть пря, и ся шиня кемайхнень лувкссна кассь нинге колмошка тёжянц.

⁴² Синь фалу эрясть-ащесть апостолхнень тонафтомаса, фкя-фкянь мархта корхнемаса-лездомаса, кшинь синдемаса-ярхцамаса и озондомаса.

⁴³ Эрь ваймоса ульсь пелема, сяс мес лама дивань тевда и тяштькста тифоль апостолхнень вельде Иерусалимса.

⁴⁴ Сембе кемайхне эрясть ладязь, сембосна ульсь марстонь.

⁴⁵ Синь мишендезь уликсснон и пароснон, а ярмакть явондозь сембонь ёткова, кинди мзяра эрявсь.

⁴⁶ Эрь шиня синь фкя ваймоса кочксевсть Шкаень кудса, и эсь кудгаваст кшинь синнезь, ярхцесть марса кеняртькс потмоса и панжада седиса,

⁴⁷ и шнакшнезь Шкайть. Сембе ломаттне кельгозь кемайхнень, и Азорсь эрь шиня сувафнесь кемаень пуромксти од идеф ломатть.