Павелонь омбоце сёрмац Фессалоникав 1 - Од Соткс Новый Завет на мордовском-мокша языке 2016

Шумбракстомась

¹ Павел, Силуан и Тимофей кучихть пара вал Фессалоникань кемаень пуромксти, кона эряй Шкай Аляньконь и Иисус Христос Азороньконь эса.

² Арьсетяма тейнть пароказне и сетьмоши Шкай Аляньконь и Иисус Христос Азороньконь эзда!

Шкайть судендамац виде

³ Кемай ялгат, тейнек фалу эряви азондомс сюконяма Шкайти тинь инксонт. И ули мезенкса, вдь тинь кемаманте козяста касы и фкя-фкянди кельгоманте сядонга ламолготкшни эрть эса.

⁴ Сяс минь минць Шкаень лия кемаень пуромкснень инголе шнафттама пря тинь мархтонт, кода тинь, сембе панцематнень и люпштаматнень ёткса эрязь, ванфнесасть эсь кемошинтень и кемамантень.

⁵ Тя сембось няфтьсы, Шкайсь Эсь виде судонц коряс луфтядязь тинь кондястикс Эсь Оцязорксшинцты, конань инкса тинь и маятатада.

⁶ Шкайсь видексшинь тии: Сон пандсы люпштамаса сятненди, кит люпштайхть эсонт.

⁷ А вага тейнть, конат тяни кирдихть люпштамат, Сон минь мархтонк марса максы ваймама ся шиня, мзярда Иисус Азорсь эвондай менельста вии ангелонзон мархта,

⁸ юрнай тол потмоса. Эста Сон пандсы кяженц сятненди, конатнень ашель мяльсна содамс Шкайть и конат ашезь кулхцонда Пара кулять Иисус Христос Азороньконь колга.

⁹ Кяжень пандомакс тейст ули пефтома юмамась: синь сявовихть Азороньконь эзда и Сонь иневалдонь оцюшинц ингольде.

¹⁰ Тяфта тиеви ся шиня, мзярда Сон сай и ули шнаф Эсь иняру ломанензон ёткса. Эста лангозонза ванозь дивандазевихть сембе сят, кит кемасть Тейнза. Ётксост ульхтяда тиньге, сяс мес тинь кемаде минь няфтеманьконди-азондоманьконди Христость колга.

¹¹ Вов мес минь фалу озонттама инксонт: катк Шкаеньке тихтядязь тинь кондястикс ся эряфти, конанди тердедязь, и катк Эсь вийсонза кемокстасыне тинь мялентень паронь тиеманди, и педа-пес пяшкодьсыне ся тефнень, конатненди тинь саде кемамантень вельде.

¹² Эста тинь вельдент шнави-кеподеви Иисус Азороньконь лемоц, и тинь ульхтяда шнафт-кепотьфт Сон вельденза. Тя тиеви Шкаеньконь и Иисус Христос Азорть пароказнеснон коряс.