Павелонь омбоце сёрмац Тимофеенди 1 - Од Соткс Новый Завет на мордовском-мокша языке 2016

Шумбракстомась

¹ Павел, Шкайть мяленц коряс Христос Иисусонь апостолоц, кона кучф пачфнемс кулять надияфтф эряфть колга Христос Иисусса,

² азы пара вал Тимофеенди, эсь кельгома цёранцты. Улеза тейть пароказне, кельгозь ужяльдема и сетьмоши минь Шкай Аляньконь и Христос Иисус Азороньконь эзда!

Павел сюконяй Шкайти Тимофеень инкса

³ Мон сюконян Шкайти, конанди покодян ару ваймовайгяльса кунардонь пингонь раднянень лаца, и фалу, шинек-венек, лятфнете тонь эсь озондомасон.

⁴ Мзярда мялезон лядихть тонь сельмоветтне, монь пяк мялезе няемс тонь, сяс мес эста ваймозе пяшкоди кенярдемада.

⁵ Мон мяляфтса тонь панжадонь седихть кемамацень, кона инголи ульсь тонь Лоида бабацень и Евники тядяцень седисост. Мон кеман, тя кемамась ули тонь седисотка.

Пачфнесть Пара кулять аф пелезь!

⁶ Сяс лятфтаса тейть: фалу киртьк тевса Шкаень казнеть, кона максф тейть бславамать пингста монь кядень путомазень вельде.

⁷ Сяс мес Шкайсь ашезь макса тейнек пелемань ваймопожф, а макссь виень, кельгомань и шумбра-ару мялень ваймопожф.

⁸ Сяс тят визде азонкшнемс Иисус Христос Азороньконь колга ломаттненди, тяфта жа тямак визде монь, Сонь валонц пачфнеманкса пякстафть. Меколанкт, кирдить мархтон сталмонень Христость Пара кулянц инкса, надиязь Шкайть виенц лангс.

⁹ Шкайсь идемазь минь и тердемазь иняру тердемаса, аф минь тевоньконь коряс, а эсь мяленц-арьсеманц и пароказненц коряс. Тя пароказнеть Сон максозе тейнек Христос Иисусса нинге пингть ушедомда инголе,

¹⁰ и тяни тя пароказнесь панжевсь тейнек минь Идиеньконь Христос Иисусть саманц вельде. Сон срафтозе-калафтозе куломать и Пара кулять вельде панжезе тейнек эряфть и аф куломать.

¹¹ Тя Кулянь кандыкс, апостолкс и тонафтыкс лия ломаньтналхненди мон путфан.

¹² Тянкса мон и кирдьсайне ня сталмотнень, но прокс аф виздьсайне, сяс мес содаса кинди кеман. И кемоста содаса: Сон машты ванфтомс семботь, мезе путф лангозон ся мекольдень шить самс.

¹³ Сявк кепотьксонди тя шумбра тонафтомать, конань тон кулить монь эздон, и эряк кемамаса и кельгомаса, конат улихть Христос Иисусса.

¹⁴ Минь эсонк эряй Иняру Ваймопожфть вельде ванфтыть ся паротнень, конат тейть максфт.

Онисифоронь кемамац

¹⁵ Тон содасак: Асияса сембе шарфтсть эздон, синь лувкссост – Фигеллонь мархта Ермогенга.

¹⁶ Мон эняльдян Азорти кельгозь ужяльдемс Онисифоронь кудонц, сяс мес сон сидеста озафнезе монь седизень и ашезь визде монь пякстамгудса ащемазень эзда.

¹⁷ Меколанкт, мзярда сон сась Риму, эста путозе сембе виенц монь вешемс и мумань.

¹⁸ Катк Азорсь макссы тейнза Эсь кельгозь ужяльдеманц ся мекольдень шиня. А конашкава сон тейне лездсь Ефесса, тон сядонга лац содасак.