Павелонь омбоце сёрмац Тимофеенди 4 - Од Соткс Новый Завет на мордовском-мокша языке 2016

Тимофей Павелонь покодеманц поладыец

¹ Мон кошартте тонь Шкайть и Азороньконь Иисус Христость инголе, кона кармай судендамост эряйхнень и кулофнень, мзярда сай Эсь Оцязорксшинц мархта:

² пачфнек Шкаень валть, ульхть анок тя тевти цебярь пингста и аф цебярь пингстовок, няфнек аф видешинь тефнень лангс, карнек, кемокснек эрь кодама кирдемшка мархта и тонафтт тянди.

³ Сяс мес сай пинге, мзярда ломаттне аф кулхцондсазь шумбра тонафтомать, а эсь мяльснон коряс кочкайхть эстейст стама тонафтыхть, конат кармайхть корхтама тейст сянь, мезе синь мяльсна кулемс.

⁴ Синь пандсазь эсь пилеснон видешить эзда и кармайхть кулхцондома ёфкст.

⁵ Но тон ульхть кятавкс сембоса, кирдить сталмотнень, пачфнек Пара кулять и максф тевть тик афсатыксфтома.

⁶ Монь эряфозе путф алтарть лангс, и сась монь тума пингозе.

⁷ Мон лац ётафтыне тюремать, ётайне эсь кизень, кемамать ванфтыне.

⁸ Тяни тейне ванфневи видексшинь каштазсь, конань тейне макссы Азорсь, видексшинь Судьясь, ся мекольдень шиста. И аф аньцек тейне, а тяфта жа сембонди, конат седи ваксста учсезь Сонь саманц.

Павелонь эзда кулятне

⁹ Варжак куроконе самс тейне.

¹⁰ Сяс мес Димассь, конанди кельговсь тя пингонь эряфсь, кадомань монь и тусь Фессалонику. Крискентсь тусь Галатияв, Титсь – Далматияв. Мархтон илядсь аньцек ськамонза Лука.

¹¹ Сявк мархтот Марконь, сяс мес сон машты лац лездомс тейне покодемаса.

¹² Тихиконь мон кучине Ефесу.

¹³ Тумстот, сявк мархтот плащезень, конань мон кадыне Карпонь ширеса Троадаса, и книгатнень, васендакиге, сятнень, конат тифт кедьста.

¹⁴ Александр кузнецсь тись тейне лама кальдяв. Азорсь максы тейнза тевонзон коряс!

¹⁵ Тонга ванфтк эсь пряцень эздонза, сяс мес сон ульсь пяк каршек минь валоньконди.

¹⁶ Мзярда тейне савсь васенцеда араламс пря судса, тейне кивок ашезь лезда – сембе монь кадомазь. Катк тя аф лувови тейст шумокс!

¹⁷ Но монь мархтон ульсь Азорсь. Сяс мес Сон макссь тейне вий, мон маштонь педа-пес азондомс Пара кулять сембе лия ломаньтналхненди, и аралафолень тоса лефонь кургта.

¹⁸ Идесамань монь Азорсь сембе кальдявда и сувафтсамань Эсь Менелень Оцязорксшизонза. Шнама Тейнза пефтома пингс! Аминь.

Мекольце валхне

¹⁹ Азонтт пара вал эздон Прискилланди и Акиланди, и стане жа Онисифоронь сембе кудонцты.

²⁰ Ерастсь илядсь Коринфса; Трофимонь, кона сяряди, кадыне Милитса.

²¹ Эряскотт пачкодемс тейне тялоть самс. Азыхть тейть пара вал Еввулсь и Пудсь, Линсь и Клавдиясь, и сембе кемай ялганьке.

²² Иисус Христос Азорсь улеза тонь мархтот. Шкаень пароказнесь улеза мархтонт! Аминь.