Павелонь омбоце сёрмац Фессалоникав 3 - Од Соткс Новый Завет на мордовском-мокша языке 2016

Озондода инксонк!

¹ И мекольцесь, кемай ялгат, озондода инксонк! Катк Азорть валоц курокста келеми и ули шнаф сембе вастова, кода и тинь ётксонтка.

² Озондода сянксонга, катк Шкайсь мяньфтсамазь минь аф пчкяй и кальдяв ломаньда, вдь аф сембе кемайхть.

³ Но Азорть лангс ули кода надиямс: Сон кемокстатядязь и ванфттядязь тинь Кальдявть эзда.

⁴ Минь Азорть эса кемоста надиятама лангозонт: тинь тиендьсасть и сяда товга карматада тиендемонза сянь, мезенди минь эсонт кошарттама.

⁵ Катк ина Азорсь ладясыне тинь седиентень Шкаень кельгомати и Христость кирдемшканцты.

Кардамат нолашинь эряфть колга

⁶ Кемай ялгат, Иисус Христос Азороньконь лемса мярьктяма тейнть: кирдевода ширеса эрь кемай ялгать эзда, кона тевфтома ётафнесы пингонц и аф тиенди ся тонафтомать коряс, конань тинь сявость минь эздонк.

⁷ Тинь тинць содасасть, тейнть эряви тиендемс минь лацонк. Минь ашеме ащекшне ширесонт тевфтома

⁸ и стак киньге кшидонза ашеме ярхца. Минь пелеме арамс тейнть сталмокс, сяс шинек-венек стакаста покодезь апак лотксек тиеме тев.

⁹ И сембось тя ёфси аф сяс, мес ашель тянди азорксшиньке, аф, минь тяфта ёраме няфтемс тейнть, кодамкс эряви улемс.

¹⁰ И нинге ширесонт улемста минь кошардодязь: кинь аш мялец покодемс, ся катк аф ярхцай!

¹¹ А тяни минь кульсаськ: ётксонт улихть нола ломатть, конат покодемска аф покодихть, но эцекшнесазь нярьснон лиятнень тевс.

¹² Тяфтама ломаттнень минь кошардсаськ и кемокстасаськ Иисус Христос Азороньконь лемса сетьмоста покодемс и эстейст трямс пряснон.

¹³ А тинь, кемай ялгат, стаки тиесть эсь пара тевонтень, тяда макссе пря сиземати.

¹⁴ Кда кие-бди аф кулхцондсы сянь, мезе минь сёрмадоме тя сёрмасонк, ся ломанть сявость мяльс и тяда корхта мархтонза, катк сргози визьксоц.

¹⁵ Но тясть лува тя ломанть душманкс, а кода кемай ялганди лездода арамс видексшинь ки лангс.

Мекольце валхне

¹⁶ Катк Сонць Азорсь, сетьмошинь лихтибрясь, максы тейнть сетьмоши фалу и сембоса! Улеза Азорсь сембонь тинь мархтонт!

¹⁷ Пара вал монь эздон – тянь сёрмадса эсь кядьсон, тяфта мон тяштькснеса эрь сёрмазень – ПАВЕЛ.

¹⁸ Иисус Христос Азороньконь пароказнец улеза сембонь тинь мархтонт! Аминь.