Павелонь омбоце сёрмац Тимофеенди 2 - Од Соткс Новый Завет на мордовском-мокша языке 2016

Иисус Христость пара ушманоц

¹ Тяфта, цёрай, кемокснек пароказнеса, конац ули Христос Иисусса!

² И ся, мезе кулеть монь эздон лама ломанень инголе, пачфтьк валонь кирди кемайхненди, конат маштольхть тонафтомс и лиятненьге.

³ Киртть мархтонк сталмот тонга, кода Христос Иисусть пара ушманоц.

⁴ Кодамовок ушманць аф сотнесы эсь прянц кудъётконь эрямань-ащемань тевса, сяс мес ёрай тумс сянь мяльс, кие сонь сиводезе ушманкс.

⁵ И кодамовок пялькстыенди аф максови сяськиень каштазсь, кда сон кармай пялькстома аф ваномок койхнень лангс.

⁶ Сокайти-видити, конац покоди ливосьпарботмоса, васендакиге максома талекац кочкаф сёронц эзда.

⁷ Арьсек сянь колга, мезе мон корхтан, и Азорсь лезды тейть шарьхкодемс семботь.

⁸ Мяляфтк Давидонь юромста шачф Иисус Христос Азорть, кона ульсь вельмафтф кулофнень эзда. Тя ся Пара кулясь, конань мон пачфнеса.

⁹ Тянь инкса мон кирдян сталмот, мянь цинзерса пякстафан, кода пяк оцю кальдявонь тии. Но Шкаень валсь аф пякстави.

¹⁰ Сяс мон анокан кирдемс сембе сталмотнень Шкаень кочкафнень инкса, катк синьге идевихть Христос Иисусса и сатсазь пефтома эряфонь иневалдть.

¹¹ Ня валхне видет: кда минь Сонь мархтонза куломе, Сонь мархтонза эрямонга карматама;

¹² Кда кирттяма сталмот, Сонь мархтонза азорондамга карматама; Кда мярьктяма: «Минь аф содасаськ Сонь», – эста Сонга мярьги: «Мон аф содатядязь тинь».

¹³ Кда минь аерттама эсь валдонк, Сон эстонга иляды валонь кирдикс, сяс мес Эсь эздонза аердамс аф машты.

Шкаень покайсь

¹⁴ Лятфнек семботь тянь ломаттненди и кемоста азк Азорть инголе, катк лоткафтсазь валса пялькстоматнень. Синь эздост аш кодамовок лезкс, синь кандыхть кулхцондыхненди аньцек срафтома.

¹⁵ Сембе вийсот ёрак улемс Шкайть инголе цебярь покодикс, конанди аш мезьда виздемс тиф тевсонза и кона видеста тонафты видешинь валти.

¹⁶ Кирдефт шкайфтома шава корхнематнень эзда, сяс мес синь аерфтыхть сяда ичкози и ичкози Шкайть эзда.

¹⁷ Тяфта корхнихнень валсна келемихть педи урма лаца. Нятнень ётксот Именейень мархта Филитка.

¹⁸ Синь потасть видешить эзда, корхтамок, бта кулофнень эзда вельмамась ульсь ни и тяфта синь колсесазь кой-конатнень кемамаснон.

¹⁹ Но юрсь, конань путозе Шкайсь, ащи кемоста и сонь лангсонза сёрматф: «Азорсь содасыне Эсензон»; и: «Катк туй кальдявть эзда эрсь, кие кунцесы Азорть лемонц».

²⁰ Оцю кудса аф сембе кядьготне зрнянь и сиянь, улихть шуфтоннетка, сёвонень кядьготка. Финцне, питнихне – нолявихть оцю тевса, омбонцне, аф питнихне – эрь шинь тевса.

²¹ И ся, кие аруяфнесы эсь прянц сембе тя кальдявть эзда, кармай улема оцю тевонди ноляви питни кядьгокс, инярукс, лездыкс кудазорти, и сон кармай аноклаф эрь кодама пара тевонди.

²² Од ломанень пси-лакай маряматнень эзда тук ласькозь. Сатнек видексшить, кемамать, кельгомать, сетьмошить сембонь сятнень мархта, кит ару седиса тернесазь Азорть лездомс.

²³ Кирдефт ёньфтома пялькстомада, конат шачихть-лисихть мезевок аф шарьхкоди ломаттнень эзда. Вдь тон содасак, синь аньцек вятихть сялондомас.

²⁴ А Азорть покодиенцты аф ладяй сялондомс, меколанкт, тейнза эряви улемс лямбе седикс сембонь мархта, маштомс тонафтомс, аф мяляфтомс кяж,

²⁵ и сетьмоста тонафнемс сятнень, кит ащихть тейнза каршек. Пади Шкайсь вятьсыне синь каендамати и шарьхкодьсазь видешить,

²⁶ и эста ёнияхть и лисевихть идемэвозть кядялда, кона кундазень синь топафнемс эсь мяленц.